Amós 4 - Biblia Enxet

¹ Kóleyxho sa' se'e kelán'ák nak Samaria, kélhémo nak weyke eknaqmele Basán, kélyentaxnéssesso nak chá'a apheykha m'a meyke nak aqsok apagkok, kélnaqtawáseykegkoho nak chá'a m'a apkelmopyóseka nak, kéltémo nak chá'a elsantagkasek anmen yámet égmenek ma'a kélnaqteyegka'a, yaqwayam kólyenagkok.

² Naqsók aptemessásak appaqmeta Dios Wesse' egegkok apxénákpekxoho apagko' apteme aptaqmalma aptáha s'e: “Xegakmek ekhem yaqwánxa kólnaqlakxak kéxegke kólyaqxák ma'a sawo élhaxe, keñe sa' kélketchek kólásekkesek sókhaxe.

³ Kóléwekxak sa' kólántépok ma'a ekyagqaxe nak kélhaxtegkesso tegma, sa' kólchexakhagwók ma'a egkexe Hermón nak.” Wesse' egegkok apxeyenma xa.

Dios apkelwanyeykha énxet'ák

⁴ “Kólmeyekxa sa' ma'a Betel, tén han ma'a Guilgal, ¡kóllanák sa' megkólya'assáxma, kólyánchesagkoho sa' kélláneyak kéltémakxa ekmaso! Kólsakxa sa' chá'a axto'ók ma'a kélnaqtósso kélnapma, tén han ekwayam nak chá'a diez ekyókxoho aqsok kélagkok yókxoho ántánxo ekhem.

⁵ Kólwet sa' kelpasmaga meyke nak kempáseyak kélmésso naqsa nak chá'a eñama kélmésso ekxeyenma kélwáxok, kóltennasák nahan ekyókxoho yókxexma m'a aqsok kélmésso naqsa ekxeyenma agko' nak kélwáxok yaqwayam kólmések, hakte cháxa ekleklamo nak chá'a kélwáxok kéxegke kóltéhek xa ektáha nak.” Wesse' egegkok apxeyenma xa.

Kéllegassáseykegkók eykhe énxet'ák Israel makke elya'ásegweykmok

⁶ “Énnáhakkassegkek axta eykhe ko'o kéxegke meyk ekyókxoho tegma apkelyawe kélagkok nak; meyke kéltéyak axta eykhe ekteméssessók ekyókxoho kélheykegkaxa nak, ¡axta eyke hélye'eykekták ko'o kéxegke!” Wesse' egegkok apxeyenma xa.

⁷ “Axta nahan wáphássessók ekmámeye ekweykmoho apqántánxo pelten amonye' kélnakxo m'a aqsok ekyexna kélcheneykekxa. Xama tegma apwányam axta aqsa chá'a ko'o ekmáméssók keñe chá'a pók tegma apwányam maltémo kamme'; xama yókxexma axta aqsa chá'a kamme' keñe axta chá'a mók yókxexma ekyamáya eñama meyke yegmen;

⁸ esawhekxohok axta chá'a elweynchamha tegma apkelyawe énxet'ák etegyagkok yegmen, ketsék axta eyke chá'a elweta', megkamasseksek axta chá'a hem élnapma, ¡axta eyke hélye'eykekták ko'o kéxegke!” Wesse' egegkok apxeyenma xa.

⁹ “Éyhayak axta ko'o kéxegke éxchahayam ekmexanma, yetlo askok, séltémo kalyamasagkok ma'a aqsok kélcheneykekxa, tén han ma'a anmen yámet kélcheneykekxa nak, aptamchek axta sawa' m'a higo yámet kélcheneykekxa, tén han ma'a olivos yámet, ¡axta eyke hélye'eykekták ko'o kéxegke!” Wesse' egegkok apxeyenma xa.

¹⁰ “Eyhayak axta negmasse ekmaso, seyáphassama axta m'a Egipto; éltémók axta eletsapok wokma'ák kélagkok ma'a neyseksa kempakhakma, eyhayók axta elmagkok yátnáxeg kélchánte m'a kélenmexma nak; émpassegkek axta ekpaqneyam ektahapma kélhapák ma'a kélpakxeneykegkaxa axta. ¡Axta eyke hélye'eykekták ko'o kéxegke!” Wesse' egegkok apxeyenma xa.

¹¹ “Ekmaso agko' axta ko'o ekmassésseykmok kéxegke, ekhawo sekteméssessamakxa axta sekmassésseykmo m'a Sodoma tén han Gomorra; máxa átex axta kéltemék kélhaxyawassól'a neyseksa táxa, ¡axta eyke hélye'eykekták ko'o kéxegke!” Wesse' egegkok apxeyenma xa.

¹² “Sa' atnéssesek xépxa xa Israel, ekhawo nak xa; ¡elánekxa sa' aptáhakxa yaqwayam elanyexagkok ma'a Dios apagkok! hakte peyk atnéssesek xép xa ektáha nak.”

¹³ Wesse' egegkok, apkelane nak meteymog élwenaqte tén han éxchahayam, apya'assásegwayam nak aqsok apmáheyo elának énxet, aptemessáseykekxoho nak han élseyéxma m'a ekyaqtéssóxma, apweychámeykencha'awól'a m'a yókxexma ektáhakxa nak netnók agko' xapop keso náxop, Wesse' egegkok, Dios ekha apyennaqte: cháxa apwesey xa.