JEREMIAH 6 - Edisana ñwed Abasi Ibom

Mme Asua Ekan Ekanare Jerusalem Ekuk

¹ MBUFO nditɔ Benjamin ewɔŋɔ ke ufɔt Jerusalem efeŋe, enyuŋ efuri ukorowo ke Tekoa, enyuŋ emenere ŋkpɔ idiɔŋɔ ke enyɔŋ ke Beth-haccherem: koro idiɔk-ŋkpɔ ye akwa ŋwure etiede ke edem edere ese.

² Mmosobo adiaha Zion ediye ye edinem aŋwan oro.

³ Mme ekpemerɔŋ ye mme udim mmɔ eyedi ke ebiet esie; eyewuk tent mmɔ ekan enye ekuk:

⁴ kpukpru mmɔ kiet kiet eyebɔk ufene ke ebiet mmɔ. Mbufo etim ŋkpɔ uŋwana-ekɔŋ ye enye; edaha ke enyɔŋ, (eyak) nnyin idɔk ke ufɔt uwemeyo. Ɔdɔdiɔk ye nnyin: koro eyo ɔkɔhɔrede itɔŋ, koro mme ukpɔŋ mbubreyo ewɔrɔde uniɔŋ.

⁵ Mbufo edaha ke enyɔŋ, nnyin idɔk ke okoneyo, inyuŋ isobo ikpɔ ufɔk esie.

⁶ Koro ntem ke Jehovah mme udim ɔdɔhɔ, ete, Mbufo ekpeŋe eto, enyuŋ ekubi akwa ibombom ke ɔtɔ Jerusalem: emi edi obio eke edidade ufen; ŋkanubɔk ɔyɔhɔ enye kpukpru.

⁷ Kpa nte iso idim otopde mmɔŋ esiemɔ, kpa ntre ke enye otop idiɔk ido esie: mmɔ ekop enye ŋkanubɔk ye mbume ke esit; ubiak ye unan esuk edudu ke iso mi kpukpru ini.

⁸ Yak eteme fi, O Jerusalem, mbak ukpɔŋ mi ediwɔŋɔre ɔkpɔŋ fi; mbak ndinim fi ke desert, ke isɔŋ eke owo miduŋke ke esit.

⁹ Ntem ke Jehovah mme udim ɔdɔhɔ, ete, Mmɔ eyetim etaŋ nsuhɔ Israel nte vine; tɔŋɔ ntak da ubɔk fo sin ke akpasa, nte owo eke etetde mfri vine.

¹⁰ Ndidɔhɔ anie, nnyuŋ nteme anie, man mmɔ ekop? sese, utɔŋ mmɔ odoro edut, ndien mmɔ ikemeke ndikop: sese, mmɔ ebat uyo Jehovah ke ŋkpɔ but; enye inemke mmɔ esit.

¹¹ Ndien iyaresit Jehovah ɔyɔhɔ mi ke idem; idem emem mi ke mmum-ŋkama: nyeŋwaŋa enye ke idem eyenɔwɔŋ ke esien, ye ke otu mkparawa ini kiet: koro eyeda ebe ye ŋwan ŋko, ye mbiowo ye owo eke uwem ɔyuhɔde enye.

¹² Ndien mme ufɔk mmɔ, ye iŋwaŋ mmɔ ye iban mmɔ ɔtɔ kiet eyekabare enyene owo efen: koro nyenyanare ubɔk mi ntuk mme andiduŋ isɔŋ: uyo Jehovah edi emi.

¹³ Koro kpukpru mmɔ, ɔtɔŋɔde ke ŋkpri, tutu osim ikpɔ, esin enyin; kpukpru mmɔ, ɔtɔŋɔde ke prophet, tutu osim oku,

¹⁴ Mmɔ enyuŋ ekɔk unam adiaha ikɔt mi enyɔŋ-enyɔŋ, ete, “Emem, emem;” ndien baba emem iduhe.

