MME ŊKE 25 - Edisana ñwed Abasi Ibom

Mme Ŋke Efen Emi Solomon Eketiŋde

¹ MME mmɔ emi enyuŋ edi ŋke Solomon, emi ikɔt Hezekiah edidem Judah ekekaŋade esin ke ŋwed.

² Ndidip ŋkpɔ edi ubɔŋ Abasi: edi ndiyarare ŋkpɔ edi ubɔŋ edidem.

³ Enyɔŋ koro okoŋde, ye isɔŋ koro ɔtuŋɔde, ye esit ndidem, inyeneke eriyarare.

⁴ Sio mbuk ke silver fep; ndien ŋkpɔ eyewɔrɔ ɔnɔ anditara:

⁵ Sio mme idiɔk owo ke iso edidem fep, ndien ebekpo esie eyesɔŋɔ ada ke eti ido.

⁶ Kutaŋ idem ke iso edidem, kunyuŋ uda ke ebiet ikpɔ owo:

⁷ Koro ɔfɔnde nte edɔhɔde fi, ete, “Dɔk di ken,” akan nte esuhɔrede fi ke iso ɔbɔŋ emi enyin fo ekutde.

⁸ Kusɔp uwɔrɔ utɔk, mbak afo edinam ŋkpɔ ke utit, adaŋemi mbɔhiduŋ fo esinde fi but.

⁹ Kpekpe ikɔ fo ye mbɔhiduŋ fo: edi kuyarare ikɔ idibi owo efen:

¹⁰ Mbak owo eke okopde edisuŋi fi, ndien idiɔk etop fo idikpɔŋke fi.

¹¹ Ikɔ eke etiŋde ke ekem ini, edi apple o-gold ke usan e-silver.

¹² Enyene-ibuot owo eke ɔtuŋɔde ke utɔŋ eke okopde, edi mkpanuen o-gold, ye mbana-ŋkpɔ ata eti gold.

¹³ Nte mbit-mbit snow ke ini ukpeŋe, kpa ntre ke isuŋ akpanikɔ etie ye mmɔ eke edɔŋde enye utom: enye onyuŋ ɔdɔŋ mme ete esie esit.

¹⁴ Obubit enyɔŋ ye ofum eke minyeneke edim, ebiet owo eke oburede ke enɔ abiaŋa.

¹⁵ Anyan ime esin ɔbɔŋ onyime: mmem-mmem edeme onyuŋ obuŋ ɔkpɔ.

¹⁶ Afo ama okut aran-ɔkwɔk, dia se ikemde fi: mbak ediyuhɔ, ndien ɔkpɔhi enye.

¹⁷ Kuyɔrɔ ke ufɔk mbɔhiduŋ fo; mbak afo ediyuhɔ enye, ndien enye asua fi.

¹⁸ Owo eke ɔbɔrɔde ikɔ nsu abaŋa mbɔhiduŋ esie, edi hammer, ye ofut, ye edisɔp idaŋ:

¹⁹ Mbuɔtidem ye owo nsu ke ini ukut ebiet edet eke ɔbuŋɔde, ye ukot eke ekeherede.

²⁰ Nte owo eke ɔbɔde owo edisine-ŋkpɔ ke usen tuep, nte vinegar abuahade natron, kpa ntre ke owo eke ɔkwɔde ikwɔ ɔnɔ esit mfuhɔ, etie.

²¹ Edieke biɔŋ ɔdɔŋde usua fo, nɔ enye udia adia; edieke itɔŋ onyuŋ asatde enye, nɔ enye mmɔŋ ɔŋwɔŋ:

²² Koro afo eyebok enye mbubek ikaŋ ke ibuot: ndien Jehovah eyenɔ fi usiene.

²³ Ofum edere aman edim: kpa ntre ke ikɔ-edem aman mbɔp-iso.

²⁴ Ɔfɔn nditie ke enyɔŋ ɔkɔm, akan ndiduŋ ye ŋwan utɔk ke ufɔk ebuana.

²⁵ Nte mbit-mbit mmɔŋ etiede ye itɔŋ eke asatde, kpa ntre eti uyo eke otode anyan idut etie.

²⁶ Idim eke etimerede, ye obube mmɔŋ eke abiarade, ebiet eti owo eke ɔduɔde ke iso idiɔk.

²⁷ Ifɔnke ndidia aran-ɔkwɔk ŋkaha: owo ndiyom ukpono idem-mmɔ inyuŋ idige ukpono.

²⁸ Owo eke mimumke esit esie ikama, ebiet obio eke owurede anan ibibene.