Amós 9 - Biblia Enxet

Méko awanchek kaxyenmok Wesse' egegkok sẽlyekpelchémo

¹ Ekwet'ak axta ko'o Wesse' egegkok apkenmeyncha'a nekha élwatnamáxchexa aqsok. Aptáhak axta seyáneya s'e: “Eltekpog xa élámha nak néten étseksa'ák, ekwokmoho élyawheyncha'a m'a élámha nak tegma, ¡kaláhapwaták sa' agkok nekha étkók ma'a énxet'ák! Keñe sa' ma'a meletsapma enxoho, ko'o sa' chá'a alnápok alyetxeygkok sókwenaqte, emáwhok sa' eykhe yenyahagkok mewagkasakpek sa' eyke chá'a teyp xama enxoho;

² elyexánegwók sa' eykhe m'a kañe' xapop ekmattawóneg nak, alántekkessók sa' eyke chá'a ko'o m'a, elchenátwók sa' eykhe m'a netnók agko' nak yaphope, wának sa' eyke han ko'o elántépok ma'a.

³ Apkelyexánegwokmek sa' agkok nahan ma'a naw'a nak egkexe Carmelo, amhagkok sa' nahan ko'o alchetmok ma'a; éxánegkessekmek sa' agkok nahan ma'a kañók agko' nak wátsam ekwányam, wáphaksek sa' ko'o yegmen askok ekyawe kay'ammok ma'a, tén sa' katnéssesek nápakha apketkok;

⁴ kélnaqlákxeyk sa' agkok nahan ma'a megkatnahakxa apkelókxa apnaqleykekxa enxoho m'a apkelenmexma nak, wának sa' ko'o etekyawágwók ma'a. ¡Alanha sa' chá'a ko'o m'a, háwe eyke yaqwayam ataqmelchessesek apheykha aqsok ekmaso sa' waha'!”

⁵ Appaknegwokmók xapop ma'a Wesse' egegkok, Dios ekha nak apyennaqte, keñe élpatyapa, apkellekxagweyha nahan apyókxoho énxet'ák apheykha nak ma'a kañe'. Meyákxeyk chá'a néten ma'a xapop, keñe ekweywento nahan chá'a, ektémól'a kamyekxak néten yegmen ma'a Nilo, tén kaweywenták chá'a.

⁶ Appekkenmeyk aphamakxa Wesse' egegkok ma'a néten, keñe xapop appekkena kóneg ma'a yaphope ekyápaqmate; elwónmakha chá'a yegmen ma'a wátsam ekwányam, keñe eyegkenek chá'a keso náxop. Wesse' egegkok, cháxa apwesey xa.

⁷ Aptáhak Wesse' egegkok se'e: “Israelitas, kélhawók kéxegke sélányo m'a etiopes, méko kélyeykhamaxche kélmók. Eknaqleykenteyk axta ko'o kéxegke kéleñama m'a Egipto, eknaqleykenteyk axta ko'o filisteos apkeleñama m'a Creta, keñe arameos apkeleñama m'a Quir.”

⁸ Apkelányók Wesse' egegkok se'e énxet'ák melya'assáxma nak, keñe aptáha s'e: “Amasséssessók sa' ko'o apheykha nélwanmeygkaxa xa, masawhók sa' eyke amasséssók ma'a Jacob apnámakkok. Ko'o sekxeyenma xa, sektáha nak Wesse' kélagkok.

⁹ Wának sa' ko'o kólektegaxnek ma'a énxet'ák Israel ektémól'a kólektegaxnek hótáhap apaktek ma'a xama hópenyántétkók élyagqáxeykha, meykel'a aptéyam xama enxoho m'a apaqtek.

¹⁰ Esawhakpohok sa' etekyók apyókxoho m'a énxet'ák ahagkok melya'assáxma nak; cham'a apyókxoho apteme nak chá'a apkelpeywa s'e: ‘Méko sa' hentéhek, mehegáhapwek sa' ma'a aqsok ekmaso nak.’

Israel yaqwayam exátekhekxak makham egmonye'

¹¹ “Axátekhásekxak sa' ko'o makham David axta apxagkok aptéyam xa ekhem nak. Alápekxak sa' ma'a apkelyagqaxe nak, almekxak sa' makham ma'a nápakha'a apketkók nak, keñe sa' axátekhásekxak makham axnéshok ma'a aptémakxa axta m'a nano' axta,

¹² yaqwayam sa' etnekxak makham apagkok Israel ma'a apkeleymomap nak ma'a Edom, tén han ma'a apyókxoho énxet'ák ektáha nak ko'o ahagkok.” Apméssek appeywa m'a Wesse' egegkok, elának sa' nahan.

¹³ “Xegakmek ekhem peyakxa sa' mepenchesakpók apnakxamap hótáhap apyexna, kólpeynchámekxak makham ma'a xapop, tén han yaqwánxa sa' megkapenchesaxkók kélteyáyam anmen yámet ekyexna, kólchenekxak makham ma'a hótáhap apaktek. Máxa yegmen ényé sa' katnehek kanyehek vino m'a néten xóp élekhahéyak.

¹⁴ Keñe sa' anaqlanták ko'o makham ma'a énxet'ák ahagkok Israel, kélnaqleykekxa axta megkatnahakxa apkelókxa. Enaqxétekhasagkokxak sa' makham ma'a tegma apkelyawe kélnaqtawáseykha axta, keñe sa' exmakha makham ma'a; eknagkok sa' makham anmen yámet, énagkok sa' nahan ma'a égmenek nak; eknagkokxak sa' makham aqsok aktek namyep, etawagkok sa' nahan ma'a ekyexna nak.

¹⁵ Hakte alhéssekxak sa' makham ma'a ektáhakxa nak xapop apagkok apagko', megkólántekkásekxók sa' chá'a kaxwók ma'a xapop sekmésso axta ko'o.” Dios Wesse' egegkok apxeyenma xa.