JEREMIAH 51 - Edisana ñwed Abasi Ibom

Ŋkaiso Ubiom-Ikpe Abasi Emi Esimde Mbon Babylon

¹ NTEM ke Jehovah ɔdɔhɔ, ete, Sese, ami mmɔŋ ndemere ofum nsobo nnam Babylon ye mme andiduŋ ke otu mmɔ emi enamde ikɔ ye ami;

² ndien nyedɔŋ isen owo utom ke Babylon, ndien mmɔ eyesak enye nte ibokpot, enyuŋ enam isɔŋ esie edi ukpɔk: koro mmɔ edikande enye ekuk ke usen ukut.

³ Yak ata utiga onuk utiga eket owo eke onukde, eket owo eke esinede ɔfɔŋ-idemekɔŋ esie emenere idem ke enyɔŋ: ndien mbufo ekutua mkparawa esie mbɔm; esobo ofuri udim ekɔŋ esie.

⁴ Ndien mmɔ eke edade unan eduɔŋɔ ke isɔŋ mme Chaldean, mmɔ ŋko eke owo ekimde eduɔŋɔ ke efak esie.

⁵ Koro midige Abasi Israel ye Judah esin mmɔ etie nte ebe-akpa, minyuŋ idige Jehovah mme udim; koro isop emi mmɔ eduede ye Edisana Abasi Israel ɔyɔhɔde ke isɔŋ mmɔ.

⁶ Mbufo eto ke ufɔk Babylon efeŋe, enyuŋ ebɔhɔ kiet kiet ke uwem mbufo: mbufo ekutak ke idiɔk ido esie; koro ini usiene Jehovah edi emi; Enye eyenɔ enye utip.

⁷ Babylon ekedi cup o-gold ke ubɔk Jehovah, eke esinde ofuri ererimbot eŋwɔŋ ekpa: mme idut ekeŋwɔŋ wine esie; mmɔdo mme idut edamade idat.

⁸ Babylon ɔmɔduɔ ke isɔrɔ kiet onyuŋ owure: mbufo etua enye; eda balm enɔ unan esie, mme eyekeme ndikɔk enye.

⁹ Nnyin ikeyom Babylon ndikɔk, edi enye inyimeke ndikubɔ: mbufo ekpɔŋ enye, yak nnyin inyuŋ ika kiet ye kiet ke idut nnyin: koro ikpe esie omosim enyɔŋ, omonyuŋ emenere tutu osim ikpa enyɔŋ.

¹⁰ Jehovah amada edinen ido nnyin ɔwɔrɔ: mbufo edi, nnyin iyebuk utom Jehovah Abasi nnyin ke Zion.

¹¹ Mbufo etuk mme idaŋ, eyɔhɔ mme otu ekɔŋ: Jehovah emedemere spirit ndidem Media: koro enye aduakde ŋkpɔ abaŋa Babylon, ete isobo enye; koro emi edide usiene Jehovah, usiene temple esie.

¹² Mbufo emenere banner ke ibibene Babylon, enam mme itie-ukpeme esɔŋ, enim owo eke ekpemede, etim mbon-udibe: koro Jehovah amaduak omonyuŋ anam se enye ɔkɔdɔhɔde abaŋa, mme andiduŋ Babylon.

¹³ Afo emi etiede ke itie akwa mmɔŋ, awak ke inyene, utit fo emedi, ye idomo ŋwo fo.

¹⁴ Jehovah mme udim omotomo idem esie, ete, Nditreke ndisin owo eyɔhɔ fi ke esit, nte ŋkukuŋkpɔyɔriyɔ: ndien mmɔ eyesio mkpo ebaŋa fi.

¹⁵ Enye akanam ererimbot ke odudu esie, owuk ekondo ke ifiɔk esie, onyuŋ eneŋere ikpa-enyɔŋ ke ɔniɔŋ esie.

¹⁶ Ke ini enye osiorode uyo esie uwak mmɔŋ odu ke enyɔŋ: enye onyuŋ anam uye oto ke utit ererimbot ɔdɔk: anam obuma ye edim, onyuŋ osio ofum ke ebiet unim ŋkpɔ esie.

