UTOM MME APOSTLE 9 - Edisana ñwed Abasi Ibom

Ɔbɔŋ Jesus Omum Saul

¹ EDI Saul ke osuk ofime ikɔ-ndikhe ye ikɔ-nsobo adian mbet Ɔbɔŋ;

² enye onyuŋ adaha etiene akwa oku okobup enye, ete ɔnɔ imɔ ŋwed ida isɔk mme synagogue emi edude ke Damascus, man imɔ ima ikut owo ekededi eke esaŋade ke Usuŋ oro, ye mmɔ edide irenowo ye edide iban, ikpada mmɔ ke ebuka idi ke Jerusalem.

³ Edikem, nte enye asaŋade, enye ekpere Damacus: ndien idaha oro uŋwana oto ke enyɔŋ ayama akanare enye okuk:

⁴ ndien enye ɔduɔ ke isɔŋ, onyuŋ okop uyo nte ɔdɔhɔde ete, Saul, Saul, nsinam afo ɔkɔbɔde Mi?

⁵ Edi enye ete, Afo edi anie, Ɔbɔŋ? Ndien Ɔbɔŋ ete, Ndi Jesus emi afo ɔkɔbɔde.

⁶ Edi daha ke enyɔŋ, duk ke obio, ndien eyesian fi se afo enyenede ndinam.

⁷ Mmɔ emi esaŋade ye enye etuak eda, ikemeke ndisioro uyo, koro mmɔ ekopde uyo, edi mikwe baba owo kiet.

⁸ Edi Saul adaha ke isɔŋ; ndien ke ini atatde enyin, enye ikwe usuŋ; ntre ke mmɔ emum enye ke ubɔk, eda eduk ke Damascus.

⁹ Ndien enye ikwe usuŋ ke usen ita, idiaha ŋkpɔ inyuŋ iŋwɔŋke ŋkpɔ.

¹⁰ Edi mbet kiet odu ke Damascus, emi ekerede Ananias; ndien Ɔbɔŋ okot enye ke nkukut, ete, Ananias. Enye ɔbɔrɔ ete, Se ami mi, Ɔbɔŋ.

¹¹ Edi Ɔbɔŋ ɔdɔhɔ enye ete, Daha, ka ke efak emi ekotde Nnen-nnen kobup ke ufɔk Judas baŋa owo emi ekerede Saul, owo Tarsus: koro sese, enye ke ɔbɔŋ akam;

¹² omonyuŋ okut owo emi ekerede Ananias, nte odukde edi edidori enye ubɔk, man enye okut usuŋ.

¹³ Edi Ananias ɔbɔrɔ ete, Ɔbɔŋ, mmokop mbaŋa owo emi ke inua ediwak owo, adaŋa akwa ibak ke enye akanam nti ikɔt Fo ke Jerusalem;

¹⁴ ikpɔ oku ema enɔ enye odudu ke edem emi ŋko ndisin kpukpru mmɔ emi esemede ekot enyiŋ Fo ke ebuka.

¹⁵ Edi Ɔbɔŋ ete enye, Kam ka: koro enye edi anam-utom eke mmekde, nte akama enyiŋ Mi aka ke iso mme Gentile ye mbɔŋ, ye nditɔ Israel:

¹⁶ koro ami nyewut enye adaŋa ediwak ŋkpɔ nte enye enyenede ndikut kabaŋa enyiŋ Mi.

¹⁷ Ntre ke Ananias adaha, aka okoduk ke ufɔk oro, onyuŋ odori Saul ubɔk, ete, Eyen-ete mi Saul, Ɔbɔŋ Jesus, emi okowutde fi idem nte asaŋade ke usuŋ edi, ke ɔdɔŋ mi ndi man afo okut usuŋ onyuŋ ɔyɔhɔ ye Edisana Spirit.

¹⁸ Ndien ini kiet ŋkpɔ adianare ke enyin esie ɔduɔ nte mkpaŋ, enye onyuŋ okut usuŋ; ndien enye adaha ke enyɔŋ ana baptism,

¹⁹ onyuŋ adia udia okop nsɔŋidem. Ekem enye etie ye mbet emi edude ke Damascus ke ndusuk usen.

²⁰ Ndien kpa idaha oro enye ɔkwɔrɔ Jesus ke mme synagogue ete, Enye edi Eyen Abasi.

²¹ Edi mkpa-idem omum kpukpru mmɔ eke ekopde ikɔ esie, mmɔ enyuŋ edɔhɔ ete, Nte emi idige owo emi okosobode mmɔ eke esemede ekot enyiŋ Jesus ke Jerusalem? enye okonyuŋ edi mi, man ada mmɔ ke ebuka aka ke iso ikpɔ oku.

²² Edi Saul ɔdɔdiɔŋ okop odudu akan, etiŋ ikɔ tutu ekikere oyo mme Jew emi eduŋde ke Damascus, eneŋere owut ete Jesus edi Christ.

