JEREMÍAS 47 - Enhlit Bible

Apquillhenama co Filistea

¹ Am nic nat elimpocjac mocjam co Egipto apvisqui faraón tingma Gaza. Apcapajasquic nic nat Visqui ingac, elngacsic amyaa profeta Jeremías:

² Eycaso sicpayvam sicvisay Visqui apancaoc: Nilhqueyja sat conyemac yingmin ayinyem, acyeniyam yingmin sat cotnejic lhalhma anco najan nipyesicsa tingma apquilvanyam. Elilpalhamam sat enlhitaoc apquillingaycamco acmasca.

³ Inlingalhquic maa apquililhyam nolhing apcapaoc (apquilinyem), najan ayilhtingyovam carros najan carros amancoc. Inquilyinyovalhquic apquitquic nipyesicsa apquilinyem, ayinyema acyivey apquilay enlhitaoc.

⁴ Invaac acnim aptovasomacpilha filisteos, najan aptovasomacpilha tingma Tiro najan Sidón. Mepqui lhama enlhit, yoyam elvomsic tap apnaymacoc — alhta aptomjac Visqui ingac. Naso, Visqui ingac etvacsic sat co Filistea (filisteos) apquilinyema siclhoc nat acyayem lhop acvisay Creta.

⁵ Apquiltingyascasquic alhta apquilyisem co Gaza, ayinyema acmayovsa apquilvalhoc. Mepqui mocjam apquilitsovascama co Ascalón. Quellhip gigantes anaquitos, ¿co sat acvam elvatsamcoc apquilyimsascama apyimpeoc ayinyema acmayovsa apquilvalhoc?

⁶ Lhip Visqui ingac, ¿co sat acvam comascoc ninticyovam? ¡Vamlha itne! ¡Ingyitsiclha sat alhancoc sovo acvinatem, comascoc sat singilnapma!

⁷ Lhip Visqui ingac ayinyema alhta siclho, yoyam eticyoc tingma Ascalón najan nicja yingmin lhalhma anco — alhta apquiltomjac — nic nat aptomjac profeta.