MME ŊKE 1 - Edisana ñwed Abasi Ibom

Ufɔn Owo Nditiŋ Ikɔ ke Ŋke

¹ MME ŊKE Solomon, eyen David, edidem Israel;

² Man owo enyene ifiɔk ye eti ibuot ye item; man otim ɔfiɔk ikɔ asian;

³ Man owo ada item mbufiɔk, eti ido, ye ikpe, ye se inende;

⁴ Man enɔ ɔkɔi ɔniɔŋ, esin eyenɔwɔŋ ifiɔk ye nti ekikere.

⁵ Enyene-ibuot owo eyekop, onyuŋ ɔkɔrɔ ke se ekpepde; asian owo eyenyuŋ enyene ikike:

⁶ Man enye otim ɔfiɔk ŋke, ye ŋkim-ŋkim ikɔ: ikɔ mme ɔfiɔk-ŋkpɔ, ye uyaŋa ikɔ mmɔ.

⁷ Uteŋe Jehovah edi akpan ifiɔk: mbon ndisime ese eti ibuot ye item ke ndek.

⁸ Eyen mi, kop item usɔ, kunyuŋ ukpɔŋ mbet uka:

⁹ Koro mmɔ eyedi ediye anyanya ke ibuot fo, ye obukpe ke itɔŋ fo.

¹⁰ Eyen mi, mme idiɔk owo ekpetap fi, kunyime.

¹¹ Ekpedɔhɔ fi, ete, “Tiene nnyin, yak idibe ibet iyip, itie ibet owo eke minyeneke se eduede, ndien edi ikpikpu.

¹² Imen mmɔ ndisi nte udi; ye mfuri nte mmɔ eke esuhɔrede ke obube.

¹³ Nnyin iyekut kpukpru oruk ŋkpɔ-uto, iyedɔŋ mbume ke ufɔk nnyin iyɔhɔ:

¹⁴ Duk nduk ke otu nnyin; yak nnyin kpukpru ibuana ekpat kiet.”

¹⁵ Eyen mi, kusaŋa ke usuŋ ye mmɔ; sio ukot fo fep ke afaŋ mmɔ:

¹⁶ Koro ukot mmɔ efehede etiene idiɔk, enyuŋ esɔp ndiduɔk iyip.

¹⁷ Koro ke ikpikpu ke eduɔk mukanda ke iso inuen ekededi.

¹⁸ Edi mme mmɔ edibe ebet iyip idem mmɔ; etie ebet ukpɔŋ idem mmɔ.

¹⁹ Mme usuŋ kpukpru mmɔ eke mbume ɔdɔŋde mmɔ, etie ntem; enye (mbume) ɔbɔ andinyene enye uwem.

²⁰ Eti ibuot ofiori ke esien; emenere uyo esie ke aŋwa:

²¹ Enye ada okot ke mbuot efak, ke mme inua-otop: ke obio ke enye etiŋ ikɔ esiemɔ, ete,

²² Adaŋa didie ke mbufo mme ɔkɔi edima ɔkɔi? Nsahi edinyuŋ enem mbon nsahi, ndisime edinyuŋ esua ifiɔk?

²³ Mbufo ekabare ke nduari mi: sese, nyeŋwaŋa spirit mi nduɔk mbufo ke idem, nyenam mbufo efiɔk ikɔ mi.

²⁴ Koro ami ŋkokotde, ndien mbufo esin; ŋkanyan ubɔk mi, ndien baba owo kiet eke esede iduhe;

²⁵ Ndien mbufo ema eduɔk kpukpru item mi, inyuŋ inyimeke nduari mi:

²⁶ Ami ŋko nyesak ke ini nnanenyin mbufo; nyenyuŋ mbiaŋa ke ini ndik anamde mbufo;

²⁷ Ke ini ndik mbufo edidide nte oyobio, nsobo mbufo edinyuŋ edide nte idio; ke ini ukut ye ndutuhɔ edisimde mbufo.

²⁸ Ke ini oro mmɔ eyeseme ekot mi, edi ndiyereke; eyebak eyom mi, ndien idikwe mi.

²⁹ Koro mmɔ ekesuade ifiɔk, minyuŋ imekke nditiene Jehovah:

³⁰ Mmɔ ikonimke item mi: ese kpukpru nduari mi ke ndek.

³¹ Ndien mmɔ eyedia mfri usuŋ mmɔ; eyenyuŋ eyuhɔ ke uduak mmɔ.

³² Koro ukabare mme ɔkɔi eyewot mmɔ, mfre-idem ndisime owo eyenyuŋ osobo mmɔ.

³³ Edi owo eke okopde uyo mi eyeduŋ ke ifure, eyenyuŋ etie suŋ anana ndik idiɔk ŋkpɔ.