Amós 8 - Biblia Enxet

Hówenaq apxagkok kélxata yámet ekyexna ekmakhetma

¹ Keso sexekmósa axta ko'o Wesse' egegkok se'e: Yetneyk axta xama hówenaq apxagkok kélxata yámet ekyexna élmakhetma,

² tén axta aptáha sélmaxneyeyncha'a s'e: —Amós, ¿yaqsa apwet'a? —Xama hówenaq apxagkok kélxata yámet ekyexna élmakhetma —axta ektáhak seyátegmowágkokxo. Tén axta aptáha seyáneya Wesse' egegkok se'e: —Máxa yámet ekyexna élmakhetma aptamhágkok ma'a énxet'ák Israel; malásekhekxók sa' chá'a ko'o kaxwók xama enxoho m'a.

³ Kéllekxagweykha sa' katnekxak élmeneykmasamáxchexa nak chá'a tegma apyawe xa ekhem nak. Apxámok sa' énxet eletsapok, kalwanagkohok sa' aqsa exma kólchexák yókxexma m'a aphopák nak. Wesse' egegkok apxeyenma xa.

Chágketwa'ak ekhem yaqwayam elyekpelchekpohok ma'a énxet'ák Israel

⁴ Kóleyxho s'e, kéxegke kélnaqtawáseykegkoho nak chá'a m'a apkelmopyóseka nak, tén han kéltawassáseykha nak chá'a apheykha m'a meyke nak aqsok apagkok ma'a kélókxa;

⁵ kéxegke kélteme nak chá'a kólpaqmétek se'e: “¿Yaqsa sa' kexaha ekhem esawhakpok pelten aphaxnagkok, yaqwayam enxoho agkexeykxak makham hótáhap apaktek egagkok? ¿Yaqsa kexaha ekhem kasawhaxchek sábado yaqwayam enxoho agkexeykxak ekmomnáwa agko' ma'a aqsok aktek negkeneykekxa', ólmaha m'a kelyetsátéyak élmenyexmo nak?

⁶ ¡Antawássesha sa' apheykha m'a meyke nak aqsok apagkok, ekwokmoho sa' sẽlmeyásékpoho apagko' ekha ekyánmaga yának antamhagkok nélásenneykha naqsa yaqwayam elyánmagkasek ma'a apkelméyak aqsok, apkeltéto apmagkok sa' eykhe chá'a katnehek apkelméyak! ¡Agwomhok sa' negkexeykekxa m'a hótáhap apaktek apwakhe'ék nak!”

⁷ Naqsók aptáha appeywa Wesse' egegkok, apxéna ektémakxa nak apcheymákpoho Jacob se'e: “Mehelwánaqmeyk sa' chá'a m'a aqsok kéllánéyak axta.”

⁸ ¿Megkayawheykhaya sa' xapop eñama ekyókxoho s'e aqsok nak? ¿Mellekxagwahaya sa' apyókxoho énxet'ák apheykha nak ma'a kañe'? ¡Kamyekxak sa' chá'a néten ma'a xapop, tén sa' kaweywenták chá'a, ektémól'a kamyekxak néten yegmen ma'a Nilo, tén kaweywenták chá'a!

⁹ “Wának sa' ko'o katxek ekhem ektáhakxoho yetseksók ekhem xa ekhem nak —axta aptáhak Wesse' egegkok—, ektáhakxoho ekhem sa' wáhakkasek ekyaqtéssóxma xapop.

¹⁰ Kéllekxagweykegkaxa eñama apkeletsapma énxet sa' atnessásekxak ma'a ekhem kélessawassessamókxa nak chá'a, keñe sa' kélmeneykmasso katnekxak ma'a senlapweykenxa; wának sa' ko'o kólántaxnekxak kéxegke m'a apáwa sẽlwáxaqxamo nak, tén han kólmopaksohok kélyese magkenatchesso éllapwámegko. Máxa sa' kóltéhek kóllekxagwaha m'a aptémól'a énxet elekxagwaha exyánegkesek apketche apteme nak wánxa xama apagko', kélyókxoho sa' kalyélaqtések kéllegeykegkoho ekmáske.

¹¹ Xegakmek ekhem yaqwánxa sa' ko'o wáphaksek meyk segaqhe xapop kélagkok —axta aptáhak Wesse' egegkok—; háwe eyke m'a meyk segaqhe negmáyhél'a nento, tén han segaqhél'a ekhem, eyke m'a negmámenyéhol'a ageyxhok ma'a Wesse' egegkok appeywa.

¹² Elweynchamha sa' aqsa m'a énxet'ák, etegyagkok Wesse' egegkok appeywa, esawhekxohok sa' apkelweynchámeykha m'a wátsam élyawe nak, eyeynamo m'a nexcheyha nak, ekweykekxoho m'a ekteyapmakxa ekhem nak, melwetágwomek sa' eyke.

¹³ Kaletsapok sa' élyennákxoho hem élnapma kelán'ák étkók éltaqmalma nak xa ekhem nak, tén han ma'a wokma'ák apkelyennaqte nak.

¹⁴ Elyaqnenagkok sa' meyke apkelchampeykekxa néten ma'a apteméssesso nak chá'a naqsók apkelmésso apkelpeywa m'a aqsok kéláyókxa nak Samaria, apteme nak chá'a apkelpeywa s'e: ‘Negásenneykekxeyk chá'a negko'o m'a aqsok apcháyókxa nak ma'a Dan’, Negásenneykekxeyk chá'a negko'o m'a aqsok kéláyókxa nak ma'a Beerseba.”