LUKE 8 - Edisana ñwed Abasi Ibom

Mme Iban Emi Eketienede Jesus

¹ EDIKEM ke mibigike, Enye asaŋa ke ikpɔ obio ye obio-iŋwaŋ, ɔkwɔrɔ onyuŋ obuk eti mbuk Ubɔŋ Abasi, mbet duopeba enyuŋ esaŋa ye Enye;

² ndusuk iban ŋko, emi Enye akanamde mme idiɔk spirit ye udɔŋɔ ekure mmɔ enyuŋ edu ye mmɔ: mmɔ edi Mary emi ekerede Magdalene, emi demon itiaba ekewɔrɔde enye ke idem,

³ ye Joanna ŋwan Chuza akama-ukpɔhɔre Herod, ye Susanna, ye ediwak mmɔ efen: emi edade se enyenede ese ebaŋa mmɔ.

Jesus Otop Nke Abaŋade Asuan Mkpasip

⁴ Edi ke adaŋemi ata akwa otu owo ebonode ɔtɔ kiet, mme owo enyuŋ etode ke kpukpru obio etiene Enye, Enye etiŋ ikɔ ɔnɔ mmɔ ke ŋke, ete,

⁵ Asuan-mkpasip ɔwɔrɔ aka ndisuan mkpasip esie: ndien nte enye asuande, ndusuk mkpasip eduɔŋɔ ke mben ɔkpɔ-usuŋ; ndien edigi mmɔ, mme inuen enyɔŋ enyuŋ etaŋ mmɔ eta.

⁶ Mkpasip ndusuk eduɔŋɔ ke akwa itiat; ndien ke ini mmɔ etibede, eyemere, koro minyeneke mmɔŋ.

⁷ Ndusuk eduɔŋɔ ke ufot ikɔt ŋkukim; ndien ŋkukim ekɔri ntre ye mmɔ, ebaba mmɔ ewot.

⁸ Mmɔ eken enyuŋ eduɔŋɔ ke eti isɔŋ, etibe, enyuŋ eŋwum mfri utim ikikie. Nte Enye etiŋde ŋkpɔ emi, Enye ofiori ete, Owo eke enyenede utɔŋ ndikop, yak okop.

⁹ Edi mbet Esie ebup Enye se ŋke emi ɔwɔrɔde.

¹⁰ Ndien Enye ete, Eyak enɔ mbufo ndifiɔk ndibe ŋkpɔ Obio Ubɔŋ Abasi, edi enɔ mmɔ eken ndifiɔk ke ŋke, man ke erise, mmɔ ekukut ŋkpɔ, ye ke erikop, mmɔ ekunyuŋ efiɔk.

¹¹ Ŋke oro edi emi. Mkpasip edi ikɔ Abasi.

¹² Mmɔ oro ke mben usuŋ edi mmɔ emi ekokopde: ekem Satan edi editaŋ ikɔ ke esit mmɔ efep, mbak mmɔ edinim ke akpan-ikɔ enyuŋ ebɔhɔ.

¹³ Mmɔ oro ke enyɔŋ itiat edi mmɔ emi ekopde ikɔ enyuŋ ebɔde ke idaresit; edi mmɔ inyeneke oruŋ, ntre ke mmɔ enim ke akpanikɔ ke ini esisit, enyuŋ efiak edem ke ini idomo.

¹⁴ Ndien mkpasip oro eduɔŋɔde ke ikɔt ŋkukim edi mmɔ emi ekopde, ndien, nte mmɔ ekade eke mmɔ, ekikere ye inyene ye inemesit uwem ebaba mmɔ ewot; ntre ke mmɔ iŋwumke mfri eke ɔfɔnde ama.

¹⁵ Ndien mkpasip emi edukde ke eti isɔŋ edi mmɔ emi ekopde ikɔ emum ekama ke eti esit akpanikɔ, enyuŋ eŋwum mfri ke ime.

¹⁶ Owo baba kiet, ke ini odomode utuenikaŋ, idaha ŋkpɔ ifuk, inyuŋ inimke enye ke idak mkpana: edi owuk enye ke enyɔŋ uwuk-utuenikaŋ: man mmɔ emi edukde ke ubet ekut uŋwana.

¹⁷ Koro baba ŋkpɔ kiet idibeke eke midiyarakere; inyuŋ ifukke baba ŋkpɔ kiet eke midiwɔrɔke ina ke aŋwa owo efiɔk.

¹⁸ Etiŋ enyin ekpeme ndien adaŋa nte mbufo ekopde: koro owo ekededi eke enyenede, eyenɔ enye edian; edi owo ekededi eke minyeneke, eyebɔ enye kpa se enye esede ete imɔ inyene.

