Ezequiel 15 - Biblia Enxet

Israel kélyetcháseykekxoho anmen yámet eyaqhémo nak katnamok

¹ Epaqhetchessek axta ko'o Wesse' egegkok, aptáhak axta seyáneya s'e:

² “¿Táseya éseksek ma'a anmen yámet axchapok? ¿Yagkaxnawok ma'a mók yámet élyawe élámha nak naxma?

³ Méko xama aqsok kalanaxchek ma'a éseksek nak, ¡mogwanchek anlának xama enxoho m'a nélmakheyáseykegkaxa aqsok!

⁴ Yántápak aqsa egwanchek anteméssesek. Kélwatneyk agkok táxa m'a naw'ék nak keytlók ekmeyesma m'a kañe' ekyagqaxe awáxok nak, ¿yaqsa eyke egwanchek antéhek xa?

⁵ Megkólmaha axta nahan chá'a m'a émhakxa axta, ¡yágwokmók aqsa kaxwók megkólmeykha yaqwayam kalanaxchek xama aqsok se'e ekmeta nak!

⁶ “Cháxa keñamak sektáha nak ko'o sekpeywa s'e, sektáha nak Wesse': Sa' atnéssesek ko'o xa akxák neyseksa táxa énxet'ák apheykha nak Jerusalén ma'a ektémól'a kólchexák nátex ma'a anmen yámet axchakkok, yaqwayam enxoho kalmétek.

⁷ Sélenmexma sa' ko'o atnehek xa énxet'ák nak. Elmallánek sa' ma'a xama táxa, keñe sa' ma'a mók táxa nak kalwatnek. Ekxénchek sa' agkok ko'o sektáha sélenmexma m'a, kólya'ásegwók sa' kéxegke sektáha ko'o Wesse'.

⁸ Meyke xama aqsok sa' atnessásekxak ma'a apkelókxa nak, eñama seyenseyam sétleykha. Ko'o sekxeyenma xa, sektáha nak Wesse'.”