MME HEBREW 12 - Edisana ñwed Abasi Ibom

Ntunɔ Abasi

¹ MMƆDO, sia otu ntiense eke ewakde ntem ekande nnyin ekuk, eyak nnyin nde ikpɔnɔre kpukpru mbiomo inim ŋkaŋ kiet, ye idiɔk-ŋkpɔ eke eyirede nnyin ke kpukpru edem; enyuŋ eyak ifehe mbuba eke anade nnyin ke iso ye ime,

² iwuk enyin ise Jesus Anditɔŋɔ mbuɔtidem nnyin ye Andinam enye ɔfɔn ama; emi okobiomde cross, onyuŋ abatde but ke ekpri ŋkpɔ, kabaŋa idaresit eke anade Enye ke iso; okonyuŋ ɔsuhɔrede etetie ke ubɔk nnasia ebekpo Abasi.

³ Ese Enye emi okobiomde oruk idiɔk ndutiŋ oro mme idiɔk owo etiŋde edian Idem Esie, mbak mbufo edikpa mba, ekop mmem-idem ke ukpɔŋ.

⁴ Mbufo ika-ŋwanake kaŋa tutu eduɔk iyip ke eŋwan mbufo ye idiɔk-ŋkpɔ.

⁵ Emonyuŋ efre item, emi enemede ye mbufo nte nditɔ-ete, Eyen mi, kubat ntunɔ Jehovah ke ekpri ŋkpɔ, Kunyuŋ uyemere ke ini Enye asuade ɔnɔ fi.

⁶ Koro Jehovah ɔtunɔ owo eke Enye amade, Onyuŋ amia eyen eke Enye adarade ufen.

⁷ Mbufo ebiom ukut man edi ntunɔ ɔnɔ mbufo; Abasi anam ye mbufo nte nditɔ; koro ewe eyen odu eke ete mitunɔke?

⁸ Edieke mbufo mikwe ntunɔ eke kpukpru nditɔ enyenede udeme ke esit, mbufo edi nditɔ akpara, idige ata nditɔ.

⁹ Akan oro, nnyin imenyene mme ete obukidem emi eketunɔde nnyin, ndien nnyin iteŋe mmɔ: nte nnyin idisukke ibuot inɔ Ete mme spirit ikan, inyuŋ idu uwem?

¹⁰ Koro ke akpanikɔ mmɔ oro ekɔtunɔ nnyin usen ifaŋ, nte mmɔ ekutde ete ɔfɔn; edi Abasi ɔtunɔ nnyin oyom udori nnyin, man nnyin inyene udeme ke edisana ido Esie.

¹¹ Idahemi kaŋa kpukpru ntunɔ itiehe inem-inem, edi ababiak; edi ke ukperedem, enye oŋwum mfri emem ɔnɔ mmɔ emi ekebede ke nsiŋere esie, kpa mfri edisana ido.

¹² Mmɔdo esɔŋɔ ubɔk eke ema ekemem mbufo, ye edɔŋ eke ema ekedoro ibikpai;

¹³ enyuŋ esiak afaŋ eke enende enɔ ikpat mbufo, man ukot eke edide mbuŋɔ ekufebede, edi ekam enam mmɔ ekop nsɔŋidem.

¹⁴ Etiŋ enyin esaŋa ke emem ye kpukpru owo; enyuŋ esaŋa ke edisana ido; koro esiode oro efep, baba owo kiet idikwe Ɔbɔŋ.

¹⁵ Etim ese mbak owo ekededi editaba mfɔn Abasi; mbak oruŋ eke edide ndot-ndot editibe otimere mbufo, onyuŋ asabare ediwak owo ke otu mbufo;

¹⁶ mbak owo use edidu ke otu mbufo, mme oburobut owo nte Esau, emi akanyamde itie-akpan esie ke ekpri esisit udia.

¹⁷ Mbufo efiɔk ete, ke ukperedem, ke ini enye okoyomde ndibɔ eridiɔŋ nda, ekpɔnɔre enye enim ke ŋkaŋ kiet (enye ikonyuŋ ikwe ifet ndikabare esit), okposuk edi nte oyomde eridiɔŋ oro ye mmɔŋeyet.

¹⁸ Koro mbufo ikasaŋake ikpere se owo ekemede ndituk ke ubɔk, ye ikaŋ eke asakde, ye obubit enyɔŋ, ye ekim, ye oyobio, ye uyo ukorowo, ye uyo ikɔ;

¹⁹ eke mme andikop ekpede ubɔk ete, ekutiŋ aba enɔ mme imɔ:

²⁰ koro mmɔ mikemeke ndibɔ ewuhɔ emi enɔde, ete, Edieke kpa unam otukde obot oro, eyetɔŋɔ enye ke itiat ewot.

²¹ Ofuri ebiet ekenyene ndik eti-eti ndise, tutu Moses ɔdɔhɔ ete, Ŋkop ndik, nnyuŋ nnyek idem eti-eti.

²² Edi mbufo ekesaŋa ekpere Obot Zion, ye Obio Abasi uwem kpa Jerusalem enyɔŋ, ye ata ediwak angel, ye akwa esop ye ufɔk Abasi eke mmɔ emi edide ikpan,

²³ emi ewetde enyiŋ mmɔ ke heaven; enyuŋ esaŋa ekpere Abasi, Ebierikpe ofuri ekondo, ye mme spirit ndinen owo emi enamde mmɔ efɔn ema,

²⁴ ye Jesus emi edide esine-ufɔt obufa ediomi, ye erisime iyip, eke etiŋde se ifɔnde ikan iyip Abel.

²⁵ Ekpeme ekusin ndikop Enye emi etiŋde ikɔ ɔnɔ mbufo. Koro edieke mmɔ emi ekesinde uyo anditiŋ ikɔ nnɔ mmɔ ke isɔŋ mikɔbɔhɔke; nnyin idibɔhɔkebɔhɔ ikan oro, edieke nnyin iwɔŋɔrede ikpɔŋ Enye emi etiede ke heaven etiŋ ikɔ.

²⁶ Uyo Esie ekenyeŋe isɔŋ adaŋoro; edi ke emi Enye ɔŋwɔŋɔ ete, Osuk kaŋa esisit, ndien Ami nyenyeŋe isɔŋ ye enyɔŋ ŋko.

²⁷ Ikɔ oro ɔdɔhɔde ete, Osuk kaŋa esisit, ɔwɔrɔ ete, eyemen se idide nyek-nyek efep, nte ŋkpɔ eke ekebotde, man mme ŋkpɔ eke midige nyek-nyek esuhɔ.

²⁸ Mmɔdo sia nnyin inyenede Obio Ubɔŋ eke ŋkpɔ mikemeke ndinyeŋe, yak nnyin inyene esit ekɔm, inyuŋ ida emi inɔ Abasi, utom eke enemde Enye esit ke ukpono ye uteŋe.

²⁹ Koro Abasi nnyin edi ikaŋ eke atade ta.