Ezequiel 19 - Biblia Enxet

Éllekxagwomáxche eñama m'a kelwesse'e apkelwányam nak Israel

¹ “Xép énxet, enneykmásses sa' kelwesse'e apkelwányam nak Israel se'e negmeneykmasso senlapwayam nak:

² “Méwa axta exchep egken ekleykencha'a axta m'a neyseksa námakkok méwa. Kelánegweykmek axta axagkok neyseksa m'a, axta kektegkesseykmok nahan étkók ma'a.

³ Xama axta nahan taqmelchessamók ekwánegkesso m'a, ekwokmoho ektéma ekwányam, keltáméyak axta ekma ekyógkexma, tén han ekto m'a énxet.

⁴ Xama axta apkelleg'a ekxénáxko apyókxoho pók aptémakxa nak chá'a énxet xa, apkelhanchek axta apma, sawo ekhaxe axta apketchessásak awéhek apyenyawásegkokxo ekweykekxoho m'a Egipto.

⁵ Xama axta ekwet'a ekwegqa eyaqho élhaxna étkok ma'a méwa, mákxeyk axta makham mók étkok. Teméssessek axta nahan méwa ekyennaqte m'a.

⁶ Wokmek axta m'a ekweykenxal'a xama méwa, kaweynchamha axta chá'a m'a neyseksa námakkok. Keltáméyak axta ekma m'a ekyógkexma, tén han ekto m'a énxet.

⁷ Keltepelchamók axta m'a kelwesse'e apkelwányam apxanák nak, tawáseykha axta m'a tegma apkelyawe; kalpexyennegkesek axta chá'a apyókxoho énxet ma'a ekyexwéweykha.

⁸ Tén axta apkenmexa m'a énxet'ák apheykha axta m'a nepyáwa tegma apwányam; apkelhanchek axta, meyk axta nahan ma'a apkelhanma.

⁹ Kélatchessessek axta nahan awéhek sawo ekhaxe kélaqxegkesa kañe' yántéseksek, kélyentegkásekxeyk axta m'a wesse' apwányam Babilonia; axta kélaqxegkessákxak nahan kañe' m'a, yaqwayam enxoho megkañexchekxók chá'a kaxwók ekyexwéweykha m'a néten meteymog élekhahéyak nak Israel.

¹⁰ “Hawók axta exche' anmen yámet ma'a egken, kélcheneykekxal'a neyáwa yegmen, ektaqmalma tén han ekxámokmal'a áwa', hakte awanhek axta yegmen ma'a émhakxa.

¹¹ Kelyennaqtegkek axta nahan ma'a aktegák nak, kélláneykegkek axta m'a yámet apkelmeykegkól'a chá'a m'a kelwesse'e apkelwányam, kelwegqeykegkók agko' axta nahan, kelweykmók axta m'a yaphope nak. Makhawók axta agwethok katnamok eñama ekwenaqte tén han ekxámokma áwa'.

¹² Kélpátekkessek axta eyke yetlo ektaqnómaxche, kélpekkenchek axta náxop. Yamássek axta m'a éxchahayam eñama nak teyapmakxa ekhem pallakmek axta m'a ekyexna; Kelyamakak axta m'a aktegák élyennaqte nak kélchexakkek axta nátex.

¹³ Keñe kélchenákxo kaxwók ma'a yókxexma meykexa nak énxet, ekyamáyekxa nak ma'a xapop, meykexa nak yegmen.

¹⁴ Tekkek kaxwók táxa eñama m'a aktegák nak, kelwatneyk ma'a kaxwe éltekteyapma nak áwa' tén han ma'a ekyexna. Méko kaxwók eyeymomáxche m'a aktegák élyennaqte nak, kélláneyo axta chá'a m'a yámet apkelmeykha nak chá'a m'a kelwesse'e apkelwányam.’” (Cháxa xama negmeneykmasso senlapwayam nak xa. Kólmaha sa' chá'a xa.)