Cantares 8 - Biblia Enxet

¹ ¡Etnoho anna axtal'a exchep eyáxeg ahagko', ekwánegkessól'a apto m'a méme nam'agkok! Tén axta sekwet'a enxoho chá'a m'a ámay nak, apetsesek chá'a, méko axta nahan chá'a ko'o hésmaksek;

² ewanchek axta ayentemekxak chá'a m'a méme axagkok, ataxnéssekxak chá'a m'a kañe', tén axta exchep etnehek sélxekmósso. Wagkok axta chá'a ko'o exchep ma'a vino ektaqmalma nak tén han ma'a yántakyexna égmenek séneykekxa nak.

³ ¡Nepsagqalwa apaktog sa' hetchágkasagkok, keñe sa' apaktog apkelya'assamakxa hepathétek!

Apkenna'

⁴ Kelán'ák Jerusalén, néltamhók negko'o mehẽltawássesha neghéyak. ¡Hẽlho aqsa aghagkok ekwokmoho nennaqxétekhágko!

Ektáhakxa seis negmeneykmasso Coro

⁵ ¿Yaqsa ekxegakmo nak yókxexma meykexa énxet, ekyepetchesakmo nak akqátek ekpathetakmo m'a ekpagkanma? Kóneg yámet manzano axta exche ekxátekhássék: eklegeykegkaxa axta ekmáske m'a egken; ektémakxa axta naqláwa egken ektegkessama exche'.

Apkenna' Kelán'a

⁶ Epekken apwáxok sekwesey, ¡elqahes nahan apaktog! Kayhek ektémakxa m'a nélásekhamaxkoho nak, ektémól'a m'a nétsapma. Mogwanchek nahan agyetnaqhássók ma'a ekmámenyého nak egwáxok, máxa m'a ektémól'a takhaxpop. ¡Nélásekhamaxkoho ekteme m'a táxa eyáléwe ekmexanma agko' la'a!

⁷ Ekyókxoho yegmen ekyetno nak ma'a wátsam élyawe, yawanchek kamasseksek ma'a ektémakxa nak nélásekhamaxkoho; yawanchek nahan kaspanchesek ma'a wátsam étkók nak. Yetneyk agkok nahan xama énxet apmáheyo eyaqmagkásekxak ekyókxoho aqsok apagkok ma'a nélásekhamaxkoho nak, apkesmésamap aqsa exka'.

Coro

⁸ Ketsék makham negko'o egyáxeg, méko makham nam'agkok. ¿Háxko sa' anteméssesek sẽlya'awa enxoho hẽlmaxnegwa'?

⁹ Kaxtemék ekteme kélhaxtegkesso tegma m'a, anlanaksek axta élámha étkók sawo ekmope élyenma m'a néten nak; kaxtemék axta ekteme xama átog, ólyepetchesek axta m'a yámet cedro.

Kelán'a

¹⁰ Máxa neykhe ko'o tegma kélhaxtegkesso nepyáwa', keñe neme ahagkok aphawo m'a tegma apkelwenaqte nak. Ekeso éñamakxa sekpagkanma nak ko'o, apweteya ko'o sekweteya m'a ekpayheykekxa ewáxok.

¹¹ Axta yetnók apkeneykekxa anmen yámet Salomón ma'a yókxexma Baal-hamón. Apnegkenmék axta nahan énxet aptaqmelchesso m'a, tén axta m'a ekwokmo enxoho chá'a ekhem eknakxamáxchexa ekyexna, elmésagkok chá'a mil sawók selyaqye ekmomnáwa xama xama.

¹² Salomón, xeyep apagkok ma'a mil sawók selyaqye nak, keñe doscientos ma'a ektáha nak aptaqmelchesso anmen yámet; ¡sektaqmelchesso ahagko' eyke ko'o m'a anmen yámet séneykekxa!

Apkenna'

¹³ ¡Xeye', ekweynchámeykha nak chá'a neyseksa pánaqte exnók, koho sekxók weyxhok ekpeywa! ¡Apkelhaxneyk xeye' eñak ekpeywa ennámakkok!

Kelán'a

¹⁴ ¡Yenye, sekpagkanma, etne aptémól'a xama popyet yenyehek, ektémól'a kanyehek xama xenaq étkok ma'a neyseksa xóp élekhahéyak, émpeykxa nak ekpaqneyam ekmátsa!