MME ŊKE 14 - Edisana ñwed Abasi Ibom

Mme Ŋke Solomon

¹ ENYENE-IBUOT aŋwan ɔbɔp-ufɔk esiemɔ: edi ndisime owuri ufɔk ke ubɔk esie.

² Owo eke eneŋerede ido esie asaŋa, abak Jehovah: edi owo eke akwaŋde ido esie ese Enye ke ndek.

³ Eto iseri odu ndisime owo ke inua: edi mkpɔk-inua mme ɔfiɔk-ŋkpɔ owo eyekpeme mmɔ.

⁴ Ke enaŋ miduhe, ekebe ana ukpɔk: edi nsɔŋidem enaŋ esin mbuŋwum ɔtɔt.

⁵ Ntiense akpanikɔ idiyokke nyok: edi ntiense nsu eyeyok nyok.

⁶ Ɔsɔŋ enyin oyom eti ibuot, ndien ikwe: edi ifiɔk ekpekpere asian.

⁷ Daha kpɔŋ iso ndisime owo, ke afo mukwe ifiɔk ke inua esie.

⁸ Eti ibuot owo ifiɔk ɔdiɔŋɔ usuŋ esie: edi ebiɔ ndisime edi abiaŋa.

⁹ Idiɔk ido ada ndisime owo esin ke nsahi: edi ufɔn (Abasi) odu ke otu nti owo.

¹⁰ Esit owo ɔfiɔk mfuhɔ esiemɔ: ndien esen owo inɔhɔke ke idara esie.

¹¹ Eyesobo ufɔk mme idiɔk owo: edi ataya mbon eti ido eyetara.

¹² Enyene usuŋ eke enende ke iso owo: ndien utit esie edi usuŋ mkpa.

¹³ Idem imam esin esit ayat owo: ndien utit idem idara edi nnanenyin.

¹⁴ Eyeda usuŋ andifiak edem ke esit eyuhɔ enye: edi eti owo isaŋake kiet ye enye.

¹⁵ Ɔkɔi ese kpukpru ikɔ ke akpanikɔ: edi ɔniɔŋ otim ese ikpat isaŋ esiemɔ.

¹⁶ Enyene-ibuot owo efehe ndik, onyuŋ ɔwɔŋɔre ɔkpɔŋ idiɔk: edi ndisime owo eseri iseri, onyuŋ ɔsɔŋ enyin.

¹⁷ Owo eke ɔsɔpde ndiyat esit anam ndisime: enyuŋ esua owo idiɔk ekikere.

¹⁸ Mme ɔkɔi edia akpa ebiɔ: edi mbon ɔniɔŋ eyara ifiɔk nte anyanya.

¹⁹ Mme idiɔk owo enuhɔ ke iso nti: mme anam-idiɔk enuhɔ ke inua-otop owo edinen ido.

²⁰ Idem mbɔhiduŋ ubuene esua enye: edi ɔbɔŋ enyene ediwak ufan.

²¹ Owo eke esede mbɔhiduŋ esie ke ndek anam idiɔk: ama edi owo eke atuade mme ubuene mbɔm, ɔfɔfɔn ɔnɔ enye.

²² Nte mmɔ eke ekerede ukwaŋ-ŋkpɔ iwahake ikpɔŋ usuŋ? Edi mmɔ eke ekerede eti ŋkpɔ edi mbon mfɔnido ye eke akpanikɔ.

²³ Ke kpukpru oruk utom enyene udori: edi ikɔ inua aka ke ubuene ikpɔŋ-ikpɔŋ.

²⁴ Anyanya mbon eti ibuot edi inyene mmɔ: edi ubɔŋ mbon ndisime edi ebiɔ.

²⁵ Ntiense akpanikɔ anyaŋa ukpɔŋ edi ntiense abiaŋa osu nsu.

²⁶ Ɔkpɔsɔŋ iberedem odu ke uteŋe Jehovah: ndien nditɔ esie eyenyene ubɔhɔ.

²⁷ Uteŋe Jehovah edi idim uwem: man owo ɔwɔŋɔre ɔbɔhɔ afia mkpa.

²⁸ Uwak owo edi ubɔŋ edidem: edi unana owo edi nsobo ɔbɔŋ.

²⁹ Owo eke misɔpke iyaresit enyene akwa asian: edi owo ifiopesit emenere ndisime ke enyɔŋ.

³⁰ Suŋ suŋ esit edi uwem obuk-idem, edi ufup edi nyap ɔkɔp.

³¹ Owo eke efikde eyen ubuene esue Andibot enye: edi atua ubuene mbɔm okpono Enye.

³² Idiɔk ido idiɔk owo onuk enye efep: edi eti owo enyene mbuɔtidem ke mkpa esie.

³³ Mbufiɔk oduŋ ke esit asian: edi eyeyarare se idude ke esit mbon ndisime.

³⁴ Nti ido efori obio: edi idiɔk ido esin obio enyene but.

³⁵ Ofin eke enyenede ibuot enem edidem esit: edi oburobut ofin ayat enye esit.