ŊWED MME PSALM 125 - Edisana ñwed Abasi Ibom

Abasi Akakanare Ikɔt Esie Okuk

Ikwɔ mmɔ eke edɔkde.

¹ MMƆ eke ebuɔtde idem ye Jehovah ebiet obot Zion, emi misehekede, edi ebigi ke nsinsi.

² Ikpɔ obot ekan Jerusalem ekuk; ntre ke Jehovah akan ikɔt esie okuk ke emi ye ke nsinsi.

³ Koro eto idiɔk ido mididorokede ke udeme nti owo ina; mbak nti owo edinyan ubɔk mmɔ etuk se idiɔkde.

⁴ O Jehovah, fɔn ido ye mmɔ eke efɔnde, ye mmɔ eke esit mmɔ enende.

⁵ Ndien ama edi mmɔ eke ewahade eduk ke ŋkwaŋa usuŋ mmɔ, Jehovah eyeyak mmɔ eka ye mme anam-idiɔk. Yak emem odu ye Israel.