Cantares 6 - Biblia Enxet

Coro

¹ Kelán'a ektaqmalma nak neyseksa kelán'ák éltaqmalma ¿Háxko exchek apmahágkaxa ekpagkanma? ¿Háxko exchek appéwókxa apxega? ¡Agyetlók sa' negko'o exche' agketmok!

² Exchek apmeyákxak ko'o sekpagkanma m'a apkeneykekxexa nak pánaqte exnók apagkok, émpeykxa nak ekpaqneyam ekmátsa, apmako elagkok pa'at ma'a nepkések apnaqtósso tén han peya elyaqténwakxak ma'a pánaqte exnók élyexwase nak.

³ Ko'o appagkanma m'a, keñe ko'o sekpagkanma m'a. Elagkok chá'a pa'at apnaqtósso m'a neyseksa nak pánaqte exnók éltaqmalma.

Ektáhakxa cinco negmeneykmasso Apkenna'

⁴ Tásók agkók xeye' sekpagkanma, máxa m'a tegma apkelyawe nak Tirsá kalkohok egwáxok anlano', máxa m'a tegma apwányam Jerusalén; katyamok egwáxok agweta', máxa m'a sẽlpextétamo apkelxegál'a.

⁵ ¡Kalwatés sélányo, mowanchek chá'a ko'o sélanawo aqta'ák! Máxa yát'ay apketkók apkelnextegeykhal'a néten meteymog élekhahéyak Galaad ma'a áwa' nak.

⁶ Kelmópowók ekyókxoho m'a am'ák máxa m'a nepkések kaxwél'a kélpenchesso kélyaqpassáseyak yegmen, ekpenchásamáxchel'a yaqwayam kólyésesagkok.

⁷ Máxa yántakyexna kélpáxqatmal'a neyseksa amáxempenák ma'a teyp nak eyáhakkasso nát apáwa apkexyawe.

⁸ Sesenta ekyókxoho apnaqteyegka'a m'a kelwesse'e apkelwányam, keñe ochenta m'a apkelmeykha naqsa nak, xámók agkók eyke m'a kelán'a étkók kaxwe éktega nak,

⁹ wánxa eyke ko'o xama m'a sekpagkanma, ekho nak wáx'ay aptaqmalma; eyásekhayo nak wánxa xama m'a egken ektáha axta ektegkesso. Kelwet'ak agkok chá'a m'a kelán'a étkók xamo' nak, kalmések chá'a élpayheykekxa awáxok; kaltaqmalmakha chá'a élpeywa kalxének ma'a kelwesse'e apkelwányam apnaqteyegka'a nak, tén han ma'a apkelmeykha naqsa nak.

Coro

¹⁰ ¿Yaqsa élteyányeyncha'a nak, ekho nak ekhem éltátchessól'a axto'o? Tásók agko', máxa m'a pelten aptaqmalmal'a, máxa m'a ekhem éltátchesso ektaqmalmal'a ¡ekteyeykmohol'a egwáxok agweta' aptémól'a elxog ma'a sẽlpextétamo!

Kelán'a

¹¹ Ekmeyákxeyk axta ko'o m'a apkemhakxa nak yányetsene apto sekmako alanok ma'a yenta'a kaxwe nak ekyápaqmáteykegkokxa áwa' aqsok ma'a yókxexma ekyapwátegweykenxa nak xapop; tén han sekmako alanok kaxwe éltektépeykekxa m'a anmen yámet tén han yántakyexna exnamok.

¹² Keñe natámen may'ásegko ektáhakxa ekwokmoho sekwet'a sekha xamo' kañe' yátnáxeg apyenyawasso m'a wesse' apketkok ahagkok.

Coro

¹³ ¡Keyxyem makham Sulamita, keyxyem! ¡Keyxyem, néltamhók makham negko'o agweta'! ¿Yaqsa kéltamho kólwetak kalának Sulamita? ¡Eknéweykha, ektémól'a m'a apkelpakxeneykegkaxa énxet!