JUDGES 21 - Edisana ñwed Abasi Ibom

Enɔ Kpukpru Mbon Esien Benjamin Iban ke Ndɔ Mbak mmɔ Edikure ke Iso Isɔŋ

¹ NDIEN nditɔ Israel ekeŋwɔŋɔ ke Mizpah, ete, Owo nnyin baba kiet idinɔŋɔ Benjamin eyen esie aŋwan ɔdɔ.

² Edikem kpukpru owo edi ke Bethel, enyuŋ etie do ke iso Abasi, tutu osim mbubreyo, enyuŋ emenere uyo mmɔ etua akamba eyet;

³ Ndien mmɔ edɔhɔ ete, O Jehovah, Abasi Israel, anam didie ŋkpɔ emi otibe ke Israel, emi esien kiet osopde ke Israel mfin emi?

⁴ Edikem ke eyo esierede, mmɔ ebak edemere ke usenubɔk, ekenam itie-uwa do, enyuŋ efɔp edifɔp uwa ye uwa emem.

⁵ Ndien nditɔ Israel edɔhɔ ete, Anie odu ke otu kpukpru esien Israel emi mikɔdɔkke ke otu esop itiene Jehovah? Koro mmɔ ema ekewuk akamba ewuhɔ ebaŋa owo emi midɔkke idi ke ɔtɔ Jehovah ke Mizpah, ete, ke enye iditreke ndikpa.

⁶ Ndien nditɔ Israel etua Benjamin nditɔ-ete mmɔ mbɔm enyuŋ edɔhɔ ete, Emesibe esien kiet ke Israel efep mfin emi.

⁷ Nnyin idinam didie ke ikɔ iban ye mme mmɔ emi esuhɔre: koro nnyin iketomode Jehovah, ite ke nnyin ididaha nditɔ-iban nnyin inɔ mmɔ edɔ?

⁸ Ndien mmɔ ebup, ete, Ewe esien Israel kiet odu emi mikɔdɔkke ke ɔtɔ Jehovah ke Mizpah? Ndien, sese, baba owo kiet ikotoho ke Jabesh-gilead idi ke esop ke nna-ekɔŋ.

⁹ Mmɔ enyuŋ ebat kpukpru owo, ndien, sese, baba owo mme andiduŋ Jabesh-gilead kiet iduhe do.

¹⁰ Ndien mbon esop esioŋo tɔsin owo duopeba ke otu mbon uko edɔŋ mmɔ utom do, ete, Mbufo eka ekewot mme andiduŋ Jabesh gilead ke iso ofut, ye iban ye nditɔwɔŋ.

¹¹ Ndien emi edi se mbufo edinamde. Mbufo ewot kpukpru iren-owo, ye kpukpru iban eke efiɔkde eren-owo.

¹² Ndien mmɔ ekut nditɔwɔŋ iban ikie inaŋ emi mikɔfiɔkke eren-owo ke otu mme andiduŋ Jabesh-gilead: ndien eda mmɔ edi ke nna ke Shiloh emi odude ke isɔŋ Canaan.

¹³ Ndien ofuri mbon esop edɔŋ ekedɔhɔ ikɔ ye nditɔ Benjamin oro edude ke itiat Rimmon, enyuŋ etiŋ ikɔ emem ye mmɔ.

¹⁴ Ndien Benjamin efiak edi ke ini oro; ndien mmɔ enɔ mmɔ iban oro mmɔ ekenimde uwem ke otu iban Jabesh-gilead: edi ikwe se ikemde ye mmɔ.

¹⁵ Ndien kpukpru owo enyuŋ etua Benjamin mbɔm: koro Jehovah akabiatde esien Israel kiet.

¹⁶ Ndien mbiowo esop edɔhɔ, ete, Nnyin idinam didie ikut iban, inɔ mme mmɔ emi esuhɔde, koro iban esobode ke Benjamin?

¹⁷ Ndien mmɔ edɔhɔ ete, Nditɔ Benjamin emi ebɔhɔde enyene ndida udeme mmɔ, man ekusɔhi esien kiet ke Israel efep.

¹⁸ Edi nnyin ikwe nte idade nditɔ-iban nnyin inɔ mmɔ edɔ: koro nditɔ Israel ekewukde ete, Idifɔnke fɔn inɔ owo eke ɔnɔde Benjamin ŋwan.

¹⁹ Ndien mmɔ edɔhɔ ete, Sese, usɔrɔ Jehovah odu ke Shiloh kpukpru isua, emi odude ke edem edere Beth-el, ke ɔkpɔ-usuŋ emi otode ke Beth-el ɔdɔk ke Shechem, ke edem usiaha-utin, ye ke edem usuk-usuk Lebonah.

²⁰ Ndien mmɔ eteme nditɔ Benjamin, ete, Mbufo eka ekedibe ke iŋwaŋ vine ebet;

²¹ enyuŋ ese, ndien, sese, edieke nditɔ-iban Shiloh ewɔŋɔde edi ndinek unek, mbufo ewɔŋɔ ndien ke iŋwaŋ vine, kpukpru mbufo kiet kiet emum ŋwan mbufo ke otu nditɔ-iban Shiloh, ndien enyɔŋɔ eka isɔŋ Benjamin.

²² Ndien ama ekem, adaŋemi mme ete mmɔ, ye nditɔ-ete mmɔ edide ndinam ikɔ ye nnyin, nnyin iyedɔhɔ mmɔ, ite, Mbufo eyak mmɔ enɔ nnyin: koro midige nnyin kpukpru ikut ŋwan nnyin ke ekɔŋ: koro midige mbufo enɔ mmɔ ke emi, eke mbufo ekpeduede isop.

²³ Ndien nditɔ Benjamin enam ntre, enyuŋ eda iban ekem ke adaŋa ibat mmɔ, ke otu mmɔ emi enekde unek, emi mmɔ emumde: ndien mmɔ enyɔŋɔ eka ke udeme mmɔ, ekediɔŋ mme obio mmɔ, enyuŋ eduŋ ke esit.

²⁴ Ekem nditɔ Israel edaŋa do ke ini oro, kpukpru owo enyɔŋɔ eka esien mmɔ ye oruk mmɔ; kpkukpru owo enyuŋ ewɔŋɔ do eka udeme mmɔ.

²⁵ Ke eyo oro edidem iduhe ke Israel: kpukpru owo enam nte mmɔ emade.