1 Crónicas 16 - Biblia Enxet

¹ Kélsákxeyk axta Dios yántéseksek apagkok kélpekkenwokmo m'a kañe' kélpakxanma, apkelánéssamakxa axta David yaqweykenxa keytek. Yetlókok axta han kélmésso aqsok ektekyawa kélwatno, keñe han aqsok ektekyawa segwetassamo nak sẽlásekheykekxoho nápaqtók Dios.

² Xama axta appenchesa David apkelmésso, keñe apkelmaxnéssásegko apkeltamho epasmok Dios ma'a énxet'ák nak, yetlo apxeyenma Wesse' egegkok apwesey,

³ keñe axta apkelmeyásegko chá'a apyókxoho israelitas, énxet'ák, kelán'ák, xama pán, xama torta apkelánamap nak yátapa'ag apyexna kélyaqyeyáseykekxa', tén han anmen yámet ekyexna nak kélyamasso kélyaqyeyáseykekxa'.

⁴ Apteméssásegkek axta han David nápakha énxet'ák levitas yaqwayam etnehek apkeltamheykha m'a ekyetnamakxa nak Wesse' egegkok yántéseksek apagkok, yaqwayam enxoho elanagkok chá'a élxeyenweykekokxoho apkelwáxok, tén han egkések chá'a ekxeyenma apwáxok, keñe han elpeykeshok ma'a Wesse' egegkok, Dios apagkok nak Israel.

⁵ Asaf axta apkemha apmonye' apagkok xa énxet'ák nak, keñe aptétéyak ma'a Zacarías; tén han ma'a Jeiel, Semiramot, Jehiel, Matatías, Eliab, Benaías, Obed-edom tén han ma'a Jeiel, cháxa apteme axta apkelpáwasso yát'axpog tén han arpa xa énxet'ák nak. Asaf axta eyke apkelpáwasso m'a ekho nak sokpayhe étkók élyaqye,

⁶ keñe m'a appasmo apkelmaxnéssesso Dios énxet'ák apagkok Benaías tén han Jahaziel, cháxa ektáha axta chá'a apkelpáwasso apkelaqkahasso yókxoho ekhem ma'a ekyetnamakxa nak yántéseksek ekhémo mók nélpaqhetchásamáxkoho Dios.

David apmeneykmasso ekxeyenma apwáxok Wesse' egegkok

⁷ Cháxa ekhem nak apkeltamhókxa axta David enneykmássesek Wesse' egegkok ma'a Asaf yetlo apkelxegexma'a, negmeneykmasso negmésso ekxeyenma egwáxok Dios:

⁸ “¡Kólmés ekxeyenma kélwáxok Wesse' egegkok! ¡Kólxén ma'a apwesey nak! Kóltennasha énxet'ák ma'a aqsok apkelane nak.

⁹ Kólmeneykmásses negmeneykmasso. ¡Kólxén ektémakxa nak élyawe aqsok apkelane!

¹⁰ “Kaqheykha kélwáxok ma'a apwesey ekpagkanamaxche nak. ¡Kalpayhekxoho kélwáxok kéxegke, kélchetamso nak chá'a Wesse' egegkok!

¹¹ Kólyo'ókxa chá'a Wesse' egegkok, tén han ma'a apmopwána nak, kólyo'ókxa chá'a Wesse' egegkok yókxoho ekhem.

¹² Kaxénwakxoho chá'a kélwáxok ma'a ektémakxa axta aqsok ekyawe apkelane, cham'a aqsok sempelakkasso nak agweta', tén han ma'a apxeyenma axta elyekpelkohok énxet'ák:

¹³ kéxegke Israel aptawán'ák neptámen apteme axta apkeláneykha, kéxegke Jacob axta apketchek apteme axta apkelyéseykha.

¹⁴ “Cham'a apteme Dios Wesse' egagkok ma'a; ¡sawheykekxók han apteme Wesse' apwányam keso náxop!

¹⁵ Megkamassegwomek chá'a ekxéneykha apwáxok ma'a ekhémo mók nélpaqhetchásamáxkoho apagkok, tén han ma'a appeywa apmésso axta megkatnégwayam néxa',

¹⁶ cham'a ekhémo mók apkelpaqhetchásamákpoho apméssama axta m'a Abraham, apteméssessama axta naqsók elanaksek ma'a Isaac

¹⁷ apkelánéssama axta segánamakxa m'a Jacob, apteméssessama axta ekhémo mók apkelpaqhetchásamákpoho meyke néxa m'a Israel,

¹⁸ cham'a aptéma axta apkenagkama s'e: ‘Agkések sa' xép xapop Canaán, apxaweykekxa ekpayhawo nak exkekxa'.’

¹⁹ “Apqántawók axta eykhe m'a, máxa mók nekha apkeleñama axta aptamheykegkok apheykencha'a xa yókxexma nak,

²⁰ apkelmaheykegkek axta chá'a mók apheykegkaxa, keñe han mók yókxexma,

²¹ axta eyke yahayók Dios enaqtawasagkohok xama énxet enxoho; weykmók axta han aptéma apkelanagkama kelwesse'e apkelwányam se'e:

²² ‘Nágkólteméssesha aqsa ektáha nak ko'o sélyéseykha, nágkólnaqtawasagkoho han ma'a apkellegasso nak sekpeywa.’

²³ “Kólmeneykmásses Wesse' egegkok, kélyókxoho kélheykha nak keso náxop; kólxén chá'a yókxoho ekhem apteme segwagkasso teyp.

