MME ŊKE 11 - Edisana ñwed Abasi Ibom

Mme Ŋke Solomon

¹ JEHOVAH abat nsunsu balance ke mbubiam: edi ukem-ukem itiat enem enye esit.

² Iseri edi but edi ŋko: edi eti ibuot odu ye mme osuk idem.

³ Akpanikɔ mbon eti ido eyeteme mmɔ usuŋ: edi ukwaŋ-ido mme osu-nsu eyesobo mmɔ.

⁴ Inyene ididoroke ke usen iyaresit: edi eti ido osio owo ke mkpa.

⁵ Eti ido mmɔ eke efɔnde ema eyeneŋere usuŋ mmɔ onim: edi idiɔk owo eyeduɔ ke idiɔk ido esie.

⁶ Eti ido mbon edinen ido eyenyaŋa mmɔ: edi mme osu-nsu eyesike ke idiɔk mbumek mmɔ.

⁷ Ke ini idiɔk owo akpade, idorienyin esie eyetak: se mme oburobut owo etiede ebeŋe onyuŋ atak.

⁸ Eyesio owo eke enende ke nnanenyin efep, ndien idiɔk owo eyeduk ke itie esie.

⁹ Oburobut owo ada inua abiat mbɔhiduŋ esie: edi ifiɔk nti owo esin mmɔ ebɔhɔ.

¹⁰ Ke ini ɔfɔnde ye nti owo, obio adaresit: ndien ke ini mme idiɔk owo etakde, idara odu.

¹¹ Obio oforo ke ufɔn nti owo: edi enye owure ke inua mme idiɔk owo.

¹² Owo eke esuede mbɔhɔ-iduŋ esie anana ibuot: edi owo asian okubi inua.

¹³ Mbia ayayarare ikɔ idibi: edi owo spirit akpanikɔ odip ŋkpɔ.

¹⁴ Unana item esin obio ɔduɔ: edi ifure odu ke uwak mbon-item.

¹⁵ Idifɔnke fɔn ye owo eke etiede ubiɔŋ ɔnɔ esen owo: edi eyefure owo eke asuade mmia-ubɔk.

¹⁶ Ediye aŋwan omum ubɔŋ akama: kpa nte nyara owo emumde inyene ekama.

¹⁷ Owo mfɔnido anam se ɔfɔnde ye ukpɔŋ esiemɔ: edi owo afai ɔtuhɔ obukidem esie.

¹⁸ Idiɔk owo anam utom ikpikpu: edi owo eke ɔtɔde eti ido itreke ndidia utip.

¹⁹ Nte eti ido asaŋade ke uwem: kpa ntre ŋko ke owo eke ebinede idiɔk ido asaŋa etiene mkpa esie.

²⁰ Jehovah ese mme akwaŋa esit ke mbubiam: edi mmɔ eke eneŋerede usuŋ mmɔ enem enye esit.

²¹ Ubɔk okposobo ye ubɔk, idiɔk owo idibɔhɔke: edi ubon nti owo eyebɔhɔ.

²² Mkpanuen o gold ke ibuo edi ebiet uyai ŋwan eke awahade ɔkpɔŋ ɔniɔŋ.

²³ Se nti owo eyomde osuk ɔfɔfɔn: se mme idiɔk etiede ebeŋe edi iyaresit.

²⁴ Enyene owo eke asuande, ndien enye ɔdɔdiɔŋ ɔtɔt; ndien owo eke afamde akan nte enende, osuk akabare obuene.

²⁵ Ukpɔŋ eke ɔfɔnde ido eyetim ɔyuhɔ: ndien edi andinɔ mmɔŋ edikut mmɔŋ.

²⁶ Mbio-obio eyesuŋi owo eke esinde ibokpot: edi mfɔn eyedoro ke ibuot owo eke anyamde.

²⁷ Owo eke abakde oyom eti ŋkpɔ eye-bine mfɔn: ndien ama edi owo eke oyomde idiɔk-ŋkpɔ, idiɔk eyesim enye.

²⁸ Owo eke ɔbuɔtde idem ke inyene esie eyeduɔ: edi nti owo eyesiaha nte ikɔŋ.

²⁹ Owo eke ɔtuhɔde ufɔk esiemɔ eyedia ofum: ndien ndisime owo akabare edi ofin owo eti ibuot.

³⁰ Mfri eti owo edi eto uwem; ndien eyene-ibuot owo omum ukpɔŋ.

³¹ Edieke edinamde eti owo usiene ke ererimbot; ŋwaŋwa ediso mme idiɔk owo ye mme oburobut owo.