MME ŊKE 31 - Edisana ñwed Abasi Ibom

Mme Ŋke Edidem ekotde Lemuel

¹ UYO edidem Lemuel; prophecy emi eka esie eketemede enye.

² Nso, eyen mi? Nso, eyen idibi mi? Nso, eyen akaŋa mi ŋko (ke ndidɔhɔ fi)?

³ Kuda odudu fo unɔ iban, kunyuŋ uda usuŋ fo unɔ se ibiatde mbɔŋ.

⁴ Ifɔnke mbɔŋ, O Lemuel, ifɔnke mbɔŋ ndiŋwɔŋ wine: itɔŋ mmin inyuŋ ifɔnke ŋkwa owo.

⁵ Mbak owo ediŋwɔŋ, ndien efre mme ewuhɔ, onyuŋ akwaŋa ikpe kpukpru mbon ukut.

⁶ Da mmin nɔ owo eke oyomde ndikpa: nyuŋ da wine nɔ mmɔ eke esit ayatde mmɔ.

⁷ Yak enye ɔŋwɔŋ, ndien efre ubuene esiemɔ: okunyuŋ eti aba ɔkpɔsɔŋ utom esie.

⁸ Tat inua fo nɔ mmɔ eke edide imum; tat nɔ ikɔ kpukpru nditɔ akpa.

⁹ Tat inua fo, kpe edinen ikpe: nyuŋ biere ikɔ mbon ukut ye ubuene.

¹⁰ Anie edikut enyene-ido aŋwan? Ŋkɔm ekɔm-urua esie akan pearl anyan usuŋ.

¹¹ Esit ebe esie ɔbuɔt idem ye enye: udori idinyuŋ inanake.

¹² Ŋwan oro anam enye eti ŋkpɔ, idinamke idiɔk, kpukpru usen uwem esie.

¹³ Ŋwan oro oyom idet erɔŋ ye flax, onyuŋ ada ubɔk anam mmɔ ke ofuri ima esit.

¹⁴ Enye ebiet ubom mbon-urua; ada udia esie ke anyan ebiet edi.

¹⁵ Adaha ke enyɔŋ ke edide kaŋa okoneyo, ɔnɔ ufɔk esie udia, ɔnɔ nditɔ-iban esie udeme.

¹⁶ Ese iŋwaŋ, ndien edep enye: ada mfri ubɔk esie ɔtɔ iŋwaŋ-vine.

¹⁷ Enye ɔbɔbɔ odudu ke isin esiemɔ; onyuŋ anam ubɔk esiemɔ ɔsɔŋɔ.

¹⁸ Otim okut ete ke urua imɔ ɔmɔfɔn: utuenikaŋ esie inimeke ke okoneyo.

¹⁹ Enye anyan ubɔk odori ke eto-ufiak-ndidi: eka-ubɔk esie onyuŋ omum afia-isobo.

²⁰ Enye atat ubɔk ɔnɔ mbon ukut ŋkpɔ: onyuŋ anyan ubɔk esie ɔnɔ mme ubuene.

²¹ Enye ifeheke ndik snow ibaŋa ufɔk esie: koro ofuri ufɔk esie esinede purple.

²² Enye anam ɔfɔŋ o-bed ɔnɔ idem esie; eti linen ye ididuot edi edisine-ŋkpɔ esie.

²³ Ediɔŋɔ ebe esie ke inua-otop, ke ini enye etiede ye mbiowo obio.

²⁴ Enye (ŋwan) anam ɔfɔŋidem, onyuŋ anyam; onyuŋ ɔnɔ mbon-urua ubɔp-isin.

²⁵ Edisine-ŋkpɔ esie edi odudu ye uyai; enye onyuŋ akpa imam abaŋa ini iso.

²⁶ Enye ada ifiɔk atat inua esie; ewuhɔ ima onyuŋ odoro enye ke edeme.

²⁷ Enye otim ese ido ufɔk esiemɔ, inyuŋ idiaha udia ifu.

²⁸ Nditɔ esie edaha ke enyɔŋ ekɔm enye, ebe esie ŋko onyuŋ otoro enye.

²⁹ “Ediwak iban emenam eti; edi afo akan mmɔ kpukpru.”

³⁰ Mfɔnidem edi nsu, uyai onyuŋ edi ikpikpu edi eyetoro ŋwan eke abakde Jehovah.

³¹ Mbufo eda mfri ubɔk esie enɔ enye; ndien utom esie eyetoro enye ke inua-otop.