ŊWED JOB 5 - Edisana ñwed Abasi Ibom

¹ KOT ndien! nte owo eke edibɔrɔde fi odu? Afo edinyuŋ akabare ese anie ke otu mbon edisana ido?

² Ŋkɔm iyaresit owowot ndisime owo, ufup onyuŋ anam ɔkɔi akpa.

³ Ami ŋkokut oburobut owo omum oruŋ ke isɔŋ; ndien nsuŋi iduŋ esie idaha oro.

⁴ Nditɔ esie ekpɔŋ ifure anyan usuŋ; kiet okonyuŋ anuak kiet ke inua-otop, baba owo kiet eke anyaŋade inyuŋ iduhe.

⁵ Emi mbon ɔ-biɔŋ ediade (udia emi) enye ekpeŋede, enyuŋ esiode enye ke ufɔt mbarekpe; afia onyuŋ aŋwaŋa inua ese inyene mmɔ.

⁶ Koro idiɔk mitoho ke ntan, ukut minyuŋ itibeke ke isɔŋ;

⁷ Edi owo amana ɔnɔ ukut, kpa nte ebuaikaŋ efede edɔk ke enyɔŋ.

⁸ Edi ami ŋkpoyom Abasi, ŋkponyuŋ nda ikɔ mi nsin Abasi ke ubɔk:

⁹ Emi anamde ikpɔ ŋkpɔ eke mikemeke ndiduŋɔ; mme utibe ŋkpɔ tutu ekan ibat:

¹⁰ Emi anamde edim edep ke iso isɔŋ, onyuŋ ɔdɔŋde mmɔŋ, ete asaŋa ke iso iŋwaŋ:

¹¹ Onyuŋ emen mmɔ eke esuhɔrede onim ke enyɔŋ; mmɔ eke etuaŋade enyuŋ emenere idem mmɔ esim ifure.

¹² Enye asuan uduak mbon ŋkari, ndien ubɔk mmɔ inamke ŋkpɔ akpanakpan.

¹³ Enye omum mme enyene ibuot owo ke ŋkari idem mmɔ;

¹⁴ Ndien uduak mbon abiaŋa ɔduɔ ibuot-ibuot. Mmɔ etuak ukot ke ekim ke uwemeyo, ke ufɔt uwemeyo ke mmɔ enyuŋ efiɔŋɔ kpa nte ke okoneyo.

¹⁵ Ndien enye anyaŋa mme ubuene ɔbɔ ofut, (emi edide) inua mmɔ, onyuŋ osio mmɔ mkpɔsɔŋ owo ke ubɔk.

¹⁶ Ntre ke mbon mmeme enyene idorenyin, ndien ukwaŋŋkpɔ okibi inua esie.

¹⁷ Sese, ɔfɔfɔn ɔnɔ owo eke Abasi ɔtunɔde: kusin ndien item Ata Ɔkpɔsɔŋ:

¹⁸ Koro Enye ɔnɔde unan ndien ɔbɔp: anuak, ndien ubɔk esie anam unan akpa.

¹⁹ Enye eyesio fi ke ukut itiokiet efep: ndien ke itiabaidiɔk-ŋkpɔ idisimke fi.

²⁰ Enye eyefak fi ɔbɔ mkpa efep ke ini akaŋ: ɔbɔ ke ubɔk ofut ke ini ekɔŋ.

²¹ Ke adaŋemi edeme amiade, enye eyedip fi: udunyuŋ ufeheke nnama adaŋemi enye edide.

²² Afo eyesak nnama ye biɔŋ; udunyuŋ ufeheke unam ikɔt.

²³ Koro afo eyeduk ediomi ye mme itiat isɔŋ, unam ikɔt eyenyuŋ etie ufan ye afo.

²⁴ Afo eyenyuŋ ɔfiɔk ete ke ɔfɔn ye iduŋ fo; eyese nna ufene fo, ndien baba ŋkpɔ kiet idisopke.

²⁵ Afo eyenyuŋ ɔfiɔk ete ke nditɔ fo ediwak, ke ubon fo edinyuŋ etie nte mbiet isɔŋ.

²⁶ Afo eyesim udi ke ata usɔŋ, kpa nte ebek ibokpot ɔdɔkde edi ke ekem ini.

²⁷ Sese, nnyin imɔduɔŋɔ emi: ŋkpɔ etie ntem; kop enye; afo nyuŋ fiɔk enye ke idem fo.