MME ŊKE 6 - Edisana ñwed Abasi Ibom

Nduri-utɔŋ ke Owo Nditie Ifu Nnyuŋ Mbiaŋa Abiaŋa

¹ EYEN mi, edieke afo etiede ubiɔŋ ɔnɔ ufan fo, amiade ubɔk fo ye esen owo,

² Edieke ikɔ inua fo esinde fi ɔduɔ ke afia, ikɔ inua fo ama mum fi;

³ Nam ndien ntem eyen mi, man ɔbɔhɔ, koro afo odukde ke ubɔk ufan fo; ka kɔduɔ enye ke ukot, ndien kpe ufan fo ubɔk.

⁴ Kunɔ enyin fo idap; kuyet idap ke mkpɔk-enyin fo.

⁵ Bɔhɔ nte okoyo ke ubɔk (ata-ikɔt), ye nte ntarusuŋ ke ubɔk andimum enye.

⁶ O ifem, ka ke ebiet iyɔŋ; se ido mmɔ, ndien nyene ibuot;

⁷ Emi minyeneke etubom, ye andise, ye ɔbɔŋ;

⁸ Ke ndaeyo ke mmɔ enim udia mmɔ, ke ini idɔk ke etaŋ se ediade.

⁹ O ifem, adaŋa didie ke afo edisuk ana? Ke ini ewe ke afo edidemere ke idap fo?

¹⁰ Idap esisit, eyet esisit, mkpaŋ-ubɔk esisit ke erina:

¹¹ Ndien ubuene fo eyedi nte asaŋa isaŋ, ye unana fo nte owo otu-ekɔŋ.

¹² Obukpo owo, oburobut owo, asaŋa ke ukwaŋ inua.

¹³ Oyip enyin esie, ɔfɔi ke ukot esie, ada nnuenubɔk esie eteme ŋkpɔ;

¹⁴ Ukwaŋ-ŋkpɔ odu enye ke esit, enye aduak idiɔk, kpukpru ini enye edemere utɔk.

¹⁵ Oto oro nsobo esie eyebuat enye; enye eyebuŋɔ ke idaha kiet; ndien baba ŋkpɔ kiet eke aŋwaŋade enye idem ididuhe.

¹⁶ Jehovah asasua ŋkpɔ mbitiokiet emi:

¹⁷ ukpɔŋ esie onyuŋ ese mbitiaba emi ke mbubiam: Ŋkok-idem, edeme nsu, ye ubɔk eke eduɔkde iyip owo eke miduehe,

¹⁸ Esit eke aduakde uduak ibak, ukot eke esɔpde ebine idiɔk,

¹⁹ Owo eke oyokde nyok, nte ntiense nsu, ye owo eke edemerede utɔk ke otu nditɔ ete kiet.

²⁰ Eyen mi, kpeme ibet usɔ, kunyuŋ ukpɔŋ ido uka: Tebe mmɔ dian ke esit fo kpukpru ini, kɔŋɔ mmɔ ke itɔŋ fo.

²¹ Ke ini afo asaŋade, enye eyeda fi usuŋ;

²² ke ini anade ke isɔŋ, enye eye-kpeme fi; ndien ke edemerede, enye eyesioŋo nneme ye afo.

²³ Koro ibet edide utuenikaŋ; ewuhɔ onyuŋ edi uŋwana: ntunɔ ye item enyuŋ edi usuŋ uwem:

²⁴ Ndikpeme fi mbak idiɔk aŋwan, mbak nneminua esen aŋwan.

²⁵ Kuyak itɔŋ uyai esie ɔdɔŋ esit fo; kunyuŋ uyak enye omum fi ke mkpɔk-enyin esie.

²⁶ Koro akpara aŋwan esinde owo ɔsuhɔre osim ŋkeŋe kiet: ama edi ŋwan owo, enye ebine edima uwem.

²⁷ Nte owo adada ikaŋ esin ke ikpan-esit esie, ndien edisine-ŋkpɔ esie etre ndifɔbɔ?

²⁸ Nte owo asasaŋa ke ebok ikaŋ, ndien ukot esie etre ndifɔbɔ?

²⁹ Kpa ntre ke etie ye anditiene ŋwan ufan esie: baba owo kiet eke otukde enye idibɔhɔke ufen.

³⁰ Owo isueneke inɔ, koro enye oyipde man ukpɔŋ esie ɔyuhɔ; koro biɔŋ ɔdɔŋde enye;

³¹ Edi ema emum enye, enye eyesio usiene utim ikatiaba; eyenɔ kpukpru inyene ufɔk esie.

³² Esin efibe ye ŋwan anana ibuot: owo eke anamde ntre eyesobo ukpɔŋ esiemɔ.

³³ Enye eyeda unan ye but; ndien idisɔhike esuene esie ifep.

³⁴ Koro ufup edide ikpahesit owo: ndien enye idiyakke ke usen usiene.

³⁵ Enye idibɔhɔ baba ŋkpɔ ufak kiet; idinyuŋ idahakedo, afo ɔkpɔnɔnɔ ediwak inyene.