ŊWED JOB 7 - Edisana ñwed Abasi Ibom

Job Eseme Idem Esie Ɔnɔ Abasi

¹ NTE ini ɔkpɔsɔŋ utom inaŋa inɔ owo ke ererimbot? Nte mme usen owo ibietke mme usen owo eke anamde utom ɔbɔ okuk?

² Kpa nte ofin eke mfut ɔdɔŋde, ye anam-utom ke okuk, eke odoride enyin ke utip esie:

³ Kpa ntre ke edeme ikpikpu ɔfiɔŋ enɔ mi, enyuŋ enim okoneyo mba enɔ mi.

⁴ Ke adaŋemi nnade ke isɔŋ, ndɔhɔ nte, Ewe ini ke ndidaha ke enyɔŋ, okoneyo edinyuŋ okure? Ami nnyuŋ mmiaŋa nyuhɔ tutu eyo esiere;

⁵ Obuk mi esine ndɔŋ ye ebok ntan; ikpɔk mi akabare ɔsɔŋ, ndien ɔtɔŋɔ ntak ɔwɔrɔ mmɔŋ.

⁶ Mme usen mi emesɔp ekan afia-isobo, enyuŋ ekure, inyeneke idoreyin.

⁷ Oh, ti ete ke uwem mi edi ofum; enyin mi idikwe aba eti ŋkpɔ.

⁸ Enyin andikut mi idikwe aba mi, enyin fo eyese mi, edi ndiduhe.

⁹ Obubit enyɔŋ asuana, onyuŋ onime! Kpasuk ntre ke owo eke ɔsuhɔrede ke ɔtɔ ekpo, ididɔkke aba.

¹⁰ Enye idifiakke aba ke ufɔk esiemɔ, ebiet esie idinyuŋ idiɔŋɔke aba enye.

¹¹ Ami ndien ndidopke inua; nyedɔhɔ ikɔ ke iyaresit mi, nyeseme ke idot ukpɔŋ mi.

¹² Nte ami ndi inyaŋ ibom, mme kukubarakpa, emi afo onimde owo, ete ekpeme mi?

¹³ Ke ini ndɔhɔde, nte ke bed mi edidɔŋ mi esit, ke mbri mi edinam eseme mi osuk ubɔk;

¹⁴ Ndien afo ada ndap esin mi ndikhe, onyuŋ anam idem akpa mi ke ŋkukut:

¹⁵ Mmɔdo ukpɔŋ mi emekde eriyire, mkpa akan mme ɔkpɔ mi emi.

¹⁶ Nsasua mmɔ, ndiyomke ndidu uwem ke nsinsi: daha mi ke usuŋ; koro mme usen mi edide ibifik.

¹⁷ Owo edi nso, emi afo okponode enye, onyuŋ ekerede enye?

¹⁸ Onyuŋ esede enye kpukpru usenubɔk, onyuŋ odomode enye kpukpru ini?

¹⁹ Ini ewe ke afo editre ndise mi, nnyuŋ nyak mi tutu ndimen etap mi?

²⁰ Edieke nduede ke se ŋkpanamde nnɔ fi, O andikpeme owo, nsinam afo onimde mi ke ŋkpɔ eke ɔbiɔŋɔde fi, esin mi ŋkabare ndi mbiomo idem mi?

²¹ Nsinam afo mufenke ndudue mi, munyuŋ umenke idiɔk ido mi ufep? Koro ke emi ke ndinyene ndina ke ntan, ndien afo eyeyom mi, edi ndiduhe.