ZECHARIAH 10 - Edisana ñwed Abasi Ibom

Abasi Afak Ikɔt Esie

¹ MBUFO ebeŋe Jehovah edim ke ini akpatre edim: Jehovah anam mineŋ-mineŋ, ndien enye eyeda ɔkpɔsɔŋ edim ɔnɔ mmɔ, ɔnɔ kpukpru owo mbiet iŋwaŋ.

² Koro teraphim etiŋde idiɔk-ŋkpɔ, mbia-idiɔŋ enyuŋ ekut nsu, enyuŋ etiŋ nsu-nsu ndap; mmɔ edɔŋ owo esit ikpikpu: oro esin mmɔ edaŋa nte otu ufene, enyin anam mmɔ, koro baba owo kiet eke ɔbɔkde mmɔ miduhe.

³ Iyaresit mi ofiop ye mme andibɔk oro: ami nnyuŋ nnɔ okpo ebot ufen: koro Jehovah mme udim ekerede otu erɔŋ esie kpa ufɔk Judah, onyuŋ onimde mmɔ ke ediye horse esie ke ekɔŋ.

⁴ Itiat inuk oto enye, ntok oto enye, utiga ekɔŋ oto enye, kpukpru mbon-utuk ŋko-ŋko eto enye.

⁵ Ndien mmɔ eyebiet mbon-uko eke edigide owo ke ekɔŋ nte mbat efak: mmɔ eyenyuŋ eŋwana ekɔŋ, koro Jehovah odude ye mmɔ: eyenyuŋ esin mme andi-doro horse but.

⁶ Nyenyuŋ nnam ufɔk Judah ɔsɔŋ, nnyuŋ nyaŋa ufɔk Joseph, nnyuŋ nyak mmɔ eduŋ: koro mmatua mmɔ mbɔm: ndien mmɔ eyetie kpa nte ŋkpɔ eke mmeŋkemenke mmɔ nduɔk: koro ami ndide Jehovah Abasi mmɔ, ami nyenyuŋ nyere mmɔ.

⁷ Ndien Ephraim eyekabare ebiet owo uko, esit eyenyuŋ adat mmɔ nte ke wine; ndien nditɔ mmɔ eyekut enyuŋ edat esit; esit mmɔ eyedara Jehovah.

⁸ Nyesi ŋkot mmɔ, nnyuŋ ntaŋ mmɔ mbon; koro mmafak mmɔ: ndien mmɔ eyewak nte ekewakde.

⁹ Ndien nyesuan mmɔ ke otu mme idut: ndien mmɔ eyetie ke nnyan idut eti mi; mmɔ eyenyuŋ edu uwem ye nditɔ mmɔ, enyuŋ efiak edem edi.

¹⁰ Ndien nyeda mmɔ ke isɔŋ Egypt mfiak ndi, nnyuŋ ntaŋ mmɔ ke Assyria mbon; nnyuŋ nda mmɔ ndi ke isɔŋ Gilead ye Lebanon; ndien idikwe ebiet inɔ mmɔ.

¹¹ Ndien enye eyesaŋa ke inyaŋ ukut ebe, onyuŋ amia odut ke inyaŋ, ndien kpukpru udem ke Nile eyesat: ndien enye eyesuhɔre iseri Assyria onim; mmɔnyɔ Egypt eyenyuŋ adaha.

¹² Nyenyuŋ nnam mmɔ esɔŋ ke Jehovah; ndien mmɔ eyesaŋa ke enyiŋ esie, ke edi Jehovah ɔdɔhɔ.