¹⁷ Kpukpru owo eke minyeneke ifiɔk etie nte unam: edisɔi mbiet anam kpukpru mme anditara enyene but: koro editara mbiet esie edide nsu, baba spirit inyuŋ iduhe mmɔ ke idem.

¹⁸ Mmɔ edi ikpikpu, edi utom abiaŋa: eyetak ke ini ufen mmɔ.

¹⁹ Udeme Jacob ibietke mmɔ: koro edi enye edi andibot kpukpru, ye mmɔnyɔ udeme esie: Jehovah mme udim edi enyiŋ esie.

²⁰ Afo edi okpoyom mi ye ŋkpɔ ekɔŋ: mma nnyuŋ nda fi nsuan mme idut; mma nnyuŋ nda fi nsobo obio;

²¹ nnyuŋ nda fi nsuan horse ye andidoro enye; nnyuŋ nda fi nsuan chariot ye andidoro enye;

²² nnyuŋ nda fi nsuan eren ye ŋwan; nnyuŋ nda fi nsuan mbiowo ye eyen ɔwɔŋ; nnyuŋ nda fi nsuan akparawa ye eyen-aŋwan;

²³ nnyuŋ nda fi nsuan ɔbɔk-ufene ye otu ufene esie: nnyuŋ nda fi usuan ofuŋ isɔŋ ye mme enaŋ esie; nnyuŋ nda fi nsuan mme etubom ye mbɔŋ.

²⁴ Mma nnyuŋ nnɔ Babylon ye kpukpru mme andiduŋ Chaldea utip ofuri idiɔk ido mmɔ oro mmɔ ekenamde ke Zion ke iso mbufo. Uyo Jehovah edi emi.

²⁵ Jehovah ɔdɔhɔ, ete, Sese, ami nnam ikɔ ye afo, O obot eke abiatde, eke abiatde ofuri ekondo: ndien nyenyan ubɔk ntuk fi, nnyuŋ ŋkpat fi ke edikoŋ itiat mfep, nnyuŋ nnim fi ke obot eke asakde ikaŋ.

²⁶ Ndien mmɔ ididaha itiat inuk ye itiat isɔŋ ibibene ke ɔtɔ fo; koro afo akabarede edi ndon-ndon ke nsinsi, Jehovah ɔdɔhɔ.

²⁷ Mbufo emenere banner ke isɔŋ, efuri ukorowo ke otu mme idut, etim mme idut ete eŋwana ye enye, ekot mme idut Ararat, ye Minni, ye Ashkenaz, ete edi ekɔŋ ye enye: enim etubom ekɔŋ ebaŋa enye; eda horse eke ebietde ŋkukuŋkpɔyɔripɔ ŋkɔi edɔk.

²⁸ Mbufo edianare mme idut, ye ndidem Media, enim ete eŋwana ekɔŋ ye enye, mme etubom mmɔ ye kpukpru mbɔŋ mmɔ, ye ofuri isɔŋ emi mmɔ ekarade.

²⁹ Ndien isɔŋ eyenyek onyuŋ okop ubiak: koro uduak Jehovah ete inim isɔŋ Babylon ke ndon anana owo eke oduŋde, eyesu ɔnɔ Babylon.

³⁰ Mbon uko Babylon emetre ndiŋwana ekɔŋ, mmɔ esuk etie ke mkpɔsɔŋ ebiet mmɔ: odudu mmɔ amasat; mmɔ ekabare edi iban: ema ekim ikaŋ ke ebiet iduŋ esie; eto usin-usuŋ esie emebuŋɔ.

³¹ Owo itɔk efehe osobo owo itɔk, isuŋ onyuŋ osobo ye isuŋ, edidɔhɔ edidem Babylon, ete ke emeda obio esie ke edem oko,

³² ke emenyuŋ eda mme ebiet ube inyaŋ, mkpɔdiɔhɔ-mmɔŋ ke enyuŋ esak ke ikaŋ, mbon ekɔŋ enyuŋ etimere.

