Cantares 2 - Biblia Enxet

Kelán'a

¹ Ko'o sekteme pánaqte exnók émha nak ekpayhegweykenxa xapop yókxexma Sarón. Ko'o sekteme pánaqte exnók ektaqmalma élámha nak ma'a yókxexma ekyapwátegweykenxa nak xapop.

Apkenna'

² Máxa pánaqte exnók émhal'a neyseksa am'ák temék neyseksa kelán'ák ma'a sekpagkanma nak.

Kelán'a

³ Máxa yámet manzano émhal'a neyseksa yenta'a élyawe naxma aptemék nepyeseksa apnámakkok wokma'ák ma'a sekpagkanma nak. ¡Atsek chá'a axek ma'a kóneg pessesse agkok nak! ¡Atsek chá'a atwok ma'a ekyexna nak!

⁴ Éntamákxeyk axta m'a kañe' élánéxchexa axta ektámaxche ekyawe, chátseyha axta chá'a nápat sélano.

⁵ ¡Hélák hana ko'o anmen yámet ekyexna kélyamasso kélyaqyeyáseykekxa, yaqwayam sa' eynnákxohok makham! ¡Hélák hana ko'o manzana ekyexna, ekyelqáxcheyk ko'o eñama seyásekhayo m'a sekpagkanma nak!

⁶ ¡Nepsagqalwa apaktog sa' hetchágkasagkok, keñe sa' apaktog apkelya'assamakxa hepathétek!

Apkenna'

⁷ Kelán'ák Jerusalén, néltamhók negko'o mehẽltawássesha neghéyak, yetlo kélxeyenma xenaq étkok tén han popyet apketkók. ¡Hẽlho aqsa aghagkok ekwokmoho nennaqxétekhágko!

Ektáhakxa ánet negmeneykmasso Kelán'a

⁸ ¡Apkexyekmek sekpagkanma! ¡Ekleg'ak kaxwók appeywa! Apnextegánteyk néten apkexyekmo m'a néten meteymog élekhahéyak nak, apnextegánteyk néten apkexyekmo m'a egkexe étseksa'ák nak.

⁹ Máxa popyet ma'a sekpagkanma nak, máxa m'a popyet apketchetsék la'a. ¡Apkenegwa'akteyk kaxwók xa teyp átog nak, apkelteyanyáha chá'a átog étkok, apkelmallahancháseyha chá'a apkelyeheykha m'a élyagqáxeykha nak!

¹⁰ Aptáhak seyáneya sekpagkanma s'e: “Kampekxa néten sekpagkanma; nók, ólxog.

¹¹ ¡Kalano! Negyeyk'ak kaxwók apmopsamágexal'a yetlákxók nahan ma'a ekmámeye nak, massék kaxwo'.

¹² Kelyapwágkokxeyk pánaqte exnók ma'a yókxexma, negwokmek kaxwók ekhem negmeneykmassamakxa, legáxcheyk kaxwók apkelpáwá sapop ma'a yókxexma egagkok.

¹³ Yexneyk kaxwók ma'a higo yámet, kempássek ekpaqneyam ma'a anmen yámet kélcheneykekxa. “Katnemekxa néten, sekpagkanma; nók, ólxog.

¹⁴ “Sekpagkanma ekhémo nak wáx'ay, ekyexanmomo nak chá'a m'a neyseksa meteymog élpaqxo, tén han netnók agko' nak tén han ekxámokmakxa nak élyapwáteyak meteymog. Heyho ótak nát, heyho añak ekpeywa. ¡Tásek ko'o alanok nát xeye'! ¡Atsek nahan weyxhok ekpeywa!”

Kelán'a tén han apkenna'

¹⁵ Kólma sa' yammáleg, yammáleg étkók, ektawáseykencha'a nak negko'o anmen yámet negkeneykekxa' kaxwe nak élyapwéyak.

Kelán'a

¹⁶ Ahagkok ko'o m'a sekpagkanma nak, keñe apagkok ko'o m'a. Elagkok chá'a pa'at apnaqtósso m'a neyseksa nak pánaqte exnók éltaqmalma.

¹⁷ Sekpagkanma, hey'óta sa' makham élsaka enxoho, ekmassa enxoho ekyáqtessóxma; etne aptémól'a popyet, aptémól'a popyet apketkok, apkexyeykmohol'a m'a néten meteymog élwenaqte nak.