JEREMIAH 14 - Edisana ñwed Abasi Ibom

Ɔkpɔsɔŋ Ndaeyo ye Mme Nsu Nsu Prophet

¹ UYO Jehovah emi okosim Jeremiah abaŋa anyan ndaeyo.

² Judah ke atua, mme inua-otop esie enyuŋ ekpa idem; mmɔ etie ikpo ke isɔŋ; eseme Jerusalem omonyuŋ ɔdɔk.

³ Ndien mbɔŋ mmɔ edɔŋ nditɔwɔŋ mmɔ mmɔŋ; mmɔ esim obube, ikwe mmɔŋ; efiak ye ukpɔk abaŋ mmɔ ke ubɔk; but ye esuene enam mmɔ, ndien mmɔ efuk ibuot mmɔ.

⁴ Koro isɔŋ asiahade, koro edim miduhe ke isɔŋ, but anam mbon iŋwaŋ, mmɔ efuk ibuot mmɔ.

⁵ Koro edop ŋko amande eyen ke ikɔt, ndien ɔkpɔŋ enye, koro mbiet miduhe.

⁶ Mme ass ikɔt enyuŋ eda ke enyɔŋ obot, eŋwine ofum nte jackal. Enyin okim mmɔ, koro mbiet miduhe.

⁷ Okposuk edi nte mme idiɔk ido nnyin ebɔrɔde ebaŋa nnyin, O Jehovah, nam baŋa enyiŋ fo: koro mfiakedem nnyin awakde; nnyin imanam idiɔk ye afo.

⁸ Idorienyin Israel, emi anyaŋade enye ke ini ukut, nsinam afo ebietde esen owo ke isɔŋ, ye nte owo isaŋ eke owukde (tent) ndidaŋ ke okoneyo?

⁹ Nsinam afo ebietde owo mkpa-idem, ebiet ɔkpɔsɔŋ owo eke mikemeke ndinyaŋa? Ndien afo odu ke otu nnyin, O Jehovah, nnyin inyuŋ ikereke enyiŋ fo; kukpɔŋ nnyin.

¹⁰ Ntem ke Jehovah ɔdɔhɔ ye mbio emi, ete, Ntre ke mmɔ ema ndiyɔrɔ imumke ukot mmɔ ikama, ndien mmɔ inemke Jehovah esit; kemi ke enye editi mme idiɔk ido mmɔ, onyuŋ ɔnɔ mmɔ ufen abaŋa oburubut ido mmɔ.

¹¹ Ndien Jehovah ɔdɔhɔ mi, ete, Kunam mkpe ubɔk eti ŋkpɔ unɔ mbio emi.

¹² Ke ini mmɔ etrede udia, ami ndikopke eseme mmɔ; ndien ke ini mmɔ ewade edifɔp uwa ye inuak-udia, ami ndibɔhɔ mmɔ: koro nyesobo mmɔ ke ofut, ye ke akaŋ, ye ke idiɔk udɔŋɔ.

¹³ Ndien ami ndɔhɔ, nte O Ɔbɔŋ Jehovah, sese mme prophet edɔhɔ mmɔ, ete, Mbufo idikwe ofut, akaŋ idinyuŋ inamke mbufo; koro nyenɔ mbufo akpan ifure ke ebiet emi.

¹⁴ Ndien Jehovah ɔdɔhɔ mi, ete, Mme prophet etiŋ nsunsu a-prophecy ke enyiŋ mi: ŋkɔdɔŋke mmɔ utom, nnyuŋ ntemeke mmɔ, nnyuŋ ndɔhɔke ye mmɔ; mmɔ emen ŋkukut nsu, ye idiɔŋ, ye ikpikpu ŋkpɔ, ye abiaŋa esit mmɔ etiŋ enɔ mbufo.

¹⁵ Mmɔdo ntem ke Jehovah ɔdɔhɔ abaŋa mme prophet emi etiŋde prophecy ke enyiŋ mi, ndien ami ndɔŋke mmɔ utom, mmɔ enyuŋ edɔhɔ ete, ke baba ofut ye akaŋ ididuhe ke isɔŋ emi; mme prophet oro eyetak ke ofut ye ke akaŋ.

¹⁶ Ndien ama edi mbio emi mmɔ etiŋde prophecy enɔ mmɔ, ofut ye akaŋ eyesin mmɔ eduɔŋɔ ke mme efak Jerusalem: ndien idikwe owo eke edibukde mmɔ, kpa mmɔ, ye iban mmɔ, ye nditɔ-iren mmɔ, ye nditɔ-iban mmɔ: ndien nyeda idiɔk ido mmɔ ŋwaŋa mmɔ ke idem.

¹⁷ Nyuŋ dɔhɔ ikɔ emi, ete, enyin mi eyeyak mmɔŋeyet ɔsuhɔre ke okoneyo ye uwemeyo, idinyuŋ idopke: koro emenuak adiaha ikɔt mi eyenɔwɔŋ eti-eti, unan ɔmɔdiɔk akan.

¹⁸ Edieke ŋwɔrɔde ke iŋwaŋ, sese, mmɔ emi ekpaŋade ke ofut! ndien edieke ndukde ke obio, sese, mmɔ emi edɔŋɔde biɔŋ! koro mme prophet ye mme oku ŋko ediyode eka idut eke mmɔ mifiɔkke.

¹⁹ Nte afo ɔmɔduɔk Judah fap? Nte Zion etek fi esit? Nsinam afo amiade nnyin, ndien nnyin inyeneke owo eke ɔkɔkde nnyin?

²⁰ nnyin idori enyin ke emem, ndien eti ŋkpɔ iduhe: idori enyin ke ini ukɔk, ndien, sese, akwa ndik! Nnyin imɔdiɔŋɔ mme idiɔk ido nnyin, O Jehovah, ye mme ukwaŋ-ŋkpɔ mme ete nnyin: koro nnyin imanam idiɔk ye afo.

²¹ Kusin nnyin ke ndek, ubaŋa enyiŋ fo, kusuene ebekpo ubɔŋ fo: ti, kubiat ediomi fo ye nnyin.

²² Nte ikpikpu abasi mme idut ekededi odu eke ekemede ndinam edim edep? Nte ikpa-enyɔŋ edinɔ edim mmɔŋ? Nte idige afo edi enye, O Jehovah Abasi nnyin? Nnyin iyebet fi, ndien: koro afo anamde kpukpru ŋkpɔ emi.