JONÁS 2 - Enhlit BibleApquilmalhnesquiscama Jonás 1 Yitnec nic nat apquilmalhnancama Jonás avalhoc yamquilasma. 2 Aptomjac nic nat Jonás: Ayevam alhta lhip Dios Apyimtalhnamo naysicsa ayay evalhoc. Apjalhnoc alhta lhip silmalhnancama. Ayevam alhta lhip naysicsa siyitsepma. Apjalhnoc alhta lhip silmalhnancama. 3 Eyinyovcasquic alhta lhip congne yingmin acvanyam. Acvayvamquic alhta coo. Nitnoc alhta yingmin alyayajayam selajapma coo, lhip alhta ayinyemaclha. 4 Inlhenquic alhta evalhoc seyamasma lhip Dios Apyimtalhnamo. Lhip tingma pac apponquinomap, motejec sat mocjam, lhaja. 5 Neyava coo yingmin acvanyam, malha sicvayveycaoc alhta yingmin ayaptovnilha. Incaspec epatic acmo tama. 6 Acvayvamquic alhta yingmin ayaptovnilha, payjoc alyascamaclha ingjangaoc. Malha sicmomalhca alhta cotmongvoycamlha nelha. Lhip Dios Apyimtalhnamo aptomja alhta sevomquiscama tap naysicsa siyitsepma. 7 Inlhenquic alhta evalhoc lhip Dios Apyimtalhnamo naysicsa siyitsepma. Apjalhnoc alhta lhip silmalhnancama, apna lhip tingma pac apponquinomap. 8 Enlhit apquilyiplovquiscama quilaycmasquiscama, meltomja apquilayo lhip. 9 Coo eyca olngacsic sat gracias. Olmecsic sat asoc macmescama lhip, siclhanma alhta mepqui sicyeycajascaoc, yoyam olmecsic. Lhip apvamlha pac lhama singvomquiscama tap — nic nat aptomjac Jonás. 10 Aptimescasquic nic nat Dios Apyimtalhnamo yoyam coyiclhic yamquilasma acyivey evomjoc sat lhopactic inquilhe Jonás. |