EZEQUIEL 2 - Enhlit Bible

Apcanyomap profeta Ezequiel

¹ Invitac alhta mocjam sicvanmoncama. Aptomjac alhta seyanya: Lhip enlhit, itnimiclha netin. Opamejitsic sat lhip — alhta aptomjac seyanya.

² Intalhnec alhta evalhoc Dios apmopvan apanco naysicsa sepamejitquiscama. Etnimcasquic alhta netin coo. Aclingac alhta sepamejitquiscama.

³ Aptomjac alhta seyanya: Ongvapajacsic sat lhip apvisay enlhit nipyesicsa israelitas, selinmelhaycam mataa coo. Ayinyema ilhnic nat apquilyeyjamcaa selinmelhaycam coo, acvaycmo as ningvamlha nac jay.

⁴ Najan maa apquitquic selinmelhaycam coo, malha acyeyjamelhma apquiltomjac. Ongvapajacsic sat lhip, yoyam etnejic elanic lhip: Eycaso appayvam apanco Dios Apyimtalhnamo.

⁵ Elaylhojoc sat, paj lhaja. Apquiltomja selinmelhaycam coo. Elyasamcojo sat as enlhitaoc, apna profeta aplingascama sicvisay nipyesicsa maa.

⁶ Lhip enlhit, nongya nasa enlhitaoc, nongya nasa apquilpayvam. Colhojoc sat aptiyascam lhip nipyesicsa, malha naysicsa amaoc, naysicsa aleyvam yitaja. Nongya nasa lhip apquilpayvam apquiltomja selinmelhaycam coo.

⁷ Ilngas sat lhip sicpayvam nipyesicsa maa. Elaylhojoc sat, paj lhaja. Avanjec apquiltemaclha selinmelhaycam coo.

⁸ Lhip, ingyeylhojo sat sicpayvam, yoyam elngacsic lhip. ¡Nojeyinmelham nasa lhip! Imayes siclho apatong, itov sat asoc yoyam omquecsic lhip — alhta aptomjac seyanya.

⁹ Acvitac alhta apmic acpeyvesamalhca acyiplomo vaycajac.

¹⁰ Apmayesquic alhta najato vaycajac actalhesamalhca lhama nicja najan moc nicja. Inlhenalhquic maa actemaclha ninlingaycamco acmasom, actemaclha layi, yoyam covac sat — nic nat aptomjac profeta.