LEVITICUS 9 - Edisana ñwed Abasi Ibom

Abasi Enyime Aaron ye Nditɔ Esie Nte Mme Oku

¹ EDIKEM ke ɔyɔhɔ usen itiaita, Moses okot Aaron ye nditɔ esie, ye mbiowo Israel edi;

² enye onyuŋ ɔdɔhɔ Aaron ete, Da eyen enaŋ eyen ufene ke idem fo ke uwa idiɔk ido, ye okukim eke ɔfɔnde ama, ke edifɔp uwa, ndien da mmɔ di ke iso Jehovah.

³ Nnyuŋ dɔhɔ nditɔ Israel, ete, mbufo eda okpo ebot ke eke uwa idiɔk ido, ye eyen enaŋ ye eyen erɔŋ isua kiet eke efɔnde ema, ke edifɔp uwa; ye abak ayara enaŋ ŋko,

⁴ ye okukim, ye mme uwa emem, eke ewade ke iso Jehovah; ye inuak-udia mbuaha ye aran: koro mfin emi ke Jehovah ediwut mbufo idem.

⁵ Ndien mmɔ eda se Moses ɔkɔdɔhɔde edi ke iso efe esop:

⁶ ndien ofuri esop esaŋa ekpere edida ke iso Jehovah. Ndien Moses ɔdɔhɔ ete, Emi edi se Jehovah owukde ete mbufo enam: ndien Jehovah eyewut mbufo ubɔŋ.

⁷ Ndien Moses ɔdɔhɔ Aaron ete, Saŋa kpere itie-uwa, kawa uwa idiɔk ido fo, ye edifɔp uwa fo, nyuŋ sio isop idem fo, ye isop mbio-obio: ndien wa enɔ mbio-obio, nyuŋ sio isop nɔ mmɔ; nte emi Jehovah okowukde.

⁸ Ndien Aaron asaŋa ekpere itie-uwa, owot eyen enaŋ uwa idiɔk ido esiemɔ.

⁹ Ndien nditɔ Aaron emen iyip esɔk enye; ndien enye edebi nnuenubɔk esie ke iyip oro, eyet ke nduk itie-uwa, ndien aŋwaŋa iyip ɔduɔk ke ukot itie-uwa:

¹⁰ ndien enye ada ikpɔŋ, ye ekput, ye caul emi adianade esit uwa idiɔk ido, ɔfɔp ke itie-uwa; nte emi Jehovah okowukde Moses.

¹¹ Ndien enye ɔkɔfɔp unam ye ikpa ke ikaŋ ke edem nna.

¹² Ndien enye owot edifɔp uwa; ndien nditɔ Aaron emen iyip esɔk enye, ndien enye ada iyip osime ke itie-uwa akanade okuk.

¹³ Ndien mmɔ emen edifɔp uwa esɔk enye, mbak-mbak, ye ibuot: ndien enye ɔkɔfɔp mmɔ ke itie-uwa.

¹⁴ Enye onyuŋ eyet ŋkpɔ esit idibi ye nnuk, ada ɔfɔp ke enyɔŋ edifɔp uwa ke itie-uwa.

¹⁵ Ndien enye ada enɔ mbio-obio edi, ada okpo ebot uwa idiɔk ido emi enyenede mbio-obio, owot enye, ndien awa enye ke idiɔk-ŋkpɔ, nte eke akpa.

¹⁶ Ndien enye ada edifɔp uwa edi, onyuŋ awa enye nte ekam enamde.

¹⁷ Ndien enye onyuŋ ada inuak udia edi, owobi ɔyɔhɔ ubɔk, ada ɔfɔp ke itie-uwa, adian ye edifɔp uwa usen-ubɔk.

¹⁸ Enye onyuŋ owot abak enaŋ ye okukim uwa emem eke enyenede obio: ndien nditɔ Aaron emen iyip esɔk enye, ndien enye ada osime ke itie-uwa akanade okuk, ye ikpɔŋ enaŋ oro,

¹⁹ ye eke okukim, ye isim, ye se ifuhɔde ŋkpɔ esit idibi, ye ekput, ye caul emi adianade esit:

²⁰ ndien mmɔ edori ikpɔŋ ke ikɔŋesit, ndien enye ɔfɔp ikpɔŋ oro ke itie-uwa:

²¹ ndien Aaron emen ikɔŋesit ofuŋ ke edifuŋ uwa ke iso Jehovah; nte emi Moses okowukde.

²² Ndien Aaron emenere ubɔk esie ese kpukpru owo, onyuŋ ɔdiɔŋ mmɔ; ndien enye oto ndiwa uwa idiɔk ido, ye edifɔp uwa ye uwa emem, ɔsuhɔre.

²³ Ndien Moses ye Aaron eduk ke efe esop, ndien ewɔŋɔ ekediɔŋ kpukpru owo ndien Jehovah ayarare ubɔŋ esie ɔnɔ kpukpru owo.

²⁴ Ndien ikaŋ oto ke iso Jehovah, edita edifɔp uwa ye ikpɔŋ ke itie-uwa: ndien ke ini kpukpru owo ekutde, mmɔ efiori, enyuŋ eduɔŋɔ ekubi iso mmɔ.