NUMBERS 8 - Edisana ñwed Abasi Ibom

Mme Uwuk Utuenikaŋ

¹ EKEM Jehovah ɔdɔhɔ Moses, ete, Dɔhɔ Aaron, nyuŋ tiŋ nɔ enye ete,

² Ke adaŋemi afo odomode mme utuenikaŋ, mme utuenikaŋ itiaba oro eyeŋwaŋa edem emi asakde iso ese uwuk utuenikaŋ.

³ Ndien Aaron anam ntre; enye odomo mme utuenikaŋ esie ɔnɔ edem emi asakde iso ese uwuk-utuenikan: kpa nte emi Jehovah eketemede Moses.

⁴ Ndien mmɔ ekeda gold edom enam usɔ uwuk-utuenikaŋ emi, mmɔ edom enye enam ekpat esie, ye flower esie: asaŋa ye mbiet emi Jehovah okowukde Moses, ntem ke enye akanam uwuk utuenikaŋ.

⁵ Ndien Jehovah ɔdɔhɔ Moses, ete,

⁶ Sioŋo mme Levite ke otu nditɔ Israel, nyuŋ nim mmɔ ke edisana.

⁷ Ndien ntem ke afo edinam ye mmɔ, ke erinam mmɔ esana: da mmɔŋ idiɔk ido sime mmɔ ke idem, yak mmɔ enyuŋ ekporo ofuri idem mmɔ, enyuŋ eyet edisine-ŋkpɔ mmɔ, ndien ntem ke mmɔ edinam idem mmɔ esana.

⁸ Ndien yak mmɔ eda abak enaŋ ye inuak-udia esie, eti ndom uyo eke abuahade ye aran, nyuŋ da abak enaŋ efen ke uwa idiɔk ido.

⁹ Ndien da mme Levite di ke iso efe esop: nyuŋ bon ofuri mbon-esop nditɔ Israel ɔtɔ kiet:

¹⁰ Ndien da mme Levite di ke iso Jehovah; ndien nditɔ Israel eda ubɔk mmɔ edori mme Levite ke idem:

¹¹ ndien yak Aaron ofuŋ ke iso Jehovah ke edifuŋ uwa nditɔ Israel, man mmɔ enam ŋkpɔ Jehovah.

¹² Ndien yak mme Levite eda ubɔk mmɔ edori enaŋ oro ke ibuot: ndien da kiet wa ke uwa idiɔk ido, nyuŋ da kiet eken wa ke edifɔp uwa nɔ Jehovah, man osio isop ɔnɔ mme Levite.

¹³ Ndien nim mme Levite ke iso Aaron, ye nditɔ esie, nyuŋ fuŋ mmɔ nɔ Jehovah ke edifuŋ uwa.

¹⁴ Ntem ke afo edidianare mme Levite osio ke otu nditɔ Israel: ndien mme Levite eyedi okimmɔ.

¹⁵ Ndien ke oro ebede, mme Levite ediduk enam utom efe esop: afo edinyuŋ anam mmɔ esana, onyuŋ ofuŋ mmɔ ke edifuŋ uwa.

¹⁶ Koro emesio mmɔ ke otu nditɔ Israel enɔ mi; mmada mmɔ ke idem mi ke ibuot kpukpru mme mmɔ emi esirerede itie-eyen, kpa mme akpan kpukpru nditɔ Israel.

¹⁷ Koro kpukpru mme akpan ke otu nditɔ Israel edide okim, owo ye unam: ke usen emi ŋkowotde kpukpru mme akpan ke isɔŋ Egypt, ke ŋkadianare mmɔ nnim ke idem mi.

¹⁸ Ndien mmada mme Levite ke ibuot kpukpru mme akpan ke otu nditɔ Israel.

¹⁹ Mmonyuŋ nda mme Levite nnɔ Aaron ye nditɔ esie ke enɔ ke otu nditɔ Israel, man enam ŋkpɔ nditɔ Israel ke efe esop, enyuŋ esio isop enɔ nditɔ Israel: man mkpa okudu ke otu nditɔ Israel, ke ini nditɔ Israel esaŋade ekpere edisana ebiet.

²⁰ Ndien Moses ye Aaron, ye kpukpru mbon esop nditɔ Israel, eda kpukpru se Jehovah eketemede Moses abaŋa mme Levite, enam ye mme Levite, ntem ke nditɔ Israel enam ye mmɔ.

²¹ Ntem ke enam mme Levite esana, ndien mmɔ eyet edisine-ŋkpɔ mmɔ; Aaron onyuŋ osio isop ɔnɔ mmɔ, onyuŋ anam mmɔ esana.

²² Ndien ke oro ebede, mme Levite eduk ke efe esop ekenam utom mmɔ ke iso Aaron, ye ke iso nditɔ esie: nte Jehovah eketemede Moses abaŋa mme Levite, kpa ntre ke enam ye mmɔ.

²³ Ndien Jehovah ɔdɔhɔ Moses, ete,

²⁴ Edi emi enyene mme Levite: owo isua edip ye ition, ye mmɔ eke ebede oro, eyeduk ke udim utom man enam ŋkpɔ efe esop:

²⁵ ndien ama osim isua aba ye duop, enyene nditre ke udim utom oro, okunyuŋ anam aba ŋkpɔ:

²⁶ edi yak enye anam ŋkpɔ ɔnɔ nditɔ ete esie ke efe esop, etie ekpeme ŋkpɔ, edi okunam utom. Ke ntre ke afo edinam ye mme Levite ke ikɔ utom mmɔ.