Habacuc 2 - Biblia Enxet

¹ Aleyxmakha sa' ko'o, ataqmelcheshok sa' séláneykha, aptémól'a énxet apkelhaxneykha etnamha m'a apkenmeykegkaxa nak chá'a, yaqwayam sa' ay'asagkoho', háxko sa' kexaha etnehek heyának Wesse' egegkok heyátegmowagkok ma'a ektémakxa nak megkaleklo ewáxok.

² Aptáhak axta seyátegmowágko Wesse' egegkok se'e: “Etaxés sa' yelpa' ekpayhe m'a peya nak axekmósek xép, yaqwayam sa' kataqmelek chá'a élyetsátamáxche'.

³ Makke kawokmok makham yaqwánxa katnehek xa aqsok kélxekmóssamo nak, katnehek sa' eyke. Eleyxek sa' eyke aqsa exchep, kánéxchek sa' eykhe yehémek katnehek, kammok sa' eyke yaqwánxa katnehek.

⁴ Etaxés sa' exének énxet'ák élmasagcha'a nak apkeltémakxa apteme éleymáxkoho apkelwáxok; meletsepek sa' eyke m'a énxet'ák apkelpéwomo nak, eñama melya'ásseyam Dios.”

⁵ Apmenyeyk etnahagkok ekha kéláyo m'a énxet'ák éleymáxkoho nak apkelwáxok, melánegwomek chá'a aptamhágkaxa elchetmok, eltamhok aqsa kayeykhágwomho', hensexnenáwhok eykhe m'a ekha nak sẽláyo. Elmeykesek chá'a apatña'ák, máxa m'a takhaxpop la'a, megkalleklamagkek nahan, ektémól'a nétsapma, cháxa keñamak apketámeykegko nak chá'a xama yókxexma tén han mók yókxexma yaqwayam emok chá'a.

⁶ Elesmaksek sa' eyke apyókxoho pók aptémakxa énxet'ák apkelmomap nak ma'a ektáha nak apkelma, sa' etnehek elmeneykmaksek se'e: “¡Kéxegke la'aye, ekhésso nak aqsok kélagkok ma'a megkatnaha nak aqsok kélagkok! ¿Háxko sa' ekwánxa katnehek apcháncheseykekxa aqsok ekxámokma, apkelma nak kélmassáseykha?”

⁷ Elwak sa' apkelmassáseykha nak aqsok apagkok, neyseksa melhaxneykha, elchempekxak sa' néten ma'a apkellegassáseykegkoho nak, meyke agko' aqsok apagkok sa' etnessásekxa'.

⁸ Épetchekxak sa' pók, pók aptémakxa énxet'ák yenmexek xép, elyementók sa' aqsok apagkok, ekhawo aptémakxa axta chá'a exchep, apkelyementamoma aqsok apagkok ma'a. Exnéshok sa' mók ma'a ekyókxoho aptémakxa ekmaso axta, apyennaqteyáseykencha'a axta apyempehek ma'a apchókxa, apkenmexma axta m'a tegma apkelyawe nak, yetlo énxet'ák apheykha m'a kañe'.

⁹ ¡Kéxegke la'aye, kéllánesso nak kélxanák ma'a aqsok kélmenyexéyak, yaqwayam enxoho katnehek meyke ektáhakxa kélheykha!

¹⁰ Kéllánessegkek kélxanák ma'a aqsok segmegqassamo nak, kélnaqtawásamáxche kélagko' kéltemék kélmassésseykmo apxámokma apagko' ma'a pók aptémakxa énxet'ák.

¹¹ Kawomhok sa' meteymog kélhaxta nak nepyáwa tegma, tén han yántéseksek éltegyésso nak kapaqhetchesek ekyennaqte kaxénchásekxohok aptémakxa.

¹² ¡Kéxegke la'aye, kélláneyak nak tegma apkelyawe kélagkok eñama m'a nentémakxa ekmaso nak, tén han megkapéwomo nak!

¹³ Wesse' egegkok ekha apyennaqte sa' etnéssesek eyaqhémo m'a kéltamheykha nak, tén han kélwasqapma, hakte táxa sa' kamasséssók ma'a ekyókxoho aqsok kélláneyak nak.

¹⁴ Kasawhekxohok sa' ekyókxoho keso náxop apkelya'áseykegkoho énxet'ák Wesse' egegkok apcheymákpoho, ektémól'a yegmen eksawheykekxohol'a ekláneyo m'a wátsam ekwányam.

¹⁵ ¡Kéxegke la'aye, kélnáhakkasso nak chá'a anmen apheykha nak ketók kélxanák, kéleykegko nak chá'a vino kélenchehe m'a pánaqte segyeykessamo nak exma, yaqwayam enxoho kólesmaksek chá'a kóllanok meyke apáwa!

¹⁶ Kólmegqáwhok kélagko' sa' yaqwayam eykhe kóltéhek ekha kéláyo, hakte Wesse' egegkok sa' yagkok xama egheykok ma'a senlegassáseykegkoho nak, yaqwayam sa' kataxchek kélyókxa meyke apáwa, aqsok segmegqasso sa' katnekxak ma'a kéleymáxkoho.

¹⁷ Kaphewakxak sa' kéxegke kélteméssessamakxa axta kélyennaqteyáseykencha'a kélyempe'ék kélláneya m'a egkexe Líbano, kalyegwakkasek sa' eñama kélnapma m'a aqsok nawha'ák élleykha nak ma'a. Cháxa yaqwayam sa' káhapwak kéxegke xa, eñama aqsok ekmaso kéllánéyak tén han ekyókxoho kéltémakxa ekmaso axta, kélyennaqteyáseykencha'a axta kélyempe'ék ma'a apchókxa, kélenmexma m'a tegma apkelyawe nak, yetlo énxet'ák apheykha m'a kañe'.

¹⁸ ¿Yaqsa aqsok egwanchek anteméssesek kéleykmássesso ekpenchásexko enxoho? ¿yaqsa aqsok egwanchek anteméssesek kéleykmássesso sẽlyexancháseykha nak chá'a? Yawanchek kalpaqmétek ma'a aqsok kéleykmássesso, ¡kaqhok yáwhok ma'a énxet ektáha nak chá'a apkelane!

¹⁹ ¡Kéxegke la'aye, kéltémo nak kaxatakhak kéleykmássesso élánamáxche nak yántéseksek, tén han kéltémo nak katnamha meteymog meyke nak ekpeywa! ¿Awancheya kaltennaksek amya'a m'a? ¡Yawanche', méko énnama m'a, sawo ekyátekto ekmomnáwa eykhe kélyepetchesso m'a émpehek nak, tén han sawo ekmope ekmomnáwa!

²⁰ Apheyk Wesse' egegkok ma'a tegma aptaqmalma appagkanamap apagkok: ¡Kólwanmeyák nápaqto' kélyókxoho kélheykha nak ekyókxoho keso náxop!