ŊWED MME PSALM 95 - Edisana ñwed Abasi Ibom

Ikwɔ Itoro ye Ntuahibuot

¹ MBUFO edi, nnyin ikwɔ inɔ Jehovah; isio mkpo idara inɔ akwa itiat erinyaŋa nnyin.

² Yak nnyin ida ekɔmɔ idi enye ke iso, ida ikwɔ isio mkpo idara inɔ enye.

³ Koro Jehovah edide akwa Abasi ye akwa edidem akan kpukpru mme abasi.

⁴ Emi mme ndituŋɔ ebiet isɔŋ edude enye ke ubɔk: odudu ikpɔ obot onyuŋ enyenede enye.

⁵ Emi inyaŋ edide esiemɔ: koro edide enye akanam enye: ndien ubɔk esie okobot obot.

⁶ Mbufo edi, nnyin ituak ibuot inyuŋ inuhɔ: inyuŋ itɔŋɔ edɔŋ ke iso Jehovah andinam nnyin.

⁷ Koro enye edide Abasi nnyin; ndien nnyin idi ikɔt emi enye ɔbɔkde, ye ufene ubɔk esie.

⁸ Mfin emi, mbufo ema eyom ndikop uyo esie, Ekusɔŋ esit mbufo, nte ke Meribah, ye nte ke usen Massah ke wilderness:

⁹ eke mme ete mbufo ekedomode mi ese, enyuŋ ekutde nte nnamde.

¹⁰ Emana oro ada efek mi ke ofuri isua aba, ndien ndɔhɔ nte ke mmɔ edi mbon eke esit mmɔ eyode, ndien mmɔ ifiɔkke usuŋ mi.

¹¹ Emi ŋkɔŋwɔŋɔde ke iyaresit mi mbaŋa, nte ke mmɔ ididukke ke nduɔk-odudu mi.