ISAIAH 63 - Edisana ñwed Abasi Ibom

Usen Iyaresit Abasi

¹ ANIE edi emi otode ke Edom edi? Esine ediyibe ɔfɔŋ-idem oto ke Bozrah? Enye emi esinede ɔfɔŋ-idem ubɔŋ, ke asaŋa ke uwak odudu esie? Edi ami, emi ndɔhɔde nte enende, nsɔŋɔ ke erinyaŋa.

² Nsinam ɔfɔŋ-idem fo oyibede? Nsinam edisine-ŋkpɔ fo ebietde eke owo emi edigide ke ebiet udigi-wine?

³ Mmedigi udigi-wine ke idem-mi; baba owo obio kiet inyuŋ iduhe ye ami: ndien nyedigi mmɔ ke iyaresit mi, nnyuŋ nda ikpat ntim mmɔ ke ifuresit mi; ndien enyam mmɔ eyesime mi ke ɔfɔŋidem, nyenyuŋ nsabare ofuri edisine-ŋkpɔ mi.

⁴ Koro usen usiene odude mi ke esit, isua mmɔ emi mfakde omonyuŋ edi.

⁵ Ndien ami ntiŋ enyin nse, nte ke owo eke aŋwamde iduhe; nnyuŋ nyik koro baba owo kiet eke omumde akama miduhe: ndien ubɔk mi anyaŋa ɔnɔ mi; ifuresit mi onyuŋ omum mi akama.

⁶ Ndien nyedigi mme idut ke iyaresit mi, nnyuŋ nnam mmɔ eŋwɔŋ eyuhɔ ke ifuresit mi, nnyuŋ nnam enyam mmɔ ɔsuhɔre ke isɔŋ.

⁷ Nyebuk ima Jehovah, ye itoro Jehovah, kpa nte asaŋade ke kpukpru se Jehovah akanamde ye nnyin, nte onyuŋ asaŋade ke akwa mfɔn ufɔk Jacob, emi enye ɔkɔfɔnde ye mmɔ, ekem ye mbɔm esie, ye ke uwak ima esie.

⁸ Ndien enye ɔdɔhɔ, ete, Mmɔ edi ikɔt mi ikpɔŋ, nditɔ eke midisuhu nsu: ndien enye akabare edi andinyaŋa mmɔ.

⁹ Ke ofuri ukut mmɔ enye idige usua mmɔ baba, ndien angel iso esie akanyaŋa mmɔ: ima esie ye mbɔm esie esin enye afak mmɔ; enye onyuŋ emen mmɔ akama ke ofuri eyo oko.

¹⁰ Edi mmɔ esɔŋ ibuot enyuŋ eyat Edisana Spirit esie: ndein enye akabare edi usua mmɔ, onyuŋ aŋwana ekɔŋ ye mmɔ.

¹¹ Ndien enye eti eyo oko, Moses, ye ikɔt esie: “Enye emi akadade mmɔ ye ɔbɔk-ufene esie ke inyaŋ ɔdɔk, odu mmɔŋ? Enye emi ekesinde enye Edisana Spirit esie ke idem, odu mmɔŋ?

¹² Emi akadade nnasia Moses, ye ubɔk ubɔŋ esiemɔ, eteme mmɔ usuŋ, asiak mmɔŋ ke iso mmɔ, man anam nsisni enyiŋ ɔnɔ idem esie;

¹³ emi akadade mmɔ usuŋ ke udem, ebiet horse ke wilderness, mmɔ ididuɔhɔ?

¹⁴ Kpa nte ikpɔ ufene esuhɔrede ke itihere ebiet, kpa ntre ke Spirit Jehovah edinam enye ɔduɔk odudu: ntem ke afo akada ikɔt fo usuŋ, man anam enyiŋ ubom ɔnɔ idem fo.”

¹⁵ Tie ke heaven tiŋ enyin, nyuŋ tie ke edisana ebiet iduŋ fo, ye iduŋ ubɔŋ fo, se: ufup fo ye nsɔŋidem fo edu mmɔŋ? Nte emum uyom nsia fo ye mbɔm fo oro afo ekenyenede ye ami.

¹⁶ Koro afo edide ete nnyin; koro Abraham mifiɔkke nnyin, Israel midinyuŋ idiɔŋɔke nnyin. Afo, O Jehovah, edi ete nnyin; andifak nnyin edi enyiŋ fo ke nsinsi.

¹⁷ O Jehovah, nsinam afo ayakde nnyin idiyo ikpɔŋ usuŋ fo, ayak esit nnyin ɔsɔŋ, ete ikubak fi? Fiak di baŋa ikɔt fo, mme esien udeme fo.

¹⁸ Edisana ikɔt fo ekenyene (obio) ini esisit: mme asua nnyin edigi edisana ebiet fo.

¹⁹ Nnyin ikodu ke eyo oko; afo ukakarake mmɔ; mmɔ ikekereke enyiŋ fo.