¹⁵ But akpanam mmɔ, koro mmɔ enamde oburobut ido; edi but inamke mmɔ baba, mmɔ inyuŋ ifiɔkke ndikop but: mmɔdo mmɔ eyeduɔŋɔ ke otu mmɔ eke eduɔŋɔde: ke ini eke ndinɔde mmɔ ufen mmɔ eyeduɔŋɔ; Jehovah ɔdɔhɔ.

¹⁶ Ntem ke Jehovah ɔdɔhɔ ete, Mbufo eda ke mme usuŋ, enyuŋ ese, enyuŋ ebup ebaŋa mme ɔkpɔ-usuŋ eset, ete, Eti usuŋ, enye? ndien mbufo esaŋa ke esit, enyuŋ ekut nduɔk-odudu ukpɔŋ mbufo. Edi mmɔ edɔhɔ ete, “Nnyin idisaŋake.”

¹⁷ Ami ŋkonyuŋ ndemere mbon-ukpeme eke esede mbufo, nnim, nte, Mbufo ekpaŋ utɔŋ enɔ uyo ukorowo.

¹⁸ Ndien mmɔ edɔhɔ ete, “Nnyin idikpaŋke.” Mbufo mme idut, ekop ndien! mbon esop, mbufo enyuŋ efiɔk se idude ke otu mmɔ!

¹⁹ Ererimbot, kop: sese, ami mmɔŋ nda idiɔk-ŋkpɔ ntiene mbio emi, kpa mfri ekikere mmɔ: koro mmɔ mikpaŋke utɔŋ ke ikɔ mi ye mbet mi, edi esin enye.

²⁰ Frankincense anam didie oto ke Sheba edi ke ɔtɔ mi, eti mbɔkɔk ke anyan idut ŋko? Ndifɔp uwa mbufo inemke nem, mme uwa emem mbufo inyuŋ idatke mi esit.

²¹ Mmɔdo ntem ke Jehovah ɔdɔhɔ, ete, Sese, ami mmɔŋ nda ŋkpɔ ntuaha-nduɔ nnim nnɔ mbio emi, ndien mme ete ye nditɔ eyetuaha ke esit eduɔŋɔ ɔtɔ kiet, mbɔhiduŋ ye ufan esie eyetak.

²² Ntem ke Jehovah ɔdɔhɔ, ete, Sese, idut kiet oto ke edem edere edi, akamba idut eyenyuŋ edemere ke ŋkaŋ ererimbot.

²³ Mmɔ ekama utiga ye eduat; mmɔ ewai enyin, inyuŋ ituaha owo mbɔm: uyo mmɔ oyomo nte inyaŋ; mmɔ enyuŋ edoro horse, etim idem nte mbon-ekɔŋ ebaŋa fi O adiaha Zion.

²⁴ Nnyin imokop etop esie: ubɔk nnyin emekabare emem: nnanenyin omomum nnyin, ubiak ebiet eke aŋwan uman.

²⁵ Kuwɔrɔ uka iŋwaŋ, kunyuŋ usaŋa ke usuŋ: koro mme asua ekamade ofut: ndik akan okuk.

²⁶ O adiaha ikɔt mi, bɔbɔ ɔfɔŋ-ikpo ke idem, nyuŋ duɔŋɔ ke ntɔŋ: nam ntua-eyet ikpɔŋ eyen; seme ata ndot-ndot eseme: koro owo eke osobode eyebuat nnyin ke isɔrɔ kiet.

²⁷ Mmonim fi ke owo eke odomode ke otu ikɔt mi, etie nte ufɔk ekɔŋ, ndien afo eyefiɔk onyuŋ odomo usuŋ mmɔ ese.

²⁸ Kpukpru mmɔ edi ata mbon nsɔŋ-ibuot, mme asaŋa mbia; edi okpoho ye ukwak; kpukpru mmɔ edi owo eke ebiatde.

²⁹ Ibit utim asak, ŋket omosobo ke ikaŋ; anditara atara ikpikpu: koro mmɔ midianakede mme idiɔk owo ifep.

³⁰ Eyekot mmɔ, ete obukpo silver, koro Jehovah esede mmɔ ke mbukpo.