²⁴ Kólxén ektémakxa apcheymákpoho tén han ektémakxa aqsok sempelakkasso agwetak apkelane nápaqta'awók ma'a apyókxoho énxet'ák, tén han ekyókxoho yókxexma,

²⁵ hakte Wesse' egegkok apteme apwányam apagko', payhawók ólteméssesek apcheymákpoho, apcheymáp nahan neyseksa m'a ekyókxoho aqsok ekha nak élmowancha'a.

²⁶ Mékoho m'a aqsok apcháyókxa nak chá'a pók énxet'ák, Wesse' egegkok axta eyke apkelane néten.

²⁷ ¡Yetnegkek ekyawe agko' élyenma m'a aphakxa nak! ¡Yetnegkek apmopwána tén han ekpayheykekxa egwáxok ma'a tegma appagkanamap apagkok nak!

²⁸ “Kóltemésses apcheymákpoho Wesse' egegkok, énxet'ák yetlo kélnámakkok, kóltemésses nahan ekha eyeymáxkoho m'a ektémakxa nak apmopwána Wesse' egegkok;

²⁹ kólteme kéláyo Wesse' egegkok ekpayhawo nak kólteméssesek; kólántex chá'a aphakxa nak yetlo kélseykekxa m'a aqsok kélmésso naqsa; kólpeykesho chá'a Wesse' egegkok ma'a ekpayho nak tegma appagkanamap apagkok aptaqmalma.

³⁰ ¡Apyókxoho énxet'ák sa' elpexyennók apmonye'! Apyennaqtéssamók axta appekkenma nélwanmeygkaxa yaqwayam enxoho megkayawheykha.

³¹ ¡Kalpayhekxa kélwáxok énxet'ák kélheykha nak néten tén han kélheykha nak keso náxop! Sa' etnehek énxet'ák se'e: ‘¡Wesse' egegkok apteme wesse' apwányam!’

³² ¡Kapáwa' awáxok wátsam ekwányam tén han ma'a ekyókxoho ekhéyak nak kañe'! ¡Kapayhekxa awáxok yókxexma, tén han ma'a ekyókxoho élleykha nak awáxok!

³³ ¡Kólwehesha kólátsaha yenta'a élyawe élámha nak naxma nápaqtók Wesse' egegkok, apxegakmo nak yaqwayam etnehek Wesse' apwányam keso náxop!

³⁴ “Kólmés ekxeyenma kélwáxok Wesse' egegkok, hakte tásek apwáxok ma'a, megkamassegwomek chá'a segásekhayo.

³⁵ Kólteme sa' kólának se'e: ¡Oh Dios, apteme nak segwagkasso teyp, hẽlwagkas negko'o teyp! ¡Heganchásekxa', hẽlmallahanches nepyeseksa m'a pók aptémakxa énxet'ák, yaqwayam sa' ólpeykeshok apwesey ekpagkanamaxche', yaqwayam sa' kalpayhekxak egwáxok ólpeykeshok xép!

³⁶ ¡Apcheymákpoho sa' kólteméssesek Wesse' egegkok, Dios apagkok nak Israel, megkatnégwayam néxa'!” Keñe axta apyókxoho énxet'ák aptáha apkelátegmowágko s'e: “¡Katnahagkok sa'!”, yetlókok axta han apkelpeykessamo Wesse' egegkok.

³⁷ Cháxa aptáhakxa axta David aphéssekmo Asaf yetlo m'a apkelxegexma'a nak, cham'a ekyetnamakxa nak yántéseksek ekhémo mók nélpaqhetchásamáxkoho apagkok nak Wesse' egegkok, yaqwayam etnehek chá'a apkeltamheykha yókxoho ekhem megkatnégwayam néxa kélámenyého enxoho chá'a.

³⁸ Keñe axta apkelmésa han apkeltamheykha sesenta y ocho énxet yaqwayam etnehek apkelxegexma'a chá'a m'a Obed-edom. Tén ma'a Obed-edom, apketche nak Jedutún, keñe han Hosá, apkeláneyákpo etnahágkok apkeltaqmelchesso átog.

³⁹ Keñe m'a Sadoc yetlo m'a apkelxegexma'a apkelmaxnéssesso Dios énxet'ák apagkok, apkeltamho etnahágkok apkeltamheykha m'a tegma kélpakxanma apagkok nak Wesse' egegkok, ekpayho nak ma'a tegma appagkanamap Gabaón,

⁴⁰ yaqwayam enxoho egkések chá'a yókxoho ekhem aqsok kélnaqtósso kélwatnésso nak chá'a Wesse' egegkok ma'a ekwatnamáxchexa nak aqsok, apkelxawágwayam nak chá'a yaqwayam etnéssesek xa ektáha nak, axto'o tén han taxnám, ekhawo m'a ektémakxa axta eknaqtáxésamaxche Wesse' egegkok segánamakxa apagkok, appekkencháseykekxa axta apkeltémókxa chá'a etnahágkok ma'a Israel.

⁴¹ Kélpáxaqtéssek axta han ma'a Hemán tén han Jedutún, keñe han ma'a nápakha ektáha axta apkelyésamap tén han apkelxénamap yaqwayam elmeneykmaksek: “Kólmés ekxeyenma kélwáxok Wesse' egegkok, hakte megkamassegwomek ma'a segásekhayo nak.”

⁴² Cháxa ektáha axta chá'a apkelpáwasso apkelaqkahasso, tén han ekho nak sokpayhe étkók élyaqye, keñe han mók ektémakxa nak chá'a aqsok kélpáwasso, yaqwayam étlókasek ma'a kélmeneykmasso eñama nak Dios. Átog axta eyke apkeltaqmelchesso m'a Jedutún nak apketchek.

⁴³ Keñe axta natámen apkeltaqháwo apxanák ma'a apyókxoho nak, aptaqhákxeyk axta han apxagkok ma'a David, yaqwayam enxoho exnakxohok xamo' ma'a apketchek.