JOSHUA 15 - Edisana ñwed Abasi Ibom

Isɔŋ Emi Enɔde Esien Judah

¹ NDIEN afia nditɔ Judah ke ubon, ke ubon, osim adaŋa Edom ke wilderness Zin ke edem usuk, osim ata akpatre usuk.

² Ndien usuk-usuk adaŋa mmɔ ɔtɔŋɔ ke utit Inyaŋ Inuŋ, ke ituŋ emi esede usuk:

³ ndien enye ada ediwɔrɔ ke edem usuk-usuk obot Akrabbim, ndien ebe aka Zin, ndien ɔdɔk ke edem usuk-usuk Kadesh-barnea, ndien ebe aka Hezron, ndien ɔdɔk ke Addar, ndien akanare ediwɔrɔ ke Karka:

⁴ ndien ebe aka Azmon, ndien ediwɔrɔ ke akpa Egypt; ndien adaŋa oro etre ke mben inyaŋ. Emi edidi adaŋa mbufo ke edem usuk.

⁵ Ndien adaŋa ke edem usiaha utin edi Inyaŋ Inuŋ, tutu osim ke inua Jordan. Ndien adaŋa ke edem edere ɔtɔŋɔ ke ituŋ inyaŋ emi odude ke inua Jordan:

⁶ ndien adaŋa oro ɔdɔk aka ke Bethhoglah, onyuŋ ebe Beth-arabah ke edem edere; ndien adaŋa ɔdɔk aka ke itiat Bohan eyen Reuben:

⁷ ndien adaŋa oro ɔkpɔŋ ebedeŋ Achor ɔdɔk ke Debir, ndien akabare edere-edere aka ke Gilgal, emi asakde iso ese obot Adummim, emi odude ke edem usuk-usuk idim; ndien adaŋa ebe aka mmɔŋ En-shemesh, ndien utit esie ɔwɔrɔ ke En-rogel.

⁸ Ndien adaŋa oro asaŋa ke itihere eyen Hinnom ada ɔdɔk ke edem usuk-usuk mme Jebussite; oro edi Jerusalem: ndien adaŋa ɔdɔk ke ibuot obot emi asakde iso ese itihere Hinnom, ke edem usop-utin, emi adade ke utit itihere mme Rephaim edere-edere.

⁹ Ndien mmɔ enim adaŋa, ɔtɔŋɔde ke ibuot obot oro tutu osim ke idim mmɔŋ Nephtoah, ndien ada ediwɔrɔ ke mme obio obot Ephron; ndien enim adaŋa tutu osim ke Baalah, oro edi Kiriath jearim:

¹⁰ ndien adaŋa oto ke Baalah akanade aka edem usop-utin, tutu osim ke obot Seir, ndien ebe aka edem obot Jearim ke edem edere-edere (enye edi Chesalon), ndien enye ɔsuhɔre aka ke Beth-shemesh, ndien ebe aka Timnah:

¹¹ ndien adaŋa ada ediwɔrɔ ke edem edere Ekron: ndien enim adaŋa aka Shikkeron, ndien enye ebe aka obot Baalah, ndien ada ediwɔrɔ ke Jabneel; ndien utit adaŋa emi ɔwɔrɔ ke mben inyaŋ.

¹² Ndien adaŋa edem usop-utin edi Akwa Inyaŋ kpa mben esie. Emi edi adaŋa nditɔ Judah emi akanarede okuk, ke ubon, ke ubon.

¹³ Ndien enye ɔnɔ Caleb eyen Jephunneh udeme ke ufɔt nditɔ Judah, kpa nte jehovah ɔkɔdɔhɔde Joshua, kpa obio Arba ete Anak, enye edi Hebron.

¹⁴ Ndien Caleb osio nditɔ Anak ita ke ɔtɔ oro efep, Sheshai, ye Ahiman, ye Talmai, nditɔ Anak.

¹⁵ Ndien enye oto do ɔdɔk aka ke ɔtɔ mme andiduŋ Debir: ndien enyiŋ Debir ekere Kiriath-sepher ke akpa ini.

¹⁶ Ndien Caleb ɔdɔhɔ ete, Owo eke edikande Kiriath-sepher, onyuŋ ada enye, nyeda Achsah eyen mi aŋwan nnɔ enye ɔdɔ.

¹⁷ Ndien Othniel eyen Kenaz, eyen-ete Caleb, ada enye (obio): ndien Caleb emen Achsah eyen esie aŋwan ɔnɔ enye ɔdɔ.

¹⁸ Ekem adaŋemi ŋwan edide, ŋwan onuk enye, ete ebeŋe ete imɔ iŋwaŋ: ndien ŋwan ɔsɔp odorore ke ass; ndien Caleb obup enye, ete, Oyom nso?

¹⁹ Ndien enye ɔdɔhɔ, ete, Nɔ mi eti ŋkpɔ kiet: koro afo ɔnɔde mi edisat isɔŋ; nyuŋ nɔ mi idim mmɔŋ ŋko. Ndien enye (ete) ɔnɔ enye idim obot ye idim usuhɔre.

