LUKE 9 - Edisana ñwed Abasi Ibom

Jesus Osio Mbet Esie Duopeba Ɔdɔŋ Utom

¹ EKEM Enye okot mbet Esie duopeba obon ɔtɔ kiet, onyuŋ ɔnɔ mmɔ odudu ye unen ndikara kpukpru mme demon, ndiyuŋ nnam mme udɔŋɔ ekure.

² Enye onyuŋ osio mmɔ ɔdɔŋ ekɔkwɔrɔ Ubɔŋ Abasi, enyuŋ enam mbon udɔŋɔ ekop nsɔŋidem.

³ Enye onyuŋ ɔdɔhɔ mmɔ ete, Ekukama baba ŋkpɔ kiet ke isaŋ; ekukama esaŋ, mme ekpat-isaŋ, mme uyo, mme okuk; ekunyuŋ ekama ɔfɔŋ iba-iba.

⁴ Ndien ufɔk ekededi eke mbufo edidukde ke esit, etie do, enyuŋ eto do enyɔŋɔ.

⁵ Edi mbio-obio ekededi eke minyimeke ndidara mbufo, nte ewɔŋɔde ke obio oro, ekeŋ ntan ke ikpat mbufo efep, nte ŋkpɔ-ntiense ubiom-ikpe mmɔ.

⁶ Ndien mmɔ edaha ekasaŋa ke kpukpru obio-iŋwaŋ, ekwɔrɔ gospel, enyuŋ enam udɔŋɔ ekure ke kpukpru ebiet.

⁷ Edi Herod tetrarch okop kpukpru se itibede; ndien ekikere otimere enye eti-eti, koro ndusuk owo edɔhɔde ete, John ama eset ke mkpa;

⁸ edi ndusuk edɔhɔ ete, Elijah ama edi; mmɔ efen ete, Owo kiet ke otu ŋkani prophet ama eset.

⁹ Edi Herod ɔdɔhɔ ete, Mma mbigi John; edi anie edi emi eke ŋkopde utɔ ŋkpɔ emi mbaŋa enye? Ndien ɔdɔŋ enye ndikut Jesus.

¹⁰ Ekem mme apostle efiak edi edimen kpukpru se mmɔ ekanamde ebuk enɔ Jesus. Ndien Enye ada mmɔ ke idem mmɔ ikpɔŋ adaha aka ke obio emi ekerede Bethsaida.

¹¹ Edi ke adaŋemi mme otu owo efiɔkde, mmɔ etiene Enye. Ndien Enye adara mmɔ, onyuŋ etiŋ ikɔ ɔnɔ mmɔ abaŋa Ubɔŋ Abasi, onyuŋ ɔkɔk udɔŋɔ mmɔ emi eyomde nsɔŋ-idem.

¹² Ekem utin ɔtɔŋɔ ndikɔhɔre itɔŋ; ndien mbet Esie duopeba edi edidɔhɔ Enye ete, Dɔŋ otu owo enyɔŋɔ, man eka ekedaŋ ke obio-iŋwaŋ ye iŋwaŋ emi edude ke ŋkan-ŋkuk, enyuŋ ekut se ediade, koro nnyin idu mi ke ebiet desert.

¹³ Enye ɔdɔhɔ mmɔ ete, Mbufo enɔ mmɔ ŋkpɔ edia. Edi mmɔ edɔhɔ ete, Nnyin inyeneke ŋkpɔ ibe uyo ition ye iyak iba; ibɔhɔke ika ikedep udia inɔ adaŋa ediwak owo emi.

¹⁴ Koro mmɔ ekpere thousand iren owo ition ke ibat. Edi Enye ɔdɔhɔ mbet Esie ete, Enam mmɔ esuhɔre etetie ke udim ke udim, owo aba ye duop ke udim kiet.

¹⁵ Mmɔ enam ntre, esin mmɔ kpukpru etetie.

¹⁶ Ndien Enye emen uyo ition ye iyak iba oro, emenere enyin ese enyɔŋ, ɔdiɔŋ mmɔ, onyuŋ obuŋ, ayak ɔnɔ mbet ete, enim otu owo ke iso.

¹⁷ Ndien kpukpru mmɔ edia eyuhɔ; enyuŋ etaŋ mbubek udia eke ɔsuhɔde edɔŋ ke akpan duopeba eyɔhɔ.

¹⁸ Edikem nte Enye ɔbɔŋde akam ikpɔŋ, mbet Esie edu ye Enye: ndien Enye obup mmɔ ete, Mme otu owo edɔhɔ ete Ami ndi anie?

¹⁹ Mmɔ ebɔrɔ ete, John Baptist; edi mmɔ efen ete, Elijah; mmɔ efen ŋko ete, owo kiet ke otu ŋkani mme prophet ama eset.

