2 Samuel 22 - Biblia Enxet

David apmeneykmasso eñama apmallanma

¹ Apmeneykmássessek axta David Wesse' egegkok se'e negmeneykmasso nak, apwagkasa axta teyp Wesse' egegkok megyahayo emok ma'a Saúl, keñe han ma'a apyókxoho apkelenmexma nak.

² Aptáhak axta s'e: “Wesse', xép apteme setaqmelchesso, sekyexánegweykekxexa', semallahanchesso,

³ Dios ahagkok, semasma apyennaqte, seyáhakkásamáxche', sewagkasso teyp apmopwána, xép apteme sekyexanmomakxa netnók agko', tén han sekheykekxexa nak chá'a eyxanmok, xép apteme sewagkasso teyp. ¡Ewagkassegkek teyp nepyeseksa m'a énxet'ák apkelyennaqteyáseykha nak chá'a apyempe'ék!

⁴ Wesse' egegkok, payhawók xép kólpeykesho'; ekwóneyha agkok chá'a, hewagkasek chá'a teyp nepyeseksa sélenmexma.

⁵ “Ewakhayak axta ko'o m'a élyaqyahayam segaqhamo nak; eyáyak axta ko'o m'a yegmen ényé ekmassésseykmohol'a ekyókxoho aqsok.

⁶ Ewakhayak axta ko'o m'a nétsapma; ¡ketók axta ko'o semomakxa m'a kelhanma segaqhamo nak!

⁷ Ekwóneykha axta ko'o Wesse' egegkok ma'a ekyentaxnama axta setnamakxa', éltémok axta hepasmok Dios ahagkok, aplegayók axta ko'o sélmaxnagko m'a ekpayho nak tegma appagkanamap apagkok; ¡aplegayak axta sekwóneykha!

⁸ “Yetlómok axta ekyawheykha xapop ekyennaqte agko': kelyawheykha axta m'a ekméyak nak néten; Wesse' egegkok aplo axta kelyawheyáseykha.

⁹ Apwéhek axta teyapmak ekpánma, keñe apátog ekteyapma táxa segaqhamo nak; ¡apátog axta kelánteyapmak átex éláléweyak nak!

¹⁰ Apmeykáseykekxeyk axta néten, keñe axta apweyweykento. ¡Yentexek axta yaphope ekpésyam ma'a kóneg apkenmágkaxa axta!

¹¹ Apchántegkek axta m'a xama apchásenneykha ekha nak apxempenák, keñe axta apchampaya; apwetamakpek axta eksama m'a éxchahayam,

¹² apmeykha axta aptéma appakxanma m'a ekyáqtessóxma ekyentaxno ekwakhaya axta, tén han yaphope ekpésyam ekláneyo nak yegmen.

¹³ Xama apkelyenma ekyennaqte agko' axta teyapmak ma'a apkenmágkaxa axta; keláléweykenteyk axta ekpalleykento átex.

¹⁴ “Kextegyawomchek axta appeywa Wesse' egegkok meyke nak Ekhémo m'a néten:

¹⁵ apkelnextegkessek axta yágke aktek apagkok tén han apkelyenma, apkexpánchessegkek axta sélenmexma.

¹⁶ Yáxña'akxoho axta tamheykekxak ma'a neysekso nak wátsam; negwetayók axta m'a awhak nak xapop, eñama Wesse' egegkok appeywa ekyennaqte agko', tén han apwátekhapma ekyennaqte.

¹⁷ “Ey'assáseykmek axta ko'o apmek Dios, etekkessegkek axta m'a wátsam ekyawe agko' nak.

¹⁸ Ewagkassegkek axta teyp nepyeseksa m'a sélenmexma apkelyennaqte setaqnagkama axta, apmelyeyha'ak axta m'a axta axnémók ko'o.

¹⁹ Étámeykmek axta ko'o m'a neyseksa ekyentaxno sekha, epasmomchek axta eyke m'a Wesse' egegkok:

²⁰ Etekkessegkek axta m'a eyesagkexa axta; ¡ewagkassegkek axta teyp hakte eyásekhayók ko'o!

²¹ Egkéssegkek axta ko'o ekyánmaga Wesse' egegkok ekpayhawo nak hegkések, eñama eyáxñeyo sektémakxa,

²² hakte ekyetlamchek axta ko'o m'a Wesse' egegkok nak ámay apagkok; ¡mayenseykmok xama enxoho m'a Dios ahagkok!

²³ Kaxénmakha chá'a ewáxok ma'a ekyókxoho apchánamakxa nak antéhek; ¡meytnakhásseykmok xama enxoho m'a segánamakxa apagkok!

²⁴ Méko agko' ko'o aqsok ekmaso sélane nápaqtók ma'a; ekyamasmeyk ma'a nentémakxa ekmaso.

²⁵ Egkéssegkek ekyánmaga Wesse' egegkok eñama eyáxñeyo sektémakxa nápaqto'.

²⁶ “Wesse' egegkok, meyenyawha chá'a exchep ma'a énxet meyenyaweykha nak chá'a, kataqmalmakha chá'a apwáxok elanok ma'a énxet aptaqmelchásamákpoho nak chá'a,

²⁷ exekmóshok eyke chá'a exchep apteme eyáxñeyo aptémakxa m'a énxet eyáxñeyo nak aptémakxa, ey'asagkohok eyke chá'a exchep aptémakxa m'a énxet apmopwána nak appeywa elának pók.

