MME ŊKE 27 - Edisana ñwed Abasi Ibom

¹ KUBURE mbure ubaŋa mkpɔŋ: koro afo mufiɔkke se usen kiet edimande.

² Yak owo efen otoro fi, okudi inua fo: yak edi esen owo, okudi mkpɔk-inua fo.

³ Itiat ke odobi, ntan onyuŋ edi mbiomo; edi iyatesit ndisime odobi akan mbiba.

⁴ Iyaresit edi mfiomo: ifiopesit onyuŋ edi ibumere; edi anie ekeme ndida ke iso ufup?

⁵ Atatai nduari ɔfɔn akan ndibe ima.

⁶ Mme unan eke ufan ɔnɔde edi akpanikɔ: edi ntim-inua usua ewak ekaha.

⁷ Owo eke ɔyuhɔde eyedigi aran-ɔkwɔk ke ukot: ndien kpukpru ndot-ndot ŋkpɔ eniŋe owo ɔbiɔŋ.

⁸ Ntarusuŋ eke oyode ɔkpɔŋ efɔk esie, ebiet owo eke oyode ɔkpɔŋ ebiet esie.

⁹ Aran ye ufuɔŋkpɔ enem owo esit: kpa ntre ŋko ke ima ufan eke otode ke ɔwɔŋ esit.

¹⁰ Kukpɔŋ ufan fo ye ufan usɔ: kunyuŋ uduk ke ufɔk eyen uso ke usen ukut fo: owo eke oduŋde ɔtɔ kiet ɔfɔn akan eyen-ete eke odude nsan-nsan.

¹¹ Eyen mi, nyene ibuot, nyuŋ dat mi esit, man ŋkut se ndibɔrɔde owo eke osuŋide mi.

¹² Ɔniɔŋ okut idiɔk-ŋkpɔ, ndien odibe: mme ɔkɔi ebe iso, ndien esio isop.

¹³ Bɔ owo ɔfɔŋ idem esie ke enye etiede ubiɔŋ ɔnɔ esen owo: nyuŋ mum enye ukat baŋa ŋwan idut.

¹⁴ Owo ama abak ke usenubɔk ɔkɔm ufan esie ke ɔkpɔsɔŋ uyo: eyebat oro ke isuŋi enɔ enye.

¹⁵ Mmɔŋ eke osuk ɔtɔtɔi ke usen edim, ye ŋwan utɔk, edi ŋkpɔ kiet.

¹⁶ Odip enye odip ofum: aran ubɔk nnasia esie onyuŋ ofiori.

¹⁷ Ukwak aban ukwak ɔsɔp: owo onyuŋ anam iso ufan esie ɔsɔŋ.

¹⁸ Owo eke ekpemede eto fig eyedia mfri esie: ndien owo eke ebetde ete esie eyenyuŋ ada ukpono.

¹⁹ Nte iso ekemde iso ke mmɔŋ: kpa ntre ke esit ekem esit.

²⁰ Obio ekpo ye nsobo iyuhɔke: kpa ntre ke enyin owo inyuŋ iyuhɔke.

²¹ Eso odomo silver, furnace onyuŋ odomo gold: kpa ntre yak owo odomo inua eke etorode enye.

²² Ada eyen-uruŋ otim ndisime owo ke uruŋ ke otu editim ibokpot, ebiɔ esie idikpɔŋke enye.

²³ Diɔŋ se ŋkpri ufene fo iso: nim ibuot ke mme enaŋ fo:

²⁴ Koro inyene midibigike ke nsinsi: idem anyanya midinyuŋ ibigike ke ofuri emana.

²⁵ Nnyanyaŋa ebe, ndien ekut mbiet, enyuŋ etaŋ ikɔŋ ikpɔ obot.

²⁶ Nditɔ-erɔŋ edi edisine-ŋkpɔ fo: mme okpo ebot enyuŋ edi ekɔm-urua iŋwaŋ.

²⁷ Ndien mmɔŋ-eba ebot eyekem ke udia fo, ye ke udia ufɔk fo, ye ke uwem nditɔ-iban fo.