2 Samuel 1 - Biblia Enxet

David aplege amya'a apketsapma Saúl

¹ Apmeyánteyk axta makham David ma'a Siclag, natámen apmenxenma amalecitas, cham'a natámen axta apketsapma m'a Saúl, ánet ekhem axta han apheykta m'a.

² Keñe ektáha ántánxo ekhem apwokmo xama énxet ma'a appakxanmakxa axta Saúl, apkelyeptamap apkelnaqta, tén han xapop ánek apqátek, magkenatchesso élapwokmo. Xama axta apwokmo m'a aphakxa nak David, apháxahánteyk axta ekwokmoho aptekxekwa'akto nápat xapop apxekmósa apcháyo.

³ Axta aptáhak apkelmaxneyáncha'a David: —¿Háxko apkeñamakxa' exchep? —Ényeyk ko'o sekxeganakmo m'a apkelpakxeneykegkaxa nak israelitas —axta aptáhak apchátegmowágko m'a énxet nak.

⁴ —¿Yaqsa ektáha? ¡Héltennés! —axta aptáhak apcháneya David. —Apkenyahágkek émpakháxchexa m'a sẽlpextétamo egagkok, apxámok han aptekyawa —axta aptáhak apchátegmowágko m'a énxet nak—. ¡Apketsekkek han Saúl yetlo apketche Jonatán!

⁵ —¿Yaqsa ektáha apya'ásegkoho nak apketsapa m'a Saúl tén han apketche Jonatán? —axta aptáhak apkelmaxneyáncha'a David ma'a kélásenneykha apseykentegkesso axta amya'a.

⁶ Axta aptáhak apchátegmowágko s'e: —Ekmahágkek axta aqsa ko'o sénegwokmo m'a egkexe nak Guilboa, ekwet'ak axta Saúl apyepetcha'a sawhéwa apagkok, ketók axta han aptahanyeykekxexa m'a apkelchánte nak yátnáxeg apkelyenyawasso, tén han ma'a yátnáxeg nak apkelchánte apkelenmexma axta.

⁷ Yetlókok axta han appeynchamakpoho neptámen, keñe sét'a sewónéncha'a. Ektemék axta han ma'a aptáhakxa axta.

⁸ Keñe aptáha sélmaxneyáncha'a s'e: ¿Yaqsa exchep? Keñe séltennasa ko'o sektáha amalecita.

⁹ Keñe apkeltamho eypetchegwomho', apkeltamho waqhek, hakte aplegágkók apagko' axta ekmáske, axta eyke yetsapak makham.

¹⁰ Ekyepetchegwokmók axta ko'o m'a keñe seyaqha, hakte ekyekpelcheyk axta meweynchamha chá'a natámen kélyetxaqxo. Tén axta seklekkesa apketchesso apqátek élyenma, keñe han aptete apmek apketchesso axta m'a apaktog, yaqwayam alsantagkasek xép wesse' ahagkok.

¹¹ Keñe axta David tén han ma'a apkelxegexma'a nak, apkelyepteygko apkelnaqta magkenatchesso éllapwámegko,

¹² apkellekxagweyha axta eyaqha apkelwáxok apketsapa m'a Saúl, tén han apketche Jonatán, tén han ma'a ektáhakxa axta apmenxenamap ma'a israelitas, Wesse' egegkok nak sẽlpextétamo apagkok, axta han etókagkok aptéyak ekwokmoho ekyáqtésa.

¹³ Tén axta aptáha David apkelmaxneyáncha'a m'a wokma'ák apseykentegkesso axta amya'a: —¿Háxko exchep apkeñamakxa'? —Mók nekha ko'o eñamak, amalecita ko'o —axta aptáhak apchátegmowágko m'a.

