MME HEBREW 10 - Edisana ñwed Abasi Ibom

Christ Ada Uwa Kiet Anam Nnyin Ifɔn Ima ke Nsinsi

¹ SIA ibet enyenede ukpɔŋ-ukpɔŋ mbiet nti ŋkpɔ eke edidide, minyuŋ inyeneke idem ŋkpɔ oro, ikemeke ndinam mmɔ emi esaŋade edi ediwa oruk uwa kiet kpukpru ini ke isua ke isua efɔn ema.

² Edieke ekpekemede, idige ekpetre ndiwa uwa adaŋemi, koro mmɔ emi etuakde ibuot enɔ Abasi ikpenyeneke aba ifiɔk idiɔk-ŋkpɔ ke esit mmɔ, sia ema ekenam mmɔ esana?

³ Edi eda mme uwa oro enam owo eti mme idiɔk-ŋkpɔ ke isua ke isua.

⁴ Koro iyip enaŋ ye ebot ikemeke-keme ndimen mme idiɔk-ŋkpɔ mfep.

⁵ Mmɔdo ke adaŋemi Enye odukde ke ererimbot, Enye ɔdɔhɔ ete, Afo umaŋa uwa ye enɔ, Afo emebeŋe ikpɔhidem ɔnɔ Mi;

⁶ Afo ukopke inemesit ke ofuri edifɔp-uwa ye uwa idiɔk ido:

⁷ Ntre ke ndɔhɔ nte, Sese, mmedi (Ewet ebaŋa Mi ke ikpaŋwed) Ndinam uduak Fo, O Abasi.

⁸ Ke ini Enye ama ekebem iso ɔdɔhɔ ete, Afo umaŋa unyuŋ ukopde inemesit ke uwa ye enɔ ye ofuri edifɔp-uwa ye uwa idiɔk ido (emi ibet etemede ete ewa),

⁹ Enye edidɔhɔ ndien ete, sese, mmedi ndinam uduak Fo, Enye emen akpa ŋkpɔ efep, man Enye ɔtɔ udiana ŋkpɔ.

¹⁰ Ema eda uduak emi enam nnyin isana ke eriwa emi Jesus akawade ikpɔhidem Esie ini kiet.

¹¹ Ke akpanikɔ kpukpru oku eda enam ŋkpɔ enɔ Abasi ke usen ke usen, enyuŋ ewak ndiwa oruk uwa kiet eke mikemeke ndimen mme idiɔk-ŋkpɔ mfep:

¹² edi Oku emi, ke ini Enye ama akawa uwa kiet abaŋa mme idiɔk-ŋkpɔ, ɔsuhɔre etetie ke ubɔk nasia Abasi ke nsinsi:

¹³ ɔtɔnɔre ke ini oro Enye ebebet tutu enam mme asua Esie ekabare edi udori-ukot Esie.

¹⁴ Koro Enye ada uwa kiet anam mmɔ emi ekenimde enɔ Abasi efɔn ema ke nsinsi.

¹⁵ Edisana Spirit onyuŋ edi ntiense ɔnɔ nnyin: koro ke Enye ama ɔkɔdɔhɔ ete,

¹⁶ Jehovah ete, Emi edi ediomi eke ndidiomide ye mmɔ Ke mme usen oro ema ebe; Nyesin mbet Mi ke esit mmɔ, Nyenyuŋ ŋwet mbet Mi ke ɔwɔŋ-esit mmɔ;

¹⁷ Enye edidɔhɔ ndien ete, Ndinyuŋ ntihi aba mme idiɔk-ŋkpɔ mmɔ ye mme ukwaŋ-ido mmɔ.

¹⁸ Ndien ɔtɔ nte ekefende mme idiɔk ido, iwaha aba uwa ibaŋa idiɔk-ŋkpɔ.

