ŊWED JOB 12 - Edisana ñwed Abasi Ibom

Job Etiŋ Ayarade Odudu ye Ifiɔk Abasi

¹ NDIEN Job ɔbɔrɔ, ete,

² Ke akpanikɔ edi mbufo edi owo, eti ibuot eyenyuŋ akpa ye mbufo!

³ Ami ŋko mmenyene ibuot nte mbufo; nnyimeke ndisuk ibuot nnɔ mbufo: anie mifiɔkke oruk ŋkpɔ nte mmɔ emi?

⁴ Mmenyene ndikabare ndi owo eke ufan esie asakde! kpa owo eke ekesemede ɔnɔ Abasi ndien Enye eyere enye. Eti owo emi enende onyuŋ ɔfɔnde ama akabare edi ŋkpɔ nsahi!

⁵ Mmin-inua asaŋa ye nnan-enyin, nte mbon ifure esede, enye (mmin-inua) ebet mmɔ eke enyeŋede ke ukot.

⁶ Mme tent mbon-ufik etie suŋ, ifure onyuŋ enyene mme ayat Abasi esit, ye owo eke obiomde Abasi ke ubɔk esie.

⁷ Edi bup naŋa mme unam, ndien mmɔ eyeteme fi, (nyuŋ bup) inuen enyɔŋ, ndien mmɔ eyesian fi.

⁸ Dɔhɔ ye isɔŋ ŋko, ndien enye eyeteme fi, iyak ke mmɔŋ eyenyuŋ obuk ɔnɔ fi.

⁹ Anie mifiɔkke ke kpukpru mme mmɔ emi, ite ke edi ubɔk Jehovah anam emi?

¹⁰ Emi akamade ukpɔŋ kpukpru ŋkpɔ uwem ke ubɔk esie, ye spirit ofuri obukidem owo.

¹¹ Nte utɔŋ idomoke ikɔ, kpa nte nsiŋ atabide udia ke idem esie?

¹² Ifiɔk odu ye mbon iwat, anyan uwem onyuŋ edi eti ibuot.

¹³ Ifiɔk ye odudu edu ye enye, enye enyene item ye asian.

¹⁴ Sese enye owuri, ndien owo ikemeke ndidiɔŋ, enye ɔkɔbi owo abaha, ndien owo ikemede ndisana nyak.

¹⁵ Sese, enye akpan mmɔŋ, ndien mmɔŋ asat: ekem enye ɔdɔŋ mmɔ ewɔrɔ, ndien efuk isɔŋ.

¹⁶ Odudu ye ata mbufiɔk edu ye enye: enye enyene andidue ye andibiaŋa.

¹⁷ Enye osio mbon item ŋkpɔ ke idem, ada mmɔ ɔnyɔŋ, onyuŋ anam mme ebierikpe ekabare edi mme ndisime.

¹⁸ Atat ŋkpɔkɔbi ndidem, ndien ada uruk ɔbɔp mmɔ ke isin.

¹⁹ Osio mme oku ŋkpɔ ke idem, ada mmɔ ɔnyɔŋ, onyuŋ anam mmɔ eke esɔŋɔde ke itie efiɔnɔde.

²⁰ Enye emen inua mbon akpanikɔ efep, onyuŋ ɔbɔ mbiowo mfre.

²¹ Ada but ofuk mbɔŋ, onyuŋ atat ubɔp-isin mkpɔsɔŋ owo.

²² Enye osio ndituŋɔ ŋkpɔ ke ekim ayarare, onyuŋ osio mfut mkpa onim ke uŋwana.

²³ Enye anam obio ekpon, ndien osobo mmɔ: anam mme idut etɔt, ndien ataŋ mmɔ ɔnyɔŋ.

²⁴ Enye ɔbɔ ikpɔ owo ererimbot ɔniɔŋ, ndien esin mmɔ ediyo ke desert eke ɔkpɔ-usuŋ miduhe.

²⁵ Mmɔ efiɔŋɔ ke ekim, ikwe uŋwana, enye onyuŋ esin mmɔ ediyo nte owo eke akpade mmin.