JUDGES 17 - Edisana ñwed Abasi Ibom

Micah Obot Ŋkpɔ Ukpono Onyuŋ ada Oku

¹ EDIKEM owo kiet ekere Micah odu ke obot Ephraim.

² Ndien enye ɔdɔhɔ eka esie, ete, Mbak silver ikie duopokiet oro ekebɔde fi, emi afo ekesuŋide, onyuŋ ɔdɔhɔ mi ke utɔŋ abaŋa, sese, silver oro mmɔ ye ami; edi ami ŋkada enye. Ndien eka esie ɔdɔhɔ ete, Jehovah osuk ɔdiɔŋ fi, eyen mi.

³ Ndien adaŋemi enye ama akayak mbak silver ikie duopekiet oro ɔnɔ eka esie, eka esie ɔdɔhɔ ete, Ŋkonim silver emi nnɔ Jehovah, eyen mi eyebɔ mi enye ke ubɔk, man anam edisɔi mbiet, ye editara mbiet: mmɔdo ndiyakde enye nnɔ fi ndien.

⁴ Ntre ke enye ayak silver oro ɔnɔ eka esie; ndien eka esie osio shekel silver ikie iba, ada mmɔ ɔnɔ odom-utim, ndien enye anam edisɔi mbiet ye editara mbiet: ndien mmɔ edu ke ufɔk Micah.

⁵ Ndien owo oro Micah enyene ufɔk abasi, onyuŋ anam ephod kiet, ye teraphim, onyuŋ ada eyen esie kiet ɔyɔhɔ enye ubɔk,

⁶ man edi oku esie. Ndien ke eyo oro edidem iduhe ke Israel: kpukpru owo enam nte emade.

⁷ Edikem eyen Beth-lehem-judah kiet emi otode ke oruk Judah, emi onyuŋ edide Levite, oduŋ do.

⁸ Ekem owo oro oto ke obio Bethlehem-judah ete ikoduŋ ke ebiet eke idikutde: ndien nte enye asaŋade ke usuŋ esie, enye osim obot Ephraim, edi ke ufɔk Micah.

⁹ Ndien Micah obup enye, ete. Afo oto mmɔŋ? Ndien enye ɔbɔrɔ enye, ete, Ami ndi Levite kiet nto ke Beth-lehem-judah, ami nnyuŋ ŋka ndiduŋ ke ebiet eke ndikutde.

¹⁰ Ndien Micah ɔdɔhɔ enye, ete, Tie ye ami, nyuŋ di ete mi ye oku, ndien nyenɔ fi shekel silver duop ke isua, ye edisine-ŋkpɔ nte ekemde, ye udia fo.

¹¹ Ndien Levite oro oduk. Levite oro onyuŋ onyime nditie ye owo oro; ndien akparawa oro etie ye enye nte eyen esie kiet.

¹² Micah onyuŋ ɔyɔhɔ Levite ubɔk: ndien akparawa oro akabare edi oku esie; enye onyuŋ oduŋ ke ufɔk Micah.

¹³ Ndien Micah ɔdɔhɔ ete, Mmɔfiɔk ndien nte Jehovah eyefɔn ye ami, koro mmenyene Levite emi ke oku.