¹⁹ Mmɔdo nditɔ-ete, sia nnyin inyenede uko ndibe nduk ke Edisana Ebiet ke iyip Jesus,

²⁰ ke usuŋ oro Enye okonimde ɔnɔ nnyin, kpa obufa ye odu-uwem usuŋ emi ebede ke ukara, oro edi, obukidem Esie;

²¹ sia inyuŋ inyenede akamba Akwa Oku emi akarade ufɔk Abasi;

²² eyak nnyin isaŋa ikpere ye esit akpanikɔ ke ɔyɔhɔ mbuɔt-idem idem, ye esit eke esimede esio ifiɔk idiɔk-ŋkpɔ efep ye idem eke eyetde ke ata mmɔŋ:

²³ enyuŋ eyak nnyin isɔŋɔ imum ikɔ eke idade iyarare idori-enyin ikama, mbak edibɔhɔ nnyin oyok; koro Enye emi ɔnɔde nnyin uŋwɔŋɔ edi Abasi akpanikɔ:

²⁴ eyak nnyin inyuŋ ikere nte ikpedemerede kiet eken inɔ ima ye nti utom;

²⁵ ikunyuŋ isin ndisop idem ɔtɔ kiet, nte edu ndusuk owo edide, edi inɔ kiet eken item; ndien mbufo ekpedɔdiɔŋ enam ntem, adaŋa nte ekutde ete usen oro ke asaŋa ekpere.

²⁶ Koro edieke nnyin iduede ke nkoi-nnam, ke ini nnyin ima ikɔbɔ ifiɔk akpanikɔ, uwa iduhe aba inɔ idiɔk-ŋkpɔ, edi idori-enyin ikpe eke enyenede ndik,

²⁷ ye ikaŋ-ikaŋ iyaresit eke edifɔbɔde mmɔ emi eŋwanade ye Abasi.

²⁸ Owo eke midaha mbet Moses ikɔm ŋkpɔ akakpa ke uyo ntiense iba me ita, ituaha enye mbɔm;

²⁹ mbufo ese ndien ete edibiere ufen ɔsɔŋ adaŋa didie akan enɔ owo, eke edigide Eyen Abasi ke ikpat, onyuŋ abatde iyip ediomi, emi edade enam enye asana, ke ŋkpɔ ndek, onyuŋ esuenede Spirit mfɔn?

³⁰ Koro nnyin imɔfiɔk Enye emi ɔdɔhɔde ete, Usiene edi okim, nyesio usiene; onyuŋ ɔdɔhɔde ŋko ete, Jehovah eyekpe ikpe ikɔt Esie.

³¹ Edi ata ŋkpɔ ndik ndiduɔ nsine ke ubɔk Abasi emi odude uwem.

³² Edi eti mme usen ini oko, ini oro enyin ekatarade mbufo, mbufo ekenyuŋ ebiomde ɔkpɔsɔŋ ndusihere ndutuhɔ;

³³ ke ŋkaŋ kiet enam mbufo edi ŋkpɔ ndise ke ntak esuene ye ukut; ke ŋkaŋ eken, mbufo ekabare nsaŋa ye mmɔ emi ekutde ukut ntre.

³⁴ Koro mbufo ekatuade mmɔ emi edude ke ŋkpɔkɔbi mbɔm, enyuŋ enyime ke idaresit ete ebume inyene mbufo, sia mbufo efiɔkde ete imenyene inyene eke ɔfɔnde akan onyuŋ ebigide.

³⁵ Mmɔdo ekuyak uko mbufo eduɔk, koro enye asaŋade ye akwa utip.

³⁶ Koro ana nte mbufo enyene ime man ebɔ se Abasi ɔkɔŋwɔŋɔde, ke ema ekenam se Enye amade.

³⁷ Koro osuk ata ekpri esisit, Ndien Enye emi edide eyedi, idinyuŋ ibigike.

³⁸ Edi edinen owo Mi edidu uwem ke mbuɔtidem: Ndien edieke enye edikhede afiak edem, ukpɔŋ Mi idikopke inemesit ke enye.

³⁹ Edi nnyin idige mbon mfiakedem ŋka nsobo; edi idi mmɔ emi ebuɔtde idem isim erinyaŋa ukpɔŋ.