MME ŊKE 10 - Edisana ñwed Abasi Ibom

Mme Ŋke Solomon: Ukpuhɔre Emi Odude ke Eti Owo ye Idiɔk Owo

¹ ENYENE-IBUOT eyen adat ete esit: edi ndisime eyen edi mfuhɔ eka esie.

² Inyene idiɔk ido idoroke: edi edinen ido osio owo efep ke mkpa.

³ Jehovah idiyakke ukpɔŋ eti owo etie biɔŋ: edi eyesin udɔŋ mme idiɔk owo.

⁴ Owo eke ɔnuɔnde ubɔk-utom obuene: edi ubɔk mbon ifik ɔkɔ inyene.

⁵ Owo eke ɔkɔde ŋkpɔ ke ndaeyo edi enyene-ibuot eyen: edi okuni idap ke ini idɔk edi oburobut eyen.

⁶ Ufɔn odoro eti owo ke ibuot: edi inua mme idiɔk owo odip afai.

⁷ Ke ini etide eti owo, eyetoro enye: edi enyiŋ mme idiɔk owo eyebu.

⁸ Enyene-ibuot owo ebet mbet; edi ababara inua eyeduɔ ibuot ibuot.

⁹ Owo eke eneŋerede asaŋa asaŋa ke ifure: edi owo eke akwaŋade ido esie eyeyarare.

¹⁰ Owo eke oyipde enyin esin afanikɔŋ: ndien ababara inua eyeduɔ ibuot-ibuot.

¹¹ Inua eti owo edi idim uwem: edi inua mme idiɔk owo odip afai.

¹² Usua edemere utɔk: edi ima ofuk kpukpru ndudue.

¹³ Ekut mbufiɔk ke inua asian: ndien eto enyene edem anana-ibuot.

¹⁴ Mbon eti ibuot ebok ifiɔk: edi inua mbon ndisime edi nsobo eke ekperede.

¹⁵ Inyene ɔbɔŋ edi ɔkpɔsɔŋ obio esie: nsobo mme ubuene edi unana mmɔ.

¹⁶ Utom eti owo asaŋa ke uwem: udori mme idiɔk owo asaŋa ke idiɔk.

¹⁷ Owo eke ekpemede ntunɔ edi usuŋ uwem: edi owo eke etrede ndisua nnɔ anam owo edue.

¹⁸ Owo eke odipde usua edi owo inua nsu: ndien etiŋ ikɔ-edem onyuŋ edi ndisime.

¹⁹ Awak ikɔ inua itreke ndidue: edi owo eke omumde mkpɔk-inua esie akama edi ɔniɔŋ.

²⁰ Edeme ndinen owo edi edimek silver: esit mme idiɔk owo edi obukpo.

²¹ Mkpɔk-inua owo eti ido ebɔk ediwak owo: edi mbon ndisime ekpaŋa ke unana-ibuot.

²² Edi ufɔn Jehovah ofori owo, enye inyuŋ idianke afanikɔŋ ke esit.

²³ Edi ndisime owo abat erinam ibak ke mbre; edi owo eti ifiɔk enyene mbufiɔk.

²⁴ Se idiɔk owo efehede, oro edisim enye: edi eyenɔ se nti owo eyomde.

²⁵ Nte oyobio ebede, kpa ntre idiɔk owo ididuhe aba: edi ama edi eti owo, nsinsi itie odu.

²⁶ Nte vinegar ke edet, ye nsuŋikaŋ ke enyin, kpa ntre ke ɔnuɔn etie ye mmɔ eke edɔŋde enye utom.

²⁷ Uteŋe Jehovah eyenam usen owo ewak; edi eyemuhɔ isua mme idiɔk owo.

²⁸ Idorienyin mbon eti ido edi idaresit: edi se mme idiɔk owo ebetde eyetak.

²⁹ Usuŋ Jehovah edi ɔkpɔsɔŋ iduŋ owo eke ɔfɔnde ama: edi nsobo ana ɔnɔ mme anam idiɔk.

³⁰ Nti owo idisehekede ke nsinsi: edi mme idiɔk owo ididuŋke isɔŋ.

³¹ Inua nti owo osioŋo mbufiɔk: edi eyesibe ukwaŋ edeme efep.

³² Mkpɔk-inua eti owo efiɔk inem: edi inua mme idiɔk owo akwaŋa ikɔ.