Cantares 1 - Biblia Enxet

Ektémakxa ektáxésamaxche'

¹ Negmeneykmasso ektaqmalma agko' apnaqtáxésso axta m'a Salomón.

Émha amonye' negmeneykmasso Kelán'a

² ¡Hepetses hana sekxo'! Yeykhágweykmók agko' ekmátsa vino m'a ektémakxa nak chá'a seyásekhayo.

³ Atsók agkók chá'a atekhánek ekpaqneyam ma'a sokmátsa apagkok, máxa entemék apwesey m'a sokmátsa élyegkenamaxchel'a. ¡Cháxa keñamak ekmámenyého nak chá'a m'a kelán'a étkók!

⁴ ¡Héntemekxa heykxe kaxwo'! ¡Wesse' apwányam, héntemekxa kañe' apxagkok! Kalpayhekxak sa' egwáxok yetlo exchep; kalxénwakxohok sa' egwáxok ekyeykhágweykmoho ektémakxa vino m'a ektémakxa nak chá'a seyásekhayo. ¡Neyke temék ekmámenyého nak chá'a m'a kelán'ák!

Coro Kelán'a

⁵ Kelán'ák Jerusalén, sélpésyam eykhe ko'o, etásek eyke; Sélpésyam, hawók émpehek ma'a apkelpakxenéyak nak énxet'ák ma'a yókxexma Quedar. Etáse', máxa m'a Salomón apáwa napwe'ék apagkok kélmakheyáseykegkól'a m'a kañe' apxagkok.

⁶ Nágkóllano aqsa ektémakxa ekpésyam émpehek, tén han ekwatno émpehek ma'a mayáhat. Etaqnagkamchek axta ko'o m'a élyapma, tén axta apkeltémo atnehek séláneykha m'a anmen yámet apkeneykekxa, ¡keñe maláneykencha'a m'a ektáha axta séneykekxa ahagko'!

⁷ Xép, ekmámenyého nak ewáxok alano', héltennés hana, ¿Háxko apkeleykegkaxa chá'a pa'at apnaqtósso nepkések? ¿Háxko apkelyáqkasseykekxexa chá'a ellókassesek apkelyampe yetseksók ekhem? Mamakók ko'o aweynchamha aqsa nepyeseksa nepkések apnaqtósso m'a apkelxegexma'a nak xép.

Coro

⁸ Kelán'a ektaqmalma nak neyseksa m'a kelán'ák éltaqmalma, sa' agkok kay'ásegkok xeye', kalyetlow sa' aptamnek ma'a nepkések, kalágwom sa' pa'at yát'ay apketkók eknaqtósso m'a ekpayho nak apkelpakxeneykegkaxa m'a apkeláneykha nepkések.

Apkenna'

⁹ Sekpagkanma, ekhéssamók ko'o exche' m'a yátnáxeg apkelwána aptaqmalma, apyenyawassamól'a m'a faraón yátnáxeg apyenyawasso apagkok.

¹⁰ ¡Katxohok kalmakheykha élchenméhe m'a nekhaw'ék amáxempenák nak! ¡Katxohok kalmakheykha ayespok ma'a eknatanma meteymog élyenméyak éltaqmalma nak!

¹¹ ¡Anlanaksek sa' élchenméhe sawo ekyátekto ekmomnáwa yetlo élpaxqéyak ma'a sawo ekmope ekmomnáwa!

Kelán'a

¹² Weyncháxcheyk ekpaqneyam sokmátsa ahagkok, neyseksa apha wesse' apwányam ma'a nekha mésa.

¹³ Ekhéssamók ko'o sekpagkanma m'a ektémól'a nahápa apketkok kélxatal'a aqsok ánek ekmátsa ekpaqneyam, sekmakheyáseykencha'a nak chá'a nepyeseksa neme ahagkok.

¹⁴ Ekhéssamók ko'o sekpagkanma m'a yámet exnók élmope ekmátsa agko' la'a ekpaqneyam, émha nak ma'a kélcheneykekxexa nak anmen yámet yókxexma En-gadi.

Apkenna'

¹⁵ ¡Tásók agko' nak la'a exche', sekpagkanma, tásók agko'! ¡Máxa apqánet wáx'ay la'a m'a aqta'ák nak!

Kelán'a

¹⁶ ¡Aptásók apagko' nak la'a exchep, sekpagkanma, aptásók apagko'! ¡Pa'at ekpayhe ektaqmalma áwa' sa' katnehek ma'a negyetnamakxa néten!

Apkenna'

¹⁷ Yámet élyawe sa' katnehek éltegyésso m'a enxagkok, tén sa' yámet ciprés katnehek ekhéyak nempakxanma m'a néten.