²⁰ Emi edi udeme esien nditɔ Judah, ke ubon, ke ubon.

²¹ Ndien mme obio ke utit esien nditɔ Judah, emi ekperede adaŋa Edom ke usuk, edi Kabzeel, ye Eder, ye Jagur,

²² ye Kinah, ye Dimonah, ye Adadah,

²³ ye Kedesh, ye Hazor, ye Ithnan.

²⁴ Ye Ziph, ye Telem, ye Bealoth,

²⁵ ye Hazor-hadattah, ye Kerioth-hezron, (oro edi Hazor);

²⁶ ye Amam, ye Shema, ye Moladah,

²⁷ ye Hazar-gaddah, ye Heshmon,

²⁸ ye Beth-pelet, ye Hazar-shual, ye Beer-sheba, ye Biziothiah,

²⁹ ye Baalah, ye Iim,

³⁰ ye Ezem, ye Eltolad, ye Chesil,

³¹ ye Hormah, ye Ziklag, ye Madmannah,

³² ye Sansannah, ye Lebaoth ye Shilhim, ye Ain, ye Rimmon: kpukpru obio edi edip ye usukkiet, ye mme obio iŋwaŋ mmɔ.

³³ Ke una-isɔŋ edem inyaŋ, Eshtaol,

³⁴ ye Zorah, ye Ashnah, ye Zanoah, ye Engannim, ye Tappuah,

³⁵ ye Enam, ye Jarmuth, ye Adullam,

³⁶ ye Socoh, ye Azekah, ye Shaaraim, ye Adithaim, ye Gederah, ye Gederothaim: obio duopenaŋ, ye obio iŋwaŋ mmɔ:

³⁷ Zenan, ye Hadashah, ye Migdalgad,

³⁸ ye Dilan, ye Mizpeh, ye Joktheel,

³⁹ Lachish, ye Bozkath, ye Eglon,

⁴⁰ ye Cabbon, ye Lahmam, ye Chithlish,

⁴¹ ye Gederoth, ye Bethdagon, ye Naamah, ye Makkedah: obio efurekiet, ye mme obio iŋwaŋ mmɔ:

⁴² Libnah, ye Ether, ye Ashan,

⁴³ ye Iphtah, ye Asshnah,

⁴⁴ ye Nezib, ye Keilah, ye Achzib, ye Mareshah: obio usukkiet, ye mme obio iŋwaŋ mmɔ:

⁴⁵ Ekron, ye mme obio esie, ye mme obio iŋwaŋ esie:

⁴⁶ ɔtɔŋɔde ke Ekron aka edem inyaŋ, kpukpru se ikperede Ashdod, ye mme obio iŋwaŋ esie:

⁴⁷ Ashdod, ye mme obio esie, ye mme obio iŋwaŋ esie, ye Gaza ye mme obio esie ye mme obio iŋwaŋ esie, tutu osim ke akpa Egypt, ye Akwa Inyaŋ ye mben esie.

⁴⁸ Ndien ke ikpɔ obot, Shamir,

⁴⁹ ye Jattir, ye Socoh, ye Dannah, ye Kiriath-sannah, oro edi Debir,

⁵⁰ ye Anab, ye Eshtemoh, ye Anim

⁵¹ ye Goshen, ye Holon, ye Giloh, obio duopekiet ye obio iŋwaŋ mmɔ.

⁵² Arab ye Dumah, ye Eshan,

⁵³ ye Jamin, ye Bethtappuah,

⁵⁴ ye Aphekah, ye Humtah, ye Kiriath-arba (oro edi Hebron), ye Zior: obio usukkiet,

⁵⁵ ye mme obio iŋwaŋ mmɔ: Maon, ye Carmel, ye Ziph, ye Jutah,

⁵⁶ ye Jezreel, ye Jokdeam, ye Zanoah,

⁵⁷ Kain, ye Gibeah, ye Timmah; obio duop ye mme obio iŋwaŋ mmɔ;

⁵⁸ Halhul, ye Beth-zur,

⁵⁹ ye Gedor, ye Maarath, ye Bethanoth, ye Eltekon; obio itiokiet,

⁶⁰ ye mme obio iŋwaŋ mmɔ: Kiriath-baal (oro edi Kiriath-jearim), ye Rabbath; obio iba ye mme obio iŋwaŋ mmɔ.

⁶¹ Ke wilderness, Beth-arabah, ye Middin,

⁶² ye Secacah, ye Nibshan, ye Obio Inuŋ, ye En-gedi; obio itiokiet, ye mme obio iŋwaŋ mmɔ.

⁶³ Ama edi mme Jebusite emi eduŋde ke Jerusalem, nditɔ Judah ikwe nte ebinde mmɔ efep: edi mme Jebusite eduŋ ye nditɔ Judah ke Jerusalem tutu osim mfin emi.