³³ Koro ntem ke Jehovah mme udim Abasi Israel ɔdɔhɔ, ete, Adiaha Babylon ebiet ebiet ubek ibokpot, ke ini eke edigide enye: osuk esisit ndien ini ukpeŋe eyesim enye.

³⁴ Nebuchadrezzar edidem Babylon ama adia mi, ama asuan mi, ama onim mi nte ukpɔk abaŋ, ama emen mi nte kukubarakpa, ama ada edinem udia mi esin ke idibi esie ɔyɔhɔ, ama ebin mi efep.

³⁵ Andiduŋ Zion ɔdɔhɔ ete, Yak afai emi enamde mi ye obuk mi ɔsɔp Babylon; Jerusalem onyuŋ ɔdɔhɔ ete, Yak iyip mi ɔsɔp mme andiduŋ Chaldea.

³⁶ Mmɔdo ntem ke Jehovah ɔdɔhɔ ete, Sese, ami nyekpe ikpe fo, nnyuŋ nsio usiene nnɔ fi; ndien nyenam inyaŋ esie edi edisat isɔŋ, nnyuŋ nnam mme idim mmɔŋ esie esat.

³⁷ Ndien Babylon eyekabare edi ibombom ibombom, ye iduŋ mme dragon, ye ŋkpɔ mkpa-idem, ye ŋkpɔ nsi, eke baba owo kiet eke oduŋde miduhe.

³⁸ Mmɔ eyekuni ɔtɔ kiet nte lion; eyefiori nte nsek nditɔ lion.

³⁹ Ke ini mmɔ efiopde nyenim udia mmɔ, nnyuŋ nnam mmɔ eŋwɔŋ mmin ekpa, man mmɔ ebre mbre, ndien ede nsinsi idap, ekunyuŋ edemere: ke edi Jehovah ɔdɔhɔ.

⁴⁰ Nyeda mmɔ nsuhɔre nte nditɔ erɔŋ, nte ekewot mmɔ, nte okukim ye okpo ebot.

⁴¹ Enam didie eda Sheshach! enyuŋ emum itoro ofuri ererimbot! Babylon anam didie akabare edi ndon ke otu mme idut!

⁴² Inyaŋ ibom ɔmɔdɔk osim Babylon: akwa odut esie ofuk enye.

⁴³ Mme obio esie ekabare edi ndon, edisat isɔŋ ye wilderness, isɔŋ eke baba owo kiet miduŋke ke esit, eyen owo midinyuŋ isaŋake ke esit ibe.

⁴⁴ Nyenyuŋ nnɔ Bal ke Babylon ufen, nnyuŋ nsio enye se enye emende esin ke idibi ke inua mfep: ndien mme idut idibuŋɔke aba itiene enye: ibibene Babylon omonyuŋ ɔduɔ.

⁴⁵ O ikɔt mi, mbufo ewɔŋɔ enye ke esit, mbufo kpukpru kiet kiet enyuŋ enyaŋa uwem mbufo, mbak ikaŋ iyaresit Jehovah.

⁴⁶ Ndien ekuyak esit emem mbufo, ekunyuŋ edikhe ebaŋa etop eke edikopde ke isɔŋ, etop eyenyuŋ edi mbun, etop eyenyuŋ etiene edem ke ebem, ndien afai eyedu ke isɔŋ, andikara aŋwana ye andikara.

⁴⁷ Mmɔdo, sese, mme usen ke edi, eke ndidade ufen ntiene ndisɔi mbiet Babylon: ndien but eyenam ofuri isɔŋ esie, ndien kpukpru mbio esie eke ekpaŋade afai eyeduɔŋɔ ke esit.

⁴⁸ Ndien enyɔŋ ye isɔŋ ye kpukpru se iduhe mmɔ ke esit, eyekwɔ ebaŋa Babylon: koro mme andibiat editode ke edem edere edi ekɔŋ ye enye: emi edi uyo Jehovah.