¹⁹ Ekem eka Esie ye nditɔ-eka Esie eto edi, edi mmɔ ikemeke ndisim Enye ɔnɔ uwak owo.

²⁰ Edi edɔhɔ Enye ete, Eka Fo ye nditɔ-eka Fo ke eda ke aŋwa, eyom ndikut Fi.

²¹ Edi Enye ɔbɔrɔ mmɔ ete,Eka Mi ye nditɔ-eka Mi edi mmɔ emi ekopde ikɔ Abasi, enyuŋ enamde.

²² Edikem ke usen kiet, Enye ediere ke ubom ye mbet Esie, ete mmɔ, Eyak iwat ibe ika ke edem inyaŋ oko: ntre ke mmɔ esio.

²³ Edi nte mmɔ ewatde, Enye ɔduɔ idap: ndien oyobio ofime ɔsuhɔre ke inyaŋ; mmɔŋ onyuŋ ɔtɔŋɔ ndiyɔhɔ ke ubom, mmɔ enyuŋ edu ke itie-ndik.

²⁴ Edi mmɔ edi edidemere Enye, ete, Andikpep, Andikpep, nnyin imatak. Edi Enye edemere, asua ɔnɔ ofim ye mbufut mmɔŋ: ndien mmɔ edobo, ena suŋ-ŋ.

²⁵ Edi Enye ɔdɔhɔ mmɔ ete, Mbuɔtidem odu mmɔŋ? Ndik omum mmɔ ye mkpa-idem, mmɔ enyuŋ edɔhɔ kiet eken ete, Anie naŋa edi emi? Enye owuk kpa ofim ye mmɔŋ, ndien mmɔ ekop uyo Esie.

²⁶ Ekem mmɔ edibeke ke isɔŋ mme Gerasene emi asakde iso ese Galilee.

²⁷ Ndien ke ini Enye ɔwɔrɔde ke ubom ɔdɔk obot, owo kiet emi otode ke obio, onyuŋ enyenede demon, edisobo ye Enye; enye ikesineke ɔfɔŋ anyan ini, inyuŋ iduŋke ke ufɔk, edi oduŋ ke otu mme udi.

²⁸ Ke adaŋemi enye okutde Jesus, enye ofiori, ɔduɔ Enye ke iso, onyuŋ ɔdɔhɔ ke ɔkpɔsɔŋ uyo, ete, Nsaŋa nso ye Afo, Jesus, Eyen Abasi Ibom?

²⁹ Mmekpe Fi ubɔk, kutuhɔre mi. Koro Jesus okowukde edidehe spirit, ete, Wɔrɔ owo oro ke idem. Koro spirit esimum enye ediwak ini; ndien eda ŋkpɔkɔbi ye ebuka ekɔbi enye, man etem enye ɔtɔ kiet: edi enye okibi ŋkpɔkɔbi, demon onyuŋ ebin enye esin ke desert.

³⁰ Edi Jesus obup enye ete, Nso idi enyin fo? Enye ɔdɔhɔ ete, Ŋkere Legion (udim); koro ediwak mme demon ekodukde enye ke idem.

³¹ Ndien mme demon ebeŋe Enye ete Enye okudɔhɔ mme imɔ iwɔŋɔ ikoduk ke ukpe ndutuhɔ.

³² Otu ediwak edi edu do, edia ŋkpɔ ke obot: ndien mmɔ ebeŋe Enye ete ayak mme imɔ iduk mme edi ke idem.

³³ Enye onyime. Mme demon enyuŋ ewɔŋɔ owo oro ke idem ekoduk mme edi; ndien otu edi ebumere efeŋe esuhɔre ke ebedeŋ, eduɔŋɔ ke inyaŋ, ekpaŋa.

³⁴ Edi ke adaŋemi mme andibɔk edi ekutde se ikotibede, mmɔ efeŋe eka ekobuk mme ŋkpɔ emi ke obio ye ke iŋwaŋ.

³⁵ Mbio-obio enyuŋ ewɔŋɔ edi ndise se ikotibede: mmɔ edi edisim Jesus, enyuŋ ekut owo, emi mme demon ekɔwɔŋɔde enye ke idem, etiede tie ke ukot Jesus, esine ɔfɔŋ, onyuŋ enyene eti ibuot: ndien ndik anam mmɔ.

³⁶ Mmɔ emi ekekutde ebuk enɔ mmɔ nte ekanamde owo emi ekenyenede mme demon okop nsɔŋidem.

³⁷ Ndien kpukpru mme andiduŋ ke ofuri ŋkan-ŋkuk isɔŋ mme Gerasene ekpe Enye ubɔk ete ɔnyɔŋ ɔkpɔŋ mme imɔ; koro akamba ndik omumde mmɔ: ntre ke Enye ediere ke ubom afiak osio.

