SALMOS 42 - Enhlit Bible

LIBRO II Salmo 42 - 72 Actemaclha siyayo Visqui ingac

¹ Inquilipvocmec evalhoc sitamsama lhip o Dios. Malha popyit ayajem acnim apquitamsama yingmin.

² Avanjec aclhanma evalhoc Visqui ingac aptomja apyimnatescama ingnenyaoc. ¿Co sat acvam ovoclhac apnaclha Visqui ingac?

³ Avanjec mataa sicvinama, am omajayac otoc acnim anco najan alhtaa. Ayinyema siclingay mataa amyaa: —¿Jalhco apna Dios lhip apmasma? — apquiltomjac mataa seyanya.

⁴ Naysicsa mepqui sictamilquisquiyam evalhoc inyasingveclhoc evalhoc actemaclha nano. Actemaclha ninlhingam ninlhamoclhojo sicnalayclha Dios tingma pac. Actemaclha acyivey ningitsovascama najan actemaclha ningayo Visqui ingac. Fiesta acvanyam alhta intomjac.

⁵ ¿So actema acmayovsa mataa evalhoc coo? ¿So actema aliclhanveycam mataa evalhoc? Pac olinlhanmojoc sat, otnejic sat siyayo Dios aptomja Visqui ajac najan sevomquiscama tap.

⁶ Ayovsec mataa evalhoc coo, inyitnam ajatic lhip sictiyascam alhta vatsam Jordán, sictiyascam inquilhe Hermón najan Mizar.

⁷ Inlingalhquic actemaclha alvata congnoc anco. Ayilhtingyovam actiyapmaclha yingmin. Epalingvoctac actiyapmaclha yingmin, lhip alhta apcapajascama.

⁸ Eyasicjavoc coo acnim anco Visqui ajac. Acminaycmasquic coo mataa alhtaa. Almalhnaquic coo mataa Visqui ingac aptomja apyimnatescama enquenyic.

⁹ Actomjac coo siyanya Visqui semasma: —¿Soctomja selvoncacmo nac lhip? ¿Soctomja acyitnocjavo nac evalhoc? ¿Soctomja acyajapo nac evalhoc ayinyema cotnaja ingmoc? — alhta actomjac coo.

¹⁰ Malha acmasca evalhoc intomjac siclingaycamco selvennéycam cotnaja ingmoc. Apquiltomjac mataa seyanya: —¿Jalhco apna Dios lhip apmasma? — apquiltomjac mataa.

¹¹ ¿So actema acmayovsa mataa evalhoc coo? ¿So actema aliclhangveycam mataa evalhoc? Pac olinlhanmojoc sat, otnejic siyayo Dios, aptomja Visqui ajac najan sevomquiscama tap.