²⁸ Elwagkashok eyke chá'a exchep teyp ma'a megkaleymáxkoho nak apkelwáxok, apkelanawók agkok chá'a exchep ma'a éleymáxkoho nak apkelwáxok, keñe etnessásekxak chá'a mékoho.

²⁹ Wesse' ahagkok, xép apteme élseyéxma ahagkok; Dios ahagkok, xép sélsássesso exma m'a ekyáqtésakxa exma nak.

³⁰ Epasmeyk sa' agkok xép, aktamagkok sa' sélenmexma, almallanagkok sa' ma'a meteymog kélhaxtegkesso nak tegma apkelyawe apagkok.

³¹ “Péwók ma'a Dios ámay apagkok; payhawók megkólya'ássemek ma'a apxeyenma nak elának Wesse' egegkok. ¡Eltaqmelcheshok chá'a Dios ma'a apyókxoho énxet'ák ektáha nak chá'a apcháyo!

³² ¡Dios apteme wánxa xama, méko pók. Méko mók aqsok kéláyókxa awanchek hentaqmelchesek!

³³ Dios apteme sekyexánegweykekxexa apyennaqte, tén han setnéssesso ekpéwomo sektémakxa,

³⁴ cha'a setnéssesso ko'o meyke sekpelápegwayam ma'a ektémól'a xenaq, cha'a segkésso han sekmowána atnamha m'a netnók agko' nak,

³⁵ cha'a seltámésso han yaqwayam wampakhak ma'a, tén han segkésso sekyennaqte, yaqwayam weykesek axát'ák ma'a yágke sawo ekyexwase nak.

³⁶ “Xép setaqmelchesso, tén han sewagkasso teyp, ektaqmeleykha apwáxok sélányo keñamak setaqmelchessessama sekha.

³⁷ Eyaxñássessegkek chá'a sekmaheykegkaxa', megkaltáxñek chá'a emagkok.

³⁸ “Élamheykegkek axta ko'o m'a sélenmexma, keñe sekmassésseykmo, natámen seksawhoma axta séxyeykmo makham.

³⁹ ¡Eksawhomók axta sekmassésseykmo! ¡Nápakha'a apketkók axta ekteméssessók! Axta enaqxétekhágweykmok. ¡Apkelyaqneneykegkek axta ekpayhókxa sénmágkaxa!

⁴⁰ Xép axta segkésso sekyennaqte sémpakhe; xép axta apkeltémo elháxahagkok emonye' m'a énxet'ák sélenmexeykha axta chá'a,

⁴¹ tén han apkeltémo yenyahagkok emonye' m'a sélenmexma nak. Cháxa sekmassésseykmo axta ko'o m'a ektáha axta chá'a setaqnagko.

⁴² Aptegyeykegkek axta eykhe ekpasmo, méko axta eyke ekpasmoma; apwóneykha axta eykhe chá'a Wesse' egegkok, axta eyke yátegmoweykegkok.

⁴³ ¡Ektepelchamók axta ektémól'a yagkamex náxop! ¡Élteyammeykha axta, ektémól'a ólteyammaha yelpa' m'a ámay!

⁴⁴ Emallahanchessegkek axta nepyeseksa m'a énxet'ák apkelnápomákpo axta chá'a énxet'ák ahagkok, etnéssessegkek axta aqsa makham sémha emonye' nepyeseksa m'a pók aptémakxa énxet'ák, éltemessáseykha axta ko'o m'a énxet'ák megkatnaha nak sélweteykxa'.

⁴⁵ Apkelleg'ak agkok chá'a sekpeywa, hélyahakxohok chá'a; kaltaqmalmakha chá'a apkelpeywa hexének ma'a énxet'ák apkeleñama nak mók nekha',

⁴⁶ kalyelqaxchek chá'a apkelwáxok hélanok énxet'ák apkeleñama nak mók nekha, elpexyennók chá'a elántépok ma'a apkelyexanmomakxa nak chá'a.

⁴⁷ “¡Megyetsepek chá'a Wesse' egegkok! ¡Apcheymákpoho sa' chá'a kólteméssesek ma'a setaqmelchesso nak chá'a! ¡Meyke ekhémo sa' chá'a kólteméssesek ma'a Dios sewagkasso nak chá'a teyp, tén han semasma nak chá'a!

⁴⁸ Cha'a apteme Dios seyaqmagkassáseykekxa nak chá'a mók sélteméssessamakxa m'a, tén han sélmésso m'a énxet'ák, yaqwayam atnehek séláneykha.

⁴⁹ Ewagkassegkek teyp nepyeseksa m'a sélenmexma nak, cham'a sénmexeykha sektámeykmo nak chá'a ko'o. ¡Wesse', ewagkassegkek ko'o teyp xép, nepyeseksa m'a énxet'ák apkelyennaqteyáseykha nak chá'a apyempe'ék!

⁵⁰ Cháxa keñamak sélpeykessamo nak chá'a exchep, nepyeseksa m'a pók aptémakxa énxet'ák, tén han sekmeneykmassama chá'a negmeneykmasso xép apwesey.

⁵¹ Apméssegkek xép apkelmalláneyak ekxámokma m'a wesse' apwányam ektáha axta apkelyéseykha; yásekhohok chá'a exchep ma'a David, tén han ma'a aptawán'ák neptámen.”