³⁸ Edi owo emi mme demon ekɔwɔŋɔde enye ke idem ebeŋe Enye ete ayak imɔ idu ye Enye.

³⁹ Edi Jesus anam enye ɔnyɔŋ, onyuŋ ɔdɔhɔ enye ete,Fiak nyɔŋ ufɔk, kobuk ikpɔ ŋkpɔ eke Abasi akanamde ɔnɔ fi. Ndien enye ɔnyɔŋ akasuan mbuk ikpɔ ŋkpɔ eke Jesus akanamde ɔnɔ enye ke ofuri obio.

Ŋwan Ɔkɔdɔŋɔde Udɔŋɔ Uwɔrɔ Iyip

⁴⁰ Edikem ke ini Jesus afiakde ekebehe, otu owo edara ndikut Enye; koro mmɔ kpukpru etiede ebet Enye.

⁴¹ Ndien sese, owo kiet, emi ekerede Jairus, edi, enye onyuŋ edi ɔbɔŋ synagogue; enye ɔduɔ ke isɔŋ ke ukot Jesus, ekpe Enye ubɔk, ete edi ke ufɔk imɔ;

⁴² koro enye enyenede ikpɔŋ-ikpɔŋ eyen-aŋwan, emi edide ŋkpɔ nte isua duopeba, ndien enye ke oyom ndikpa.

⁴³ Edi nte Enye akade, mme otu owo ebere Enye. Ndien ŋwan kiet, emi ɔkɔdɔŋɔde eriwɔrɔ iyip ke isua duopeba, okonyuŋ abiatde kpukpru se akpadade odu uwem ɔnɔ mbia-ibɔk, baba owo kiet minyuŋ ikemeke ndinam enye okop nsɔŋidem, etiene Enye ke edem,

⁴⁴ onyuŋ otuk nnyeriye ɔfɔŋ-idem Esie: ndien idaha oro eriwɔrɔ iyip esie ekpehe.

⁴⁵ Ndien Jesus ɔdɔhɔ ete,Anie owo okotuk Mi? Edi ke ini kpukpru owo ekaŋde, Peter ye mmɔ emi edude ye enye edɔhɔ Enye ete, Ɔbɔŋ, mme otu owo ebere Fi enyuŋ ebaha Fi.

⁴⁶ Edi Jesus ɔdɔhɔ ete, Owo kiet okotuk Mi: koro mmɔfiɔk nte odudu ama ɔwɔrɔ Mi ke idem.

⁴⁷ Edi ke ini ŋwan oro okutde ete imɔ idibeke, enye edi ke nnyek-idem ediduɔ Enye ke iso, onyuŋ etiŋ ke iso kpukpru owo ntak eke okotukde Enye, ye adaŋa nte udɔŋɔ esie okokurede ini kiet.

⁴⁸ Edi Jesus ɔdɔhɔ enye ete, Eyen-aŋwan, mbuɔtidem fo akanam fi okop nsɔŋidem; nyɔŋ koduk ke emem.

⁴⁹ Nte Enye osuk etiŋde ikɔ, owo oto ufɔk ɔbɔŋ synagogue edi edidɔhɔ ete, Eyen fo ama akpa; kufina aba Andikpep.

⁵⁰ Edi ke ini Jesus okopde, ɔbɔrɔ enye ete, Kufehe ndik; kam nim ke akpanikɔ ndien eyen fo eyekop nsɔŋidem.

⁵¹ Edi ke adaŋemi Enye odukde ufɔk, Enye iyakke baba owo kiet asaŋa ye Enye oduk, ke mibɔhɔke Peter, ye John, ye James, ye ete ye eka eyen-aŋwan.

⁵² Ndien kpukpru owo ke etuaŋa enyuŋ eseme eyen. Edi Jesus ɔdɔhɔ ete, Edop eyet; koro enye mikpaha mkpa, edi edede.

⁵³ Edi mmɔ esak Enye nsahi, koro mmɔ efiɔkde ete enye ama akpa.

⁵⁴ Edi Jesus omum enye ke ubɔk, okot enye ete, Enyen-aŋwan, daha ke enyɔŋ.

⁵⁵ Ndien spirit esie afiak edi, enye onyuŋ adaha ke enyɔŋ ini kiet: ndien Jesus ɔnɔ uyo ete, enɔ enye ŋkpɔ adia.

⁵⁶ Mkpa-idem onyuŋ omum ete ye eka esie: edi Enye owuk mmɔ ete, ekumen se ikostibede etiŋ enɔ baba owo kiet.