Amós 6 - Biblia Enxet

Israel kélmassésseyam

¹ ¡Énxet'ák laye, apheykha nak meyke élyetnakhayo apkelwáxok ma'a Sión! ¡Énxet'ák laye, apheykha nak chá'a meyke apkelakakxa m'a Samaria, apkelámha apmonye'e nak chá'a apkelókxa ekyawe kéláyo, apkelye'eykekxoho nak chá'a m'a israelitas!

² Kólmohok sa' ma'a Calné, kóllanok sa'; keñe sa' kólyeykhak kólmeyekxak ma'a Hamat tegma apwányam apyawe nak, tén sa' kólweywenták kólmeyenták ma'a Gat filisteos apchókxa nak. ¿Yeykhágweykmoya ektaqmalma kélókxa kéxegke xa apkelókxa nak? ¿Táseya kélókxa kéxegke, yagkaxnawok apkelókxa nak xa énxet'ák nak?

³ Megkólmenyeyk kéxegke kaxének kélwáxok ma'a ekhem ekmaso peya nak kawa', kélwagkassa'ak aqsa m'a wesse' peya nak enaqtawasagkohok kéxegke.

⁴ Kélheykegkek aqsa m'a néten taháno éltaqmalma élánamáxche nak yánnapóxeg apma'ák kélnáxegkáseykha, kólhagkok chá'a m'a néten nak ekpayhakxa, neyseksa kéllánéyak kélessawássessamo; kóltawagkok chá'a m'a nepkések apketkók apnaqmele, tén han ma'a weyke étkók;

⁵ kólpáwasha aqsa chá'a m'a yámámok; kóleykmasha chá'a m'a David, kóllanagkok axnancha'ák kélpáwasso;

⁶ kólmaha chá'a egheykok élyawe kólyenagkok ma'a vino, kólexpaqhaxchek chá'a m'a sokmátsa élmátsa agko' nak élpaqneyam élmomnáwa, ¡megkalyetnakhassamók kélwáxok ekmasagko m'a kélókxa!

⁷ Kéxegke sa' kélmonye'e kólnaqlakxak megkatnahakxa kélókxa, kamaskok sa' ekyennameykha exma neyseksa kélláneyak ektámáxche ekyawe.

⁸ Naqsók aptáha appeywa Wesse' egegkok, Dios ekha nak apyennaqte s'e: “Altaqnawhok ko'o m'a éleymáxkoho nak apkelwáxok Jacob énxet'ák apagkok; megkalchek agko' ewáxok ma'a kelwesse'e apxanák apkelyawe nak; agkések sa' ko'o tegma apwányam ma'a apkelenmexma nak, yetlo m'a ekyókxoho aqsok ekhéyak nak ma'a kañe'.”

⁹ Apkeleymékpek sa' agkok diez énxet xama tegma, esawhakpohok sa' eletsapok xa diez nak.

¹⁰ Awanhek sa' katnehek élmeneymáxche'. Apmeyk sa' agkok chá'a pók aphápak xama énxet yaqwayam etekkesek ma'a kañe' apxagkok. Sa' etnehek chá'a yának pók apha enxoho makham ma'a kañe' nak: “¿Yetnéya makham pók apxegexma exchep?” “Méko sa' etnehek yátegmowágkok ma'a pók nak.” Tén sa' etnehek yának se'e: “¡Ewanma', exénhok katnehek Wesse' egegkok apwesey!”

¹¹ Hakte Wesse' egegkok sa' yának kóllegássesagkohok ma'a énxet'ák apheykha nak tegma apkelyawe, tén han ma'a ketcheyetse nak, nápakha'a apketkók sa' etnekxak ma'a apyókxoho nak.

¹² ¿Apwancheya yenyahagkok yátnáxeg neyseksa meteymog? ¿Kélwancheya kólpeynchók xapop ma'a neyseksa wátsam ekwányam? ¡Pánaqte segaqhamo kélteméssáseykekxak kéxegke m'a ekpéwomo kéllánekxésso nak amya'a m'a énxet'ák, keñe m'a ektekkesso nak chá'a nentémakxa ekpéwomo kéltemessáseykekxo ekmáske!

¹³ Kaqhok chá'a kéxegke kalpayhekxak kélwáxok, kóltéhek chá'a kélpeywa s'e: “Nélyennaqte egagko' negko'o keñamak negweteya nélyennaqte.”

¹⁴ Israelitas, kóltaqmelchesho kéllányo; aptáhak appeywa Wesse' Dios ekha apyennaqte s'e: “Alenmexchesek sa' ko'o kéxegke xama apchókxa, yaqwayam sa' enaqtawasagkohok kélyókxoho nak, eyeynamo m'a néxa xapop nak nexcheyha, ekweykekxoho m'a néxa xapop nak nepyeyam.”