²³ Edi ke adaŋemi ediwak usen ema ekebe, mme Jew eduk odu ete iwot enye: edi Saul ɔfiɔk odu mmɔ.

²⁴ Mmɔ enyuŋ etie ekpeme mme inua-otop ke uwemeyo ye ke okoneyo ndiwot enye; edi

²⁵ mbet esie eda enye ke okoneyo esin ke akpasa, esuhɔre ke ibibene.

²⁶ Ke adaŋemi enye osimde Jerusalem, enye odomo ndidian idem ye mbet Jesus: edi kpukpru mmɔ efehe enye, koro mmɔ minimke ete enye edi mbet.

²⁷ Edi Barnabas ada enye etiene mme apostle akasian mmɔ nte enye okokutde Ɔbɔŋ ke usuŋ, ye nte Ɔbɔŋ eketiŋde ikɔ ye enye, ye nte enye okonyuŋ ɔkwɔrɔde ikɔ uko-uko ke enyiŋ Jesus ke Damascus.

²⁸ Ndien enye etie ye mmɔ ke Jerusalem, ododuk ɔwɔwɔrɔ ye mmɔ, onyuŋ ɔkwɔrɔ ikɔ uko-uko ke enyiŋ Ɔbɔŋ: ndien enye etiŋ ikɔ Abasi,

²⁹ onyuŋ eneni eneni ye mme Jew emi esemde usem Greek; edi mmɔ eyom usuŋ nte ekpewotde enye.

³⁰ Edi ke adaŋemi nditɔ-ete efiɔkde ŋkpɔ emi, mmɔ eda enye esuhɔre edi ke Caesarea, enyuŋ edɔŋ enye ɔnyɔŋ ke Tarsus.

³¹ Ntre ke ufɔk Abasi ke ofuri Judaea ye Galilee ye Samaria okut ifure, onyuŋ ɔkɔri ke uwem Abasi; mbon Ufɔk Abasi enyuŋ esaŋa ke uteŋe Jehovah ye ke ndɔŋesit Edisana Spirit, enyuŋ etɔt eti-eti.

³² Edikem, nte Peter asaŋade ke kpukpru ebiet, enye onyuŋ ɔsuhɔre edi ndise ikɔt Abasi emi eduŋde ke Lydda.

³³ Do ke enye okut owo kiet emi ekerede Aeneas, emi akanade ke mkpana esie isua itiaita koro enye ɔdɔŋɔde akpa-ubeŋ

³⁴ Ndien Peter ɔdɔhɔ enye ete, Aeneas, Jesus Christ anam udɔŋɔ fo okure; daha ke enyɔŋ, tim mkpana fo.

³⁵ Ndien idaha oro enye adaha ke enyɔŋ. Kpukpru mmɔ emi eduŋde ke Lydda ye Sharon ekut enye, enyuŋ ekabare etiene Ɔbɔŋ.

³⁶ Edi mbet aŋwan kiet odu ke Joppa, ekere Tabitha, emi ekotde enye ete, Dorcas: ŋwan emi ɔyɔhɔ ye nti utom ye ntarubɔk eke enye anamde.

³⁷ Ekem ke mme usen oro enye ɔdɔŋɔ, akpa: ndien ke mmɔ ema ekeyet enye mmɔŋ, emen enye enim ke ubet enyɔŋ.

³⁸ Edi sia Lydda ekperede Joppa, mbet enyuŋ ekopde ete Peter mɔdo, mmɔ edɔŋ owo iba ke ɔtɔ esie, edikpe enye ubɔk ete, Kubigi ndibe nsim nnyin idem.

³⁹ Ntem ke Peter adaha asaŋa ye mmɔ aka. Ndien ke adaŋemi enye osimde mmɔ, eda enye eduk ke ubet enyɔŋ; ndien kpukpru mme ebe-akpa eda ekpere okpo etua eyet, enyuŋ ewut ɔfɔŋidem ye edisine-ŋkpɔ emi Dorcas okokimde, ke ini enye odude ye mmɔ.

⁴⁰ Edi Peter anam kpukpru mmɔ ewɔŋɔ, onyuŋ ɔtɔŋɔ edɔŋ, ɔbɔŋ akam; ndien akabare ese okpo, ete, Tabitha, daha ke enyɔŋ. Enye atat enyin esie; ndien ke ini enye okutde Peter, enye adaha etetie.

⁴¹ Peter onyuŋ ɔnɔ enye ubɔk, emenere enye ke enyɔŋ; onyuŋ okot ikɔt Abasi ye mme ebe-akpa edi, ayak enye ɔnɔ mmɔ ye uwem.

⁴² Ndien efiɔk ebaŋa ŋkpɔ emi ke ofuri Joppa: ediwak owo enyuŋ enim Ɔbɔŋ ke akpanikɔ.

⁴³ Edikem, Peter etie ediwak usen ke Joppa ye owo kiet emi ekerede Simon, akwat-ikpa.