ŊWED JOB 16 - Edisana ñwed Abasi Ibom

Job Ɔtɔŋɔ Ntak Etiŋ Ikɔ Abaŋa Idem Esie

¹ NDIEN Job ɔbɔrɔ, ete,

² Mma ŋkop ediwak ikɔ eke etiede ntem: mbufo kpukpru edi ukut-ukut mbon ndɔŋesit.

³ Nte ofum-ofum ikɔ enyene utit? Mme nso ŋkpɔ ayat fi esin fi ɔbɔrɔ?

⁴ Ami ŋko ŋkpekeme ndidɔhɔ ikɔ nte mbufo edɔhɔde, edieke ukpɔŋ mbufo odude ke itie ukpɔŋ mi, ŋkpekeme nditodi ikɔ mbaŋa mbufo, ŋkpeyip ibuot mi nse mbufo.

⁵ Ŋkpekeme ndisɔŋ mbufo esit ke inua mi, ndien unyeŋe mkpɔk-inua mi okposuk mbufo esit.

⁶ Ŋkpɔdɔhɔ ikɔ, ubiak mi isukke ubɔk: ndien ŋkpodop, nso ŋkpɔ odorore mi ke idem adaha?

⁷ Edi ke emi ke enye anam mi ŋkpa mba: afo amabiat ofuri ufɔk mi.

⁸ Enye ɔbɔp mi idem: oro edi ŋkpɔ ntiense: ndiɔk-idem mi onyuŋ adaha ke enyɔŋ abaŋa mi, ɔbɔrɔ ke iso mi.

⁹ Iyaresit esie awai mi onyuŋ ɔkɔbɔ mi, enye ata edet esie ese mi; usua mi ɔsɔp enyin esie ese mi.

¹⁰ Mmɔ eŋwaŋade inua mmɔ ese mi; etɔ mi ke mfuk oburobut: esop idem ɔtɔ kiet enam ikɔ ye ami.

¹¹ Abasi amayak mi ɔnɔ oburobut owo, onyuŋ otop mi esin mme idiɔk owo ke ubɔk.

¹² Ŋketie suŋ, ndien enye abamare mi, omum mi ke itɔŋ asuan mi, ndien onim mi ke se enye otopde.

¹³ Mbon utiga esie ekan mi ekuk; enye asiak mi ekput, inyuŋ inyeneke mbɔm; emen etidot mi ɔduɔk ke isɔŋ.

¹⁴ Enye obom mi, ɔdiɔŋ obom, onyuŋ etiene mi ibumere ibumere nte owo ekɔŋ.

¹⁵ Mmokim ɔfɔŋikpo nsine ke idem mi, nnyuŋ nsabare nduk mi ke ntan.

¹⁶ Iso mi omoyibe ke ntua-eyet, mfut mkpa onyuŋ odoro mi ke mkpɔk-enyin.

¹⁷ Idige koro afai odude mi ke ubɔk, ndien akam mi onyuŋ asana.

¹⁸ O isɔŋ, kufuk iyip mi, kunyuŋ uyak eseme mi okut itie!

¹⁹ Ke emi ŋkoŋko, sese, ntiense mi odu ke enyɔŋ, iberedem mi onyuŋ odu ke edikoŋ ebiet.

²⁰ Mme ufan mi esak mi; enyin mi aŋwaŋa mmɔŋeyet ɔnɔ Abasi;

²¹ Ete Enye akaŋ owo ke iso Abasi, akaŋ eyen owo ke iso mbɔhiduŋ esie.

²² Koro ndusuk isua eyedi, ndien nyeka usuŋ eke mmendi-fiakke.