SALMOS 137 - Enhlit Bible

Actemaclha naysicsa ningmomalhca

¹ Ningnec alhta nicja vatsam tingma Babilonia. Avanjec alhta ningyapcalhem aclhanvayclho ingvalhoc tingma ingac Sión.

² Ningilquilhnec alhta netin yamit arpa actemaclha yatalhpong. Netin yamit alimja alhta nipyesicsa tingma.

³ Apquililtamjoc alhta elaylhojo ningminaycmascama apquiltomja singilmam. Apquililtamjoc alhta yoyam ongilitsovacsojo apquiltomja apquilasquiscama ingyimpeoc. Apquiltomjac alhta singilanya: —Elminaycmas sat ningminaycmascama aclhanma tingma Sión — alhta apquiltomjac.

⁴ ¿Ingvanqui ya ongilminaycmacsic cotnajaclha ningaoclha? — intomjac ingvalhoc.

⁵ Inmasquec sat ancoc aclhanma ingvalhoc tingma ingac Jerusalén. Comascoc sat actemaclha ningyimnatem, malha mepqui ingmic acyimnatamaclha sat cotnejic.

⁶ Inmasquec sat ancoc aclhanma ingvalhoc tingma ingac, mepqui nimpayvam sat cotnejic, malha acyamay ingalhcoc sat cotnejic. Ontimjic sat mataa ningayo tingma Jerusalén. Coyangvomoc sat tap ningayo, am colhnoc actemaclha ningitsovascama.

⁷ Visqui ingac, iyanmongsiclha sat lhip apquiltemaclha cotnaja ingmoc edomitas. Naysicsa apquiltovascama tingma Jerusalén apquiltomjac mataa apquilpalhamaycam: —Elnatovas, elsavojo sat apnatovascama tingma — alhta apquiltomjac cotnaja ingmoc.

⁸ Quellhip tingma Babilonia, colhic sat acnatovasa quellhip. Colhic sat acyanmongseclho apquiltemaclha quellhip. Intasic anco aptemaclha enlhit apquiltomja apquilyanmongsayclha apquiltemaclha,

⁹ apquiltomja apquilmam quellhip apquitquic. Apquiltomja apquilyinjam lhop (lhopactic) yoyam elitsapoc quellhip apquitquic.