Habacuc 1 - Biblia Enxet

Habacuc apkelpaqhetchásamákpoho Wesse' egegkok

¹ Keso amya'a apxékmósso axta Wesse' egegkok Habacuc, apteme axta Dios appeywa aplegasso.

² Wesse', ¿háxko sa' ekwánxa kammok sekwóneykha séltémo hepasmok meyke seháxenmo? ¿Háxko sa' ekwánxa kammok sekwóneykha eñama apkelyennaqteyáseykha apyempe'ék énxet'ák meyke segye'eykekta' yaqwayam hélmallahanchesek?

³ ¿Yaqsa ektéma sexekmóssama nak chá'a ko'o m'a ekyentaxnamo nak egwáxok, tén han aqsok ekmaso? Yetnegkek ko'o sekhakxa m'a apkelyennaqteyáseykha nak apyempe'ék énxet'ák, tén han sẽlmassésseyam nak, sawheykekxók apkello m'a énxet'ák, tén han ma'a apkelenmexamap.

⁴ Megkalánamáxchek ma'a ektémakxa nak chá'a segánamakxa, kelyeykhamaxchek aqsa m'a ekpayhawo nak antéhek, apnaqtawáseykegkók chá'a élmasagcha'a nak apkeltémakxa m'a éltaqmalma nak apkeltémakxa, apkelyetnakhásseykmek ma'a ekpéwomo nak nentémakxa.

⁵ “Kóllano m'a énxet'ák apwakhaya nak kélheykegkaxa kéxegke; kólé sa' kóllano'. Peyk ko'o alának aqsok, peya sa' kólya'ássók kéxegke kéltennáseyncha'a enxoho.

⁶ Wampakhássesek sa' ko'o m'a caldeos, énxet'ák apkello megkalmayósa nak elanok aqsok, apkelweynchámeykha nak chá'a ekyókxoho yókxexma, yaqwayam emok chá'a xapop megkatnahakxa nak chá'a apagkok.

⁷ Hegyegwakkashok han, eleykpohok nahan, wánxa han chá'a elanagkok ma'a segánamakxa apagkok apagko' nak eñama éleymáxkoho apkelwáxok.

⁸ Apmelyeyha'awók apagko' han apkenyahéyak apkelchánte yátnáxeg, apyeykhásseykmok ma'a ekwánxa nak ekyennaqte apkenyahéyak yánneptána, apkellómók apancha'awók nahan, apyeykhásseykmok ma'a aqsok nawha'ák éllo élleykha nak yókxexma meykexa énxet. Apxámok apagko' han chá'a etnehek enaqtégkesagkok apkelchánte yátnáxeg, makhawo chá'a elleñék ektamagkok ma'a apkelenmexma, ektémól'a náta ekyawe kathánek aqsok ekmáheyo kamok.

⁹ Emasséssók chá'a ekyókxoho aqsok apkelwánxa enxoho chá'a, etekkesek chá'a élmeneymáxche apmonye'e, apxámok apagko' chá'a etnehek apkelma apkelenmexma, ekweykenxal'a ekxámokma yagkamex ma'a neyáwa wátsam ekwányam.

¹⁰ Elwanyohok chá'a m'a kelwesse'e apkelwányam nak, tén han ma'a énxet ekha nak kéláyo. Megkatneykha chá'a apkelwáxok elanok ma'a tegma apkelyennaqte nak elesmaksek aqsa, yekheksek aqsa chá'a xapop ma'a apmonye'e nak, keñe emok chá'a ektamagkok.

¹¹ Máxa éxchahayam ekyennaqte etnahagkok elxog, máxa aqsok apcháyókxa apteméssessók apkeláyo m'a ektémakxa nak apkelyennaqte.”

¹² Wesse' egegkok, aphegkek xép meyke néxa', Dios ahagkok appagkanamap, apteme nak megyetsapma. Wesse', apteme nak semasma, apméssegkek xép apkelyennaqte caldeos, yaqwayam enxoho ellegássesagkohok énxet'ák eñama apkeltémo exchep.

¹³ Mopwanchek xép yohok aqsa katyapok aqsok ekmaso, hakte cháxña'awók aptémakxa, mopwanchek elanok yetlo ekleklamo apwáxok ma'a aqsok élmasagcha'a, ¿yaqsa ektéma exchep apwanmeyeykencha'a nak aqsa apkeláneykencha'a m'a énxet'ák apkelánéyak nak chá'a aqsok ekmaso agko'? ¿yaqsa ektéma apwanmeyeykencha'a nak apkeláneykencha'a m'a énxet'ák élmasagcha'a nak apkeltémakxa apmassésseykmo m'a énxet'ák megkaxnawo nak apkeltémakxa?

¹⁴ Máxa kelasma élleykhal'a wátsam ekwányam apteméssessók ma'a énxet'ák, ektémól'a aqsok nawha'ák meyke nak wesse' agkok.

¹⁵ Apkelmomchek chá'a caldeos ma'a pók aptémakxa nak chá'a énxet'ák, aptémól'a aptegyéyak kelasma elmok ma'a kelasma. Sókhaxé chá'a etnehek elmok, tén han yám'én, apkelanawók agkok chá'a ekxámokma kalpayhekxa chá'a apkelwáxok.

¹⁶ Cháxa keñamak aptegyéyak nak chá'a kelasma apteméssessama máxa aqsok apcháyókxa m'a yám'én apagkok tén han sókhaxe apagkok, elnáhakkasek chá'a aqsok apnaqtósso, elwatnések nahan chá'a m'a aqsok ekmátsa nak ekpaqneyam, hakte cha'a keñamak ekmésso aptéyak ektaqmalma m'a, tén han ekxámokma.

¹⁷ ¿Ellenxanmagkohoya sa' caldeos sẽlma negko'o yám'én apagkok? ¿Ellenxanmagkohoya sa' apkelnapma énxet'ák meyke apkelmopyóseka apkelányo?