⁴⁹ Babylon ŋko mmɔŋ ɔduɔ, O mbufo Israel emi ekekpaŋade afai, eke Babylon ŋko eduɔŋɔ, O mbufo ofuri ere-rimbot emi ekpaŋade afai.

⁵⁰ Mbufo emi ebɔhɔde ofut edaŋa, ekutuak eda: mbufo etie ke anyan idut eti Jehovah, eyak Jerusalem onyuŋ oduk mbufo ke esit.

⁵¹ But akanam nnyin, koro nnyin ikokopde esuene: but okofuk nnyin iso: koro isen owo ekedukde ke edisana ebiet ufɔk Jehovah.

⁵² Jehovah ɔdɔhɔ, ete, Mmɔdo, sese, mme usen ke edi, eke ndinɔde ndisɔi mbiet esie ufen: ndien mbon unan eyemum ke ofuri isɔŋ esie.

⁵³ Koro Babylon ɔdɔkde ke enyɔŋ, koro enye onyuŋ ɔsɔŋɔde edikoŋ odudu esie, owo eke edibiatde eyeto mi esim enye. Emi edi uyo Jehovah.

⁵⁴ Uyom eseme oto ke Babylon, ye eke akwa ŋwure onyuŋ oto ke isɔŋ mme Chaldean.

⁵⁵ Koro Jehovah abiatde Babylon, onyuŋ osobode akwa uyom ke esit: odut esie enyuŋ ekpot nte akamba mmɔŋ, esioro uyo mkpo mmɔ:

⁵⁶ koro owo eke abiatde omosim enye, omosim Babylon, ndien emum mbon uko esie; mme utiga mmɔ ebuŋɔ: koro Jehovah edide Abasi usiene, enye iditreke ndinɔ utip.

⁵⁷ Ndien nyenam mbɔŋ mmɔ, ye mme ɔfiɔkŋkpɔ owo mmɔ, ye mme etubom mmɔ, ye ikpɔ owo mmɔ, ye mbon uko mmɔ eŋwɔŋ ekpa: ndien mmɔ eyede nsinsi idap, idinyuŋ idemekede; emi edi uyo edidem, Jehovah mme udim edi enyiŋ esie.

⁵⁸ Ntem ke Jehovah mme udim ɔdɔhɔ, ete, Ibibene akwa Babylon eyewure kpukpru, ŋkokoŋo itim esie eyenyuŋ eta ikaŋ; ndien mme idut eyenam utom ke ikpikpu, mme obio eyenyuŋ enam utom ke ikaŋ enyuŋ ekpɔt.

⁵⁹ Uyo emi ke Jeremiah prophet eketeme Seraiah eyen Neriah eyen Mahseiah ke ini enye akade ŋkpɔ ke Babylon ke uyo Zedekiah edidem Judah ke ɔyɔhɔ isua ubɔŋ esie inaŋ.

⁶⁰ Ndien Seraiah edi etubom ebiet nna edidem. Ndien Jeremiah ewet ofuri idiɔk-ŋkpɔ eke edisimde Babylon, esin ke nwed kiet, kpa kpukpru ikɔ eke ekewetde ebaŋa Babylon.

⁶¹ Ndien Jeremiah ɔdɔhɔ Seraiah, ete, Kini afo edisimde Babylon, tim se ndien, nyuŋ kwɔrɔ kpukpru ikɔ emi; ndien dɔhɔ, ete,

⁶² Afo, O Jehovah, ɔdɔhɔ ikɔ otuk ebiet emi, ete iyesibe enye ifep, tutu owo eke oduŋde ke esit iduhe, edide owo onyuŋ edide ufene; koro enye eyedi nsinsi ndon.

⁶³ Ndien ama ekem, ke afo etiŋde ŋwed emi ama, da itiat tebe ke esit, ndien da enye duɔk ke ufɔt Euphrates.

⁶⁴ Nyuŋ dɔhɔ, ete, Babylon eyedeŋ ntem, idinyuŋ itoho ke idiɔk ŋkpɔ emi ami ndade ntiene enye; ndien mmɔ eyekpa mba. Mme ikɔ Jeremiah esim ebiet emi.