²⁰ Edi Enye ete mmɔ, Edi mbufo edɔhɔ ete, Ami ndi anie? Peter ɔbɔrɔ ete, Christ eke Abasi.

²¹ Edi Enye ɔnɔ mmɔ uyo onyuŋ owuk mmɔ ete, ekutiŋ ikɔ emi enɔ baba owo kiet:

²² onyuŋ ɔdɔhɔ mmɔ ete, Eyen Owo enyene ndikut ediwak ukut, mbiowo ye ikpɔ oku ye mme scribe eyenyuŋ esin Enye, enyuŋ ewot Enye; ndien Abasi eyenam Enye eset ke ɔyɔhɔ usen ita.

²³ Enye ɔdɔhɔ kpukpru mmɔ ete, Edieke owo ekededi oyomde nditiene Mi, yak enye otuk idem esie, onyuŋ emen cross esie ke usen ke usen etiene Mi.

²⁴ Koro owo ekededi eke ediyomde ndinyaŋa uwem esie eyeduɔk enye; edi owo ekededi eke ediduɔkde uwem esie kabaŋa Mi, kpa owo oro eyenyaŋa uwem esie.

²⁵ Koro nso udori ke owo edinyene edieke enye adiade ofuri ererimbot, edi ɔduɔk idem esie mme ada idem esie osio isop?

²⁶ Koro owo ekededi eke edikopde but ye Ami ye ikɔ Mi, Eyen Owo eyekop but ye enye, ke ini Enye edidide ke ubɔŋ Esie ye Ubɔŋ Ete Esie ye eke ndisana angel.

²⁷ Edi ntiŋ akpanikɔ nnɔ mbufo, ndusuk owo edu ke otu mmɔ emi edade mi emi miditabike mkpa, tutu mmɔ ekut Ubɔŋ Abasi.

²⁸ Edikem ke ini ekperede ndiyɔhɔ usen itiaita nte Enye eketiŋde ikɔ emi, Enye ada Peter, ye John, ye James, ɔdɔk ke akwa obot ndibɔŋ akam.

²⁹ Ekem nte Enye ɔbɔŋde akam, iso Esie ɔkpuhɔre, edisine-ŋkpɔ Esie onyuŋ akabare afia, esem oduk owo ke enyin.

³⁰ Ndien sese, owo iba edineme nneme ye Enye; mmɔ edi Moses ye Elijah; emi ebiɔŋɔrede ke ubɔŋ,

³¹ enyuŋ enemede nneme ebaŋa mkpa emi Enye edikpade ke Jerusalem.

³² Edi idap omum Peter ye mmɔ emi edude ye enye eti-eti: edi ke adaŋemi enyin etarade mmɔ, mmɔ ekut ubɔŋ Esie, ye owo iba oro edade ye Enye.

³³ Edikem nte mmɔ edianarede ekpɔŋ Enye, Peter ɔdɔhɔ Jesus ete, Andikpep, ɔfɔn nnyin ndidu mi: yak nnyin inyuŋ ibɔp ataya ita; kiet enyene Fi, kiet enyene Moses, kiet onyuŋ enyene Elijah; edi enye ifiɔkke se enye ɔdɔhɔde.

³⁴ Ndien nte enye osuk ɔdɔdɔhɔ ntem, ikpa-enyɔŋ edi edifuk mmɔ: ndien ndik anam mmɔ nte mmɔ edukde ke ikpa-enyɔŋ oro.

³⁵ Uyo onyuŋ oto ke ikpa-enyuŋ ɔwɔrɔ, ete, Emi edi Eyen Mi, emi mmekde: ekop uyo Esie.

³⁶ Ndien ke ini uyo oro odopde, mmɔ eyekut Jesus ikpɔŋ. Mmɔ enyuŋ ekibi inua, inyuŋ inemeke baba ŋkpɔ kiet eke mmɔ ekekutde inɔ owo ke mme usen oro.

³⁷ Edikem ke ndaŋ-nsiere, kini mmɔ ekotode ke obot esuhɔre, akamba otu owo esobo ye Enye.

³⁸ Ndien sese, owo kiet ke otu owo oro ofiori ete, Andikpep, mmekpe Fi ubɔk nte ese eyeneren mi; koro enye edide ikpɔŋ-ikpɔŋ eyen mi:

³⁹ ndien sese spirit, ke omum enye, enye onyuŋ obumere ofiori; spirit onyuŋ esiŋere enye, esin enye osio efot, anuak enye eti-eti, onyuŋ ɔsɔŋ ndiyak enye.

⁴⁰ Edi ŋkekpe mbet Fo ubɔk nte ebin enye eduɔk; edi mmɔ ikemeke.

⁴¹ Edi Jesus ɔbɔrɔ ete, O emana unana mbuɔtidem ye ukwaŋido, adaŋa didie ke ndidu ye mbufo, nnyuŋ mme ime ye mbufo?

⁴² Da eyen fo di ken. Edi nte enye asaŋade edi, demon osio enye ɔduɔk ke isɔŋ, onyuŋ esiŋere enye ɔkpɔsɔŋ. Edi Jesus asua ɔnɔ edidehe spirit oro, onyuŋ anam eyen okop nsɔŋidem, onyuŋ ayak enye ɔnɔ ete esie.

⁴³ Ndien idem akpa kpukpru mmɔ ndikut ubɔŋ Abasi. Edi ke ini idem akpade kpukpru owo abaŋa kpukpru ŋkpɔ eke Enye anamde, Enye ɔdɔhɔ mbet Esie ete,

⁴⁴ Eyak mme ikɔ emi etim eduk mbufo utɔŋ, koro emɔŋ ediyak Eyen owo esin owo ke ubɔk.

⁴⁵ Edi mmɔ ifiɔkke se ikɔ emi ɔwɔrɔde, koro okodibede mmɔ ke enyin, mbak mmɔ edifiɔk enye: ndien ndik anam mmɔ ndibup Enye mbaŋa ŋkpɔ emi.

⁴⁶ Edi eneni otibe ke otu mmɔ, ete, mme anie owo ke otu mme imɔ edikpon ikan mmɔ eken.

⁴⁷ Edi ke ini Jesus ɔdiɔŋɔde eneni emi odude mmɔ ke esit, Enye odudi ekpri eyen ɔwɔŋ adian idem, onyuŋ ɔdɔhɔ mmɔ ete,

⁴⁸ Owo ekededi eke edidarade ekpri eyen ɔwɔŋ emi ke enyiŋ Mi adara Mi: ndien owo ekededi eke edidarade Mi adara Enye emi ɔkɔdɔŋde Mi: koro enye emi ekpride akan ke otu mbufo kpukpru, kpa enye edidi akamba.

⁴⁹ Edi John ɔbɔrɔ ete, Andikpep, nnyin ima ikut owo ebinde demon ɔduɔk ke enyiŋ Fo, inyuŋ ikpan enye, koro enye misaŋake ye nnyin itiene Fi.

⁵⁰ Edi Jesus ɔdɔhɔ enye ete, Ekukpan enye: koro owo emi mibiɔŋɔke mbufo adada ye mbufo.

⁵¹ Edikem, ke ini nme usen eke edimende Enye edɔk ekperede,

⁵² Enye ototim asak iso ese Jerusalem ndika do, onyuŋ ɔdɔŋ mme isuŋutom ebem Enye iso: ndien mmɔ eka ekoduk ke obio-iŋwaŋ Samaria kiet nditim itie nnɔ Enye.

⁵³ Edi nditɔ Samaria oro inyimeke Enye oduk ke obio mmɔ, koro Enye asakde iso ese Jerusalem.

⁵⁴ Ke ini mbet Esie James ye John ekutde emi, mmɔ edɔhɔ ete, Obɔŋ, nte omonyime nnyin ikot ikaŋ oto ke enyɔŋ ɔsuhɔre edita mmɔ?

⁵⁵ Edi Enye ɔwɔŋɔre asua ɔnɔ mmɔ.

⁵⁶ Ndien mmɔ ebe eka ke obio-iŋwaŋ eŋwen.

⁵⁷ Ekem nte mmɔ esaŋade ke usuŋ, owo kiet ɔdɔhɔ Enye ete, Nyetiene fi ŋka ebiet eke Afo edikaka.

⁵⁸ Ndien Jesus ɔdɔhɔ enye ete, Ebua-ikɔt enyene ndudu, inuen enyɔŋ enyuŋ enyene mme efɔk: edi Eyen Owo inyeneke ɔtɔ eke odoride ibuot Esie.

⁵⁹ Enye ɔdɔhɔ owo eŋwen ete, Tiene Mi. Edi owo oro ɔdɔhɔ ete, Yak mbem iso ŋka ŋkobuk ete mi.

⁶⁰ Edi Jesus ɔdɔhɔ ete, Yak mme akpa-mkpa ebuk mme akpa-mkpa mmɔ; edi afo, ka kɔkwɔrɔ Ubɔŋ Abasi.

⁶¹ Owo eŋwen nde; odɔhɔ ete, Nyetiene Fi, Ɔbɔŋ, edi yak mbem iso ŋka ŋkɔkɔm mmɔ emi edude ke ufɔk.

⁶² Edi Jesus ɔdɔhɔ enye ete, Baba owo kiet emi akabarede ese edem, ke enye ama ekesin ubɔk ke ufuŋ-isɔŋ, ikemke ndinam utom Ubɔŋ Abasi.