NUMBERS 15 - Edisana ñwed Abasi Ibom

Mme Ewuhɔ Emi Abaŋade Uwa

¹ EKEM Jehovah ɔdɔhɔ Moses, ete Dɔhɔ nditɔ Israel, ete mmɔ,

² Ke ini mbufo edukde ke isɔŋ iduŋ mbufo, emi Ami nnɔde mbufo,

³ Mbufo enyuŋ eyomde ndiwa uwa ikaŋ nnɔ Jehovah, mme edifɔp uwa, mme uwa eke ewade ke erinam akaŋa, mme uwa ima, mme ke usɔrɔ mbufo, man enam edinem utebe enɔ Jehovah, edide ke enaŋ, onyuŋ edide ke ŋkpri ufene:

⁴ Ndien yak owo eke awade enɔ esie ɔnɔ Jehovah, ada inuak udia, omer eti ndom-uyo emi abuahade ye quart aran.

⁵ Nyuŋ da wine ediŋwɔŋ uwa ke quart kiet, kɔrɔ ke edifɔp uwa, mme ke uwa emem, ke eyen erɔŋ kiet.

⁶ Onyuŋ edi ke okukim, afo enyene ndinam inuak-udia ke ndom-uyo ke omer iba emi abuahade ye aran ke pint ita ye ubak.

⁷ Nyuŋ da wine ediŋwɔŋ uwa ke pint ita ye ubak sɔk Jehovah ke edinem utebe.

⁸ Ndien ŋko ke adaŋemi afo ediwade enaŋ ke edifɔp uwa, mme ke uwa emi ewade ke erinam akaŋa, mme ke uwa emem, ɔnɔ Jehovah:

⁹ ndien yak enye ada inuak-udia eti ndom-uyo ke omer ita, eke ebuahade ye aran ke quart iba.

¹⁰ Nyuŋ da wine ediŋwɔŋ uwa ke quart iba sɔk Jehovah ke uwa ikaŋ edinem utebe.

¹¹ Ntem ke enyene ndinam ke enaŋ kiet, mme ke okukim erɔŋ kiet, mme ke eyen erɔŋ, mme eyen ebot.

¹² Ke adaŋa ibat emi mbufo edinamde, kpa ntre ke mbufo edinam kiet kiet ke adaŋa ibat mmɔ nte edide.

¹³ Kpukpru amana ke isɔŋ oro enyene ndinam ŋkpɔ emi ntem, ke eriwa uwa ikaŋ eti utebe nnɔ Jehovah.

¹⁴ Ndien ŋko ke adaŋemi esen owo oduŋde ye mbufo, mme owo ekededi eke edidude ke otu mbufo ke ofuri emana mbufo, ndien oyom ndiwa uwa ikaŋ edinem utebe nnɔ Jehovah; yak enye anam kpasuk nte mbufo enamde.

¹⁵ Ɔfɔn mbufo emi edide esop, ye esen owo eke edide oduduŋ ke otu mbufo enim suk ewuhɔ kiet, nsinsi ewuhɔ ke emana mbufo: nte mbufo etiede, kpasuk ntre ke esen owo editie ke iso Jehovah.

¹⁶ Mbufo ye esen owo eke oduŋde ye mbufo, enim ibet kiet ye ido kiet.

¹⁷ Ndien Jehovah ɔdɔhɔ Moses, ete, Dɔhɔ nditɔ Israel, ete,

¹⁸ Ke adaŋemi mbufo edukde ke isɔŋ emi ndade mbufo nduk ke esit;

¹⁹ ndien ama ekem, ke ini mbufo ediade udia isɔŋ oro, mbufo emenere edimenere uwa enɔ Jehovah.

²⁰ Mbufo eda akpa ibokpot emi ekɔkde, enam uyo kiet, emenere ke edimenere uwa: mbufo emenere enye kpa nte ekam emenerede uwa ubek ibokpot.

²¹ Mbufo eda ndusuk akpa ibokpot emi ekɔkde, enɔ Jehovah ke edimenere uwa, ke ofuri emana mbufo.

²² Ndien edieke mbufo eduede, minyuŋ inimke kpukpru mbet emi Jehovah ɔkɔdɔhɔde Moses,

²³ kpa kpukpru se Jehovah eketemede mbufo ke ubɔk Moses, ɔtɔŋɔde ke usen emi Jehovah okowukde, tutu osim eyo iso, ke ofuri emana mbufo;

²⁴ Ndien ama ekem, edieke owo anamde ŋkpɔ ke ndudue, mbon esop minyuŋ ikwe ke enyin, yak kpukpru mbon esop ewa abak enaŋ kiet enɔ Jehovah ke edifɔp, uwa eti utebe, ye inuak-udia esie, ye ediŋwɔŋ uwa esie, nte akam asaŋade, ye okpo ebot kiet ŋko ke uwa idiɔk ido.

²⁵ Ntem ke oku edisio isop ɔnɔ ofuri esop nditɔ Israel, ndien eyedahado enɔ mmɔ: koro enye edide ndudue: ntem ke mmɔ edida enɔ mmɔ, kpa uwa ikaŋ Jehovah, ye uwa idiɔk ido mmɔ ŋko-ŋko, edi ke iso Jehovah, ke ikɔ ndudue mmɔ:

²⁶ ndien eyedahado enɔ ofuri esop nditɔ Israel, ye esen ŋko emi oduŋde ke otu mmɔ: koro ikɔ enyenede ofuri obio ke ndudue.

²⁷ Ndien edieke owo kiet abiatde mbet ke ndudue, yak enye ada uman eyen ebot isua kiet, edi ke uwa idiɔk ido.

²⁸ Ndien yak oku ada owo emi akabiatde mbet ke ndudue, ke adaŋemi enye abiatde mbet ke ndudue ke iso Jehovah, osio isop ɔnɔ enye; ndien ama osio isop ɔnɔ enye, eyedahado ɔnɔ enye.

²⁹ Mbufo enim ubɔk ewuhɔ kiet ye owo emi abiatde mbet ke ndudue, edide amana ke otu nditɔ Israel, onyuŋ edide esen emi oduŋde ke otu mmɔ.

³⁰ Edi ama edi owo eke okoide koi anam ŋkpɔ ke ibak, edide amana ke isɔŋ, onyuŋ edide esen owo, enye esuene Jehovah, ndien yak esibe owo oro ke mbio-obio mmɔ efep.

³¹ Koro enye ekesinde ikɔ Jehovah ke ndek, onyuŋ abiatde ewuhɔ esie, yak mmɔ ekutre ndisibe owo oro mfep; idiɔk ido esie eyebiomo enye.

³² Edikem adaŋemi nditɔ Israel edude ke wilderness, mmɔ ekut owo kiet ataŋde ifia ke usen sabbath.

³³ Ndien mme andikut enye nte ataŋde ifia, eda enye esɔk Moses ye Aaron ye ofuri esop.

³⁴ Ndien mmɔ enim enye ete ekpeme: koro miketimke isiak kaŋa ŋkpɔ eke ekpenamde ye enye.

³⁵ Ndien Jehovah ɔdɔhɔ Moses, ete, Owo oro enyene ndikpa: yak ofuri esop eketɔŋɔ enye ke itiat ke edem nna.

³⁶ Ndien ofuri esop emum enye ewɔŋɔ eka ke edem nna, eketɔŋɔ enye ke itiat, ewot; kpa nte emi Jehovah eketemede Moses.

³⁷ Ekem Jehovah ɔdɔhɔ Moses, ete, Dɔhɔ nditɔ Israel,

³⁸ ete mmɔ enam nyeriye, edian ke mben ɔfɔŋidem mmɔ, ke ofuri emana mmɔ, enyuŋ ekɔt awawa erebin ke nyeriye mben oro:

³⁹ Ndien enye eyedi nyeriye mbufo, man mbufo ese enye, ndien eti kpukpru mbet Jehovah, enyuŋ enam mmɔ; mbufo ekunyuŋ ewaha etiene esit mbufo ye enyin mbufo, emi mbufo ekam etienede enam oburobut:

⁴⁰ man mbufo eti, enyuŋ enam kpukpru ewuhɔ mi, enyuŋ edi edisana ikɔt Abasi mbufo.

⁴¹ Ami ndi Jehovah Abasi mbufo, emi ŋkadade mbufo ke isɔŋ Egypt ŋwɔrɔ, man ndi Abasi mbufo, ami ndi Jehovah Abasi mbufo.