¹⁴ —¿Yaqsa ektáha megyeka nak apchaqha m'a wesse' apwányam, apkelyéseykha axta m'a Wesse' egegkok? —axta aptáhak apcháneya David,

¹⁵ apwóneyha axta xama apxegexma, keñe aptáha apcháneya s'e: —¡Yaqha sa' se'e! Axta han yeyssákxak apkelyetxaya m'a amalecita, apchaqhak axta,

¹⁶ axta aptáhak apcháneya David se'e: —Apsexnánémap apagko' xép apmatñà, hakte xép apagko' xeyk apxénak ektáha apteme apchaqhe m'a wesse' apwányam, ektáha axta Wesse' egegkok apkelyéseykha.

David élapwayam eñama apketsapma Saúl tén han Jonatán

¹⁷ Apmeneykmássek axta David se'e negmeneykmasso nak senlapwayam, eñama apketsapma Saúl tén han Jonatán,

¹⁸ apkeltamhók axta han kólxekmósek ma'a énxet'ák apheykha nak Judá. Keso negmeneykmasso senlapwayam nak, yetnók ektáxésamaxche m'a Weykcha'áhak Apagkok nak Énxet Appéwomo:

¹⁹ “¡Oh, Israel, massegwokmek xép ektémakxa apcheymákpoho m'a egkexe apagkok nak! ¡Aptekyókek ma'a énxet'ák megyeye nak elmahagkok eyesagkexa'!

²⁰ Ná kóltennasha aqsa m'a énxet'ák apheykha nak Gat, nágkóltennaha m'a ámay nak Ascalón, yaqwayam enxoho megkalessawaksók ma'a kelán'ák nak filisteas, tén han megkalnextegmakha néten kalátsaha xa kelán'ák megkalya'áseyak nak Dios.

²¹ “¡Egkexe Guilboa, tásek sa' kaxwók kéxegke megkapálwateyk ekmámeye tén han yálye, hakte yókxexma nentekyómakxa kéxegke! Axta payhok kélteyammeykegkaxa apkeláhakkásamap ma'a énxet'ák apkelyennaqte axta. Axta massegweykmok élyenma Saúl apcháhakkásamap ma'a.

²² “Melwateyk axta chá'a Saúl tén han Jonatán, megkaltexnáxko enxoho chá'a éma sókwenaqte apagkok tén han yágke, pexmok apagkok ma'a kempakhakma yapmeyk apkelyennaqte nak.

²³ “Apkelásekhamakpók axta han xa apqánet nak Saúl tén han Jonatán, mekxeykpók axta chá'a, ekwokmoho apkeletsapa. ¡Apmelyeyha'ak axta yenyahagkok, apyeykhásseykmók axta m'a náta ekyawe nak! ¡Apmelyeyha'ak axta, apyeykhásseykmók axta yámakméwa!

²⁴ “¡Kóllekxagwaha kelán'ák nak Israel, eñama apketsapma Saúl, apkelmeyáseykegko axta chá'a yaqwayam kólántaxnekxak ma'a apáwa hómáyok, tén han ma'a apáwa apkeláxñe nak, apkelnáxegkáseykencha'awo axta chá'a apkelméssama m'a aqsok éltaqmalma élánamáxche nak sawo ekyátekto élmomnáwa!

²⁵ ¡Aptekyókek énxet'ák megyeye nak elmahagkok eyesagkexa m'a émpakháxchexa nak! ¡Apmátegweykmek Jonatán ma'a egkexe netnók agko' nak!

²⁶ “¡Élekxagweykha ko'o ekxeyenma ewáxok xép Jonatán, eyáxeg seyásekhayo! ¡Tásók agko' axta exchep setnéssessamakxa'! Yeykhágweykmók xép seyásekhayo m'a ekweykenxal'a segásekhayo kelán'a.

²⁷ ¡Aptekyókek ma'a énxet'ák megyeye nak elmahagkok eyesagkexa'! ¡Kélsawheyásawók ma'a apkelmeykha apkenchesso nak